सर्वोच्च बारका पदाधिकारीसँग प्रधानन्यायाधीशले भने- 'मैले मन्त्रीमा भाग मागेँ भन्ने समाचार झूटो हो'- समाचार - कान्तिपुर समाचार
कान्तिपुर वेबसाईट
AdvertisementAdvertisement

सर्वोच्च बारका पदाधिकारीसँग प्रधानन्यायाधीशले भने- 'मैले मन्त्रीमा भाग मागेँ भन्ने समाचार झूटो हो'

कान्तिपुर संवाददाता

काठमाडौँ — प्रधानन्यायाधीश चोलेन्द्र शम्शेर जबराले सर्वोच्च अदालत बार एसोसिएसनका पदाधिकारीहरूसँग मन्त्रिपरिषद् विस्तारमा आफूले पनि भाग खोजेको भन्ने समाचार झूटो भएको बताएका छन् ।

प्रधानन्यायाधीश चोलेन्द्र शमशेर जबरा । फाइल तस्बिर ।

आइतबार सेतोपाटी र अनलाइनखबर डटकम र सोमबार कान्तिपुर दैनिकमा मन्त्रिमण्डल विस्तारमा प्रधानन्यायाधीश जबराका लागि पनि कोटा छुट्याउन दलका नेताहरूबीच छलफल भएको समाचार प्रकाशित भएको थियो। त्यसरी समाचार सार्वजनिक भएपछि सर्वोच्च अदालत बार एसोसिएसनक पदाधिकारीले सोमबार बिहान प्रधानन्यायाधीश जबरालाई भेटेर त्यसबारे चासो राखेका थिए।

भेटमा सहभागी सर्वोच्च बारका सचिव ऋषिराम घिमिरेले 'प्रधानन्यायाधीशले आफूहरूलाई झूटो समाचार प्रकाशित गरेर त्यसले स्वतन्त्र न्यायलयमाथि प्रहार गरेको' बताएको जनाए । 'त्यो हुनै नसक्ने कुरा हो । मबाट त्यस्तो काम हुनै सक्दैन्,' प्रधानन्यायाधीश जबरालाई उद्धृत गर्दै सचिव घिमिरेले भने ।

सर्वोच्च अदालत बारका अध्यक्ष प्राध्यापक पूर्णमान शाक्यको नेतृत्वमा गएको बारको टोलीसँग प्रधानन्यायाधीश जबराले आफूमाथि लागेका आरोपको खण्डन गर्ने पनि बताएका थिए।

प्रकाशित : आश्विन १८, २०७८ १२:२९
प्रतिक्रिया
पठाउनुहोस्

बन्दरगाहमा बढेन चहलपहल

कान्तिपुर संवाददाता

पर्सा — दसैंतिहार, छठजस्ता ठूला चाडपर्व नजिकिए पनि वीरगन्जस्थित सिर्सिया सुक्खा बन्दरगाहमा चहलपहल झनै घटेको छ । अघिल्ला वर्ष यी चाड नजिकिँदा लत्ताकपडा, दीपावलीको बत्ति, जुत्तालगायतका वस्तुको आयात बढ्ने गर्थ्यो । 

यस वर्ष भने चहलपहल झनै घट्दो छ । बन्दरगाहस्थित भन्सार कार्यालयका सूचना अधिकृत चूडामणि शर्मा कट्टेलले २ सातायता बन्दरगाहको चहलपहल घटेको बताए । ‘अघिल्ला वर्षहरूमा चाडपर्व नजिकिएसँगै पर्व लक्षित वस्तुहरूको आयात बढ्थ्यो, यस वर्ष भने त्यस्तो भएन,’ उनले भने, ‘दुई साता अघिसम्म दैनिक १ सय १० देखि १ सय १५ वटा कन्साइन्मेन्टको घोषणा हुने गरेकोमा, हाल भने त्यो घटेर दैनिक ६० देखि ७५ वटामा झरेको छ ।’

यो तेस्रो मुलुकबाट मालवस्तु आयात हुने मुलुककै मुख्य नाका हो । समुद्री मार्गबाट भारतको कोलकाता, हल्दिया तथा बिशाखापटनम बन्दरगाहसम्म आउने मालबाहक कन्टेनर त्यहाबाट रेलमा ढुवानी गरेर सुक्खा बन्दरगाहसम्म ल्याइन्छ । रेलबाट मालवस्तु ढुवानी सस्तो र भरपर्दो मानिन्छ । कोभिड महामारीसँगै विश्वव्यापी रूपमै कतिपय वस्तुको उत्पादन र मागसमेत घटेकाले त्यसको असर हाल देखिएको हुन सक्ने कट्टेलको अनुमान छ ।

यसबाहेक रसुवा नाका हाल सञ्चालनमा आइसकेको र दसैं लक्षित लत्ताकपडा, जुत्ता तथा अन्य चिनियाँ वस्तुहरू त्यही नाकाबाट भित्रिन थालिसकेकाले आयातकर्ताले यो नाका प्रयोग नगरेको हुन सक्ने उनले बताए ।

असार १५ सम्म राजस्व संकलन लयमै रहेपनि त्यसयता भने ओरालो लाग्दै गएको कट्टेल बताउँछन् । असोज महिनामा ४ अर्ब २१ करोड रुपैयाँ राजस्व संकलनको लक्ष्य पाएको यो भन्सारले असोज १५ सम्ममा २ अर्ब १७ करोड रुपैयाँ उठाएको छ । जुन मासिक लक्ष्यको ५१ दशमलव ५५ प्रतिशत हो । त्यसपछि भने दैनिक राजस्व संकलन घट्दो क्रममा रहेको र यसै महिनामा दसैंको बिदा पनि पर्ने भएकाले मासिक लक्ष्य भेट्टाउन सम्भव नहुने पनि उनले बताए । हाल पनि यो भन्सारबाट दैनिक २ वटासम्म नयाँ कार/जिप जाँचपास भइरहे पनि राजस्व असुली उत्साहजनक रूपमा हुन नसकेको उनको भनाइ छ ।

नियमित आयात हुने फलाम, गेडागुडी, मदिरा वस्तुको आयात भने नघटेको उनले बताए । यसअघि चालु आवको पहिलो अर्थात् साउनमा यो भन्सारले मासिक राजस्व असुली लक्ष्य भेट्टाएको र भदौमा लक्ष्यभन्दा करिब ३ प्रतिशत मात्र कम राजस्व संकलन भएको उनले जानकारी दिए ।


प्रकाशित : आश्विन १८, २०७८ १२:२७
पूरा पढ्नुहोस्
प्रतिक्रिया
पठाउनुहोस्
×