क्रान्तिकारीको राष्ट्रिय सम्मेलन : नीति निर्धारण भयो, नेतृत्व चयन बाँकी- समाचार - कान्तिपुर समाचार

क्रान्तिकारीको राष्ट्रिय सम्मेलन : नीति निर्धारण भयो, नेतृत्व चयन बाँकी

कान्तिपुर संवाददाता

काठमाडौँ — माओवादी केन्द्रको विद्यार्थी संगठन अखिल (क्रान्तिकारी)ले आगामी अधिवेशनसम्मका लागि लिने नीति निर्धारण गरेको छ । अध्यक्ष रञ्जित तामाङले पेस गरेको राजनीतिक तथा सांगठनिक प्रतिवेदन शनिबार पास गरेसँगै अखिल क्रान्तिकारीको नीति निर्धाण भएको हो ।

बिहीबार सुरु भएको अखिल क्रान्तिकारीको २२ राष्ट्रिय सम्मेलनले तीन दिनसम्म पनि नेतृत्व चयन गर्न नसक्दा आइतबारसम्मका लागि लम्बिएको छ । असोज १४ देखि १६ गतेसम्मका लागि तय गरिएको राष्ट्रिय सम्मेलनमा एक दिन थपिएको छ ।

क्रान्तिकारीका उपाध्यक्ष सुरेन्द्र बस्नेतले तीन दिनमा 'नीति चयन भएसँगै अब नेतृत्व निर्माणको चरणमा सम्मेलन प्रवेश गरेको' बताए ।

सम्मेलनमा अध्यक्ष तामाङले प्रस्तुत गरेको राजनीतिक तथा सांगठनिक प्रतिवेदनमाथि प्रतिनिधिलाई ११ समूहमा विभाजन गरेर छलफल गराइएको थियो । 'छलफलका लागि ११ समूह बनेका थिए । प्रतिवेदनमा सुझाव दिनका ती समूहमा आज दिनभर छलफल भयो र टोली नेताले धारणा राखेपछि प्रतिवेदन पारित भयो,' बस्नेतले भने ।

अखिल क्रान्तिकारीले अब २५ सदस्यीय पदाधिकारी र १ सय ९९ सदस्यीय केन्द्रीय कमिटी बनाउने नीति लिएको छ । यसअघि क्रान्तिकारीको केन्द्रीय कमिटीमा २ सय ४३ जना थिए । अब अध्यक्ष १, उपाध्यक्ष ३ खुला र ४ समावेशी, महासचिव १ हुनेछन् भने २ उपमहासचिव हुनेछन् । उपत्यका विशेष प्रदेशसहित ७ प्रदेशबाट १-१ गरी ८ जना सचिव हुनेछन् । थप ५ समावेशी सचिव बनाउने अधिवेशनले पारित गरेको छ । १ कोषाध्यक्ष हुनेछ ।

अखिल क्रान्तिकारीको अध्यक्षका लागि ६ जनाको दाबी रहेको छ । सर्वसम्मत अध्यक्ष बनाउने प्रयासका लागि एक दिन अधिवेशनको समय थपिएको क्रान्तिकारीले जनाएको छ । अध्यक्षका लागि सुरेन्द्र बस्नेत, उत्तम अधिकारी, पञ्चा सिंह, विजय गौतम, तीलकराज भण्डारी र दीपक देवकोटा आकांक्षी छन् ।

शनिबार नै बसेको माओवादीको स्थायी कमिटी बैठकले अध्यक्षका दाबेदारका नामबारे छलफल गरेको थियो । स्थायी कमिटी बैठकले अनेरास्ववियू (क्रान्तिकारी)को अध्यक्ष चयन गर्ने जिम्मा अध्यक्ष दाहाललाई दिने निर्णय गरेको छ । माओवादी प्रवक्ता कृष्णबहादुर महराले अध्यक्षका सम्भावित दाबेदार नामहरूको चर्चा भएको र सबैले क्षमता राख्ने भन्दै कसलाई बनाउने भन्ने जिम्मा अध्यक्ष पुष्पकमल दाहाललाई दिइएको बताए ।

प्रकाशित : आश्विन १६, २०७८ १९:३५
प्रतिक्रिया
पठाउनुहोस्

सत्तारूढ गठबन्धन चुनावसँग मिलेर अघि बढन सक्छ कि सक्दैन भन्‍ने प्रश्‍न उठेको छ : निधि

कान्तिपुर संवाददाता

काठमाडौँ — सत्तारुढ दल नेपाली कांग्रेसका उपसभापति विमलेन्द्र निधिले सरकारले अझै पूर्णता नपाएकोमा असन्तुष्टि व्यक्त गरेका छन् । उपसभापति निधिले छिटोभन्दा छिटो मन्त्रिपरिषद्लाई पूर्णता दिन पनि प्रधानमन्त्री शेरबहादुर देउवा र सत्ता गठबन्धनका नेताहरुलाई आग्रह गरे ।

गान्धी जयन्ती तथा अन्तर्राष्ट्रिय अहिंसा दिवसको अवसर पारेर शनिबार काठमाडौंमा आयोजित एक कार्यक्रममा बोल्दै उनले ८१ दिन बित्दा समेत सरकारले पूर्णता नपाएकोमा दुःख व्यक्त गरे ।

उनले सरकारले अझै पूर्णता नपाउनु सिंगो देशकै लागि चिन्ता र दुःखको विषय भएको स्मरण समेत गराए । उपसभापति निधिले भने, ‘८१ दिन भो गठबन्धनको तर्फबाट सरकार बनेको तर गठबन्धनबीच सहमति नभएको कारण हाम्रै पार्टीका सभापति नेपाली कांग्रेसका सभापति शेरबहादुर देउवाको नेतृत्वमा रहेको सरकारले मन्त्रिमण्डललाई पूर्णता दिन सकेको छैन । मन्त्रिमण्डलले अझै पूर्णता नपाउनु भनेको यो साह्रै चिन्ता र दुःखको विषय हो । यो नेपाली कांग्रेस र सरकारमा सहभागी दलहरुको लागि मात्रै होइन पुरै नेपालको लागि यो चिन्ता र दुःखको विषय हो कि आजको मितिसम्म पनि सरकारले पूर्णता पाउन नसक्नु । त्यसकारणले अब नेपाली कांग्रेसका सभापति शेरबहादुर देउवा र गठबन्धन दलका सबै दलका नेता र पदाधिकारीहरुसँग म के अनुरोध गर्न चाहन्छु भने अब धेरै ढिला भयो । अब छिटोभन्दा छिटो मन्त्रिमण्डलले पूर्णता पाउने गरी तपाईंरुको निर्णय आउनै पर्ने भयो । अब धेरै पर्खन सकिदैँन ।’

उपसभापति निधिले सरकारले पूर्णता पाउन अझै नसकेकाले सत्तारुढ गठबन्धन चुनावसँग मिलेर अघि बढन सक्छ कि सक्दैन भन्ने प्रश्न उठेको टिप्पणी गरे । उनले गान्धीको अहिंसाको बाटोबाट अघि बढेर मात्रै हरेक राष्ट्रले शान्ति र समृद्ध प्राप्त गर्न सक्ने बताए । कांग्रेस नेता अर्जुननरसिंह केसीले हिंसालाई त्यागेर मात्रै गान्धीले देखाएकाले अहिंसाको बाटोमा अघि बढन सकिने स्पष्ट पारे ।

प्रकाशित : आश्विन १६, २०७८ १९:२९
पूरा पढ्नुहोस्
प्रतिक्रिया
पठाउनुहोस्
×