सबै कम्युनिस्ट मिलेर आए पनि जित्ने तागत कांग्रेसले बनाउनु छ : थापा - समाचार - कान्तिपुर समाचार
कान्तिपुर वेबसाईट
AdvertisementAdvertisement

सबै कम्युनिस्ट मिलेर आए पनि जित्ने तागत कांग्रेसले बनाउनु छ : थापा 

कान्तिपुर संवाददाता

काठमाडौँ — कांग्रेस नेता गगन थापाले आसन्न महाधिवेशनबाट आगामी आमनिर्वाचनमा सबै कम्युनिस्ट पार्टीहरु एक भए पनि जित्ने तागत कांग्रेसले आर्जन गर्नुपर्ने बताएका छन् ।

‘ढिलो चाँडो हुनसक्छ । तर अब पार्टीको महाधिवेशन हुन्छ । यो महाधिवेशनबाट बाहिर निस्किनेबित्तिकै हाम्रो अगाडि लगातार तीन तहको चुनाव आउँछ,’ शनिबार कांग्रेसको काठमाडौं महानगर अधिवेशनलाई सम्बोधन गर्दै नेता थापाले भने, ‘कांग्रेस अर्काले पस्केको खाने जात होइन । हामी आफैँले एकल शक्तिको आधारमा काठमाडौं महागनरमा कांग्रेसको झण्डा गाड्ने हो । र यो पटक कोहीसँग मिलेर होइन, एकल शक्तिका आधारमा पाँच वर्ष देश चलाउने जिम्मा कांग्रेसले लिने हो ।’

उनले महाधिवेशनबाट कांग्रेसले सबै कम्युनिस्ट एक भएर आए पनि, सबै मधेसी दलहरु एक भएर आए भने पनि जित्ने तागत राख्ने नेतृत्व र संगठन निर्माण गर्नुपर्ने बताए ।

‘सबै कम्युनिस्ट एक भएर आए पनि, सबै मधेसी दलहरु एक भएर आए भनेपनि जित्ने तागत राख्ने नेतृत्व र संगठन निर्माण गर्नुपर्नेछ अबको ५/६ महिनाभित्रमा । त्यसैले तपाईहरुले विवेकपूर्ण निर्णय गर्नुहुन्छ भन्ने विश्वास छ,’ उनले भने, ‘हामीले वडामा गरौँ या महानगरमा गरौँ । ती प्रत्येक निर्णयले अर्थ बोकेको हुन्छ । हामी पार्टीभित्र परिवर्तन चाहन्छौँ कि चाहदैनौँ ? आज कांग्रेस जसरी चलेको छ, यो ठीक छ ? हामी यो यथास्थितिमा टिकाउन चाहन्छौँ ? या परिवर्तन चाहन्छौँ ? यो हलबाट निर्णय भएर आउनुपर्छ ।’

नेता थापाले यो महाविधेशनले कांग्रेसमा शुद्धीकरण र संगठन सुदृढीकरण गर्नुपर्ने खाँचो रहेको बताए । ‘म एउटा कांग्रेसको कार्यकर्ता भएको हिसाबले ठान्दछु, आज जसरी कांग्रेस चलेको छ, यसै गरी चलेको कांग्रेसले जनतालाई भरोसा दिलाउन सक्दैन । कांग्रेसभित्र ठूलो सुधारको खाँचो छ । कांग्रेसलाई शुद्धीकरणको खाँचो छ, सुदृढीकरणको खाँचो छ,’ थापाले भने, ‘त्यो शुद्धीकरण र सुदृढीकरण यो महाधिवेशनबाट गर्नुपर्ने छ ।’

प्रकाशित : आश्विन १६, २०७८ १२:३०
प्रतिक्रिया
पठाउनुहोस्

सिता एयरले काठमाडौं–भद्रपुर–ताप्लेजुङ उडान सुरु गर्ने

आनन्द गौतम

ताप्लेजुङ — दसैं नजिकिदै जाँदा सिता एयरलाइन्सले काठमाडौं–ताप्लेजुङ, ताप्लेजुङ–भद्रपुर, भद्रपुर–ताप्लेजुङ र ताप्लेजुङ–काठमाडौं उडान गर्ने भएको छ ।

यसअघिको पुरानै भाडादरमा यसै हप्तादेखि उडान सुरु गर्न लागेको एड्भेञ्चर हिमालयन ट्राभल एण्ड ट्रेक प्रालिका प्रबन्धक रणबहादुर खड्काले जानकारी दिए । उडानका लागि यो प्रालिले समन्वय गर्दै आएको छ ।

झापालगायत तराईका जिल्लाबाट पहाड जाने यात्रु समेतलाई दृष्टिगत गरी उडान सुरु गर्न लागिएको खड्काले बताए । काठमाडौंबाट ताप्लेजुङ यात्रु लिएर आएको जहाज ताप्लेजुङका यात्रु लिएर भद्रपुर जाने, भद्रपुरका यात्रु ताप्लेजुङ ल्याउने र ताप्लेजुङका यात्रु लिएर काठमाडौं जाने जनाइएको छ । यसो गर्दा ताप्लेजुङबाट काठमाडौं जाने यात्रु धेरै भए उनीहरुलाई भद्रपुर पुर्‍याएर त्यहाँबाट पनि पठाउने योजना बनाइएको छ ।

काठमाडौंबाट एक पटकमा १३ जनासम्म यात्रु ताप्लेजुङ जान पाउने छन् भने १६ जनासम्म फर्कन पाउँछन् । ताप्लेजुङ जाँदा फ्यूल भरेर जानुपर्ने भएकाले कम यात्रु अट्छन् । ताप्लेजुङ–काठमाडौंको भाडा आठ हजार रुपैयाँ छ भने ताप्लेजुङ–भद्रपुरको ४५ सय रुपैयाँ रहेको छ । नेपाल वायु सेवा निगमले पनि सातामा चार दिन काठमाडौं–ताप्लेजुङ उडान गर्दै आएको छ ।

प्रकाशित : आश्विन १६, २०७८ १२:२५
पूरा पढ्नुहोस्
प्रतिक्रिया
पठाउनुहोस्
×