नेपाल-भारत संयुक्त परियोजना अनुगमन समितिको बैठक : भूकम्पपछिको पुनर्निर्माणमा सन्तुष्टि- समाचार - कान्तिपुर समाचार
कान्तिपुर वेबसाईट
AdvertisementAdvertisement

नेपाल-भारत संयुक्त परियोजना अनुगमन समितिको बैठक : भूकम्पपछिको पुनर्निर्माणमा सन्तुष्टि

कान्तिपुर संवाददाता

काठमाडौँ — भूकम्कपछि भारतीय सहयोगमा नेपालमा पुनर्निर्माण भएका परियोजनाहरुको प्रगतिलाई नेपाल–भारत संयुक्त परियोजना अनुगमन समिति (जेपीएमसी) को बैठकमा दुवै पक्षले सन्तुष्टि जनाएका छन् । 

नेपालमा २०७२ सालमा भूकम्प गएपछि भारतले नेपालका भूकम्प प्रभावित जिल्लाहरुमा घर, विद्यालय र स्वास्थ्य भवन तथा सांस्कृतिक सम्पदा निर्माणमा सहयोग गरेको छ ।

भारतको सहयोगमा निर्मित पुननिर्माण परियोजनाको प्रगतिको सम्बन्धमा बिहीबार काठमाडौंमा बैठक भएको थियो । मेरियट होटलमा भएको उक्त संयुक्त बैठकमा नेपालको तर्फबाट राष्ट्रिय पुननिर्माण प्राधिकरणका सचिव सुशीलचन्द्र तिवारी र भारतीय पक्षबाट विदेश मन्त्रालयका नेपालसहित उत्तरी महाशाखा हेर्ने सहसचिव अनुराग श्रीवास्तवले आ–आफ्नो टोलीको नेतृत्व गरेका थिए । बैठकले भारतको सहयोगमा नेपालका आवास, शिक्षा, स्वास्थ्य र सांस्कृतिक सम्पदाको क्षेत्रमा सञ्चालित भूकम्पपछिको पुनर्निर्माण परियोजनाहरुको प्रगतिको बृहत समिक्षा गरेको नेपाल र भारतीय दुवै पक्षले जनाएको छ ।

उक्त बैठकपछि भारतीय पक्षले विज्ञप्ती निकाल्दै आवासको क्षेत्रमा भारत सरकारको आर्थिक सहयोगमा गोरखा र नुवाकोट जिल्लामा सफलतापूर्वक ५० हजार निजी घरको पुनर्निर्माण भएकोमा दुवै पक्षले सन्तुष्टि व्यक्त गरेको जनाएको छ ।

बैठकमा दुवै पक्षले शिक्षा, सांस्कृतिक सम्पदा र स्वास्थ्यको क्षेत्रमा अघि बढिरहेका पुनर्निर्माण परियोजनाहरुमा भएको प्रगतिको सराहना गरेका छन् । उक्त समितिको बैठक दुवै मुलुकको सहमतिमा मिति तय गरेर अर्को पटक बस्ने सहमति भएको छ । बैठकमा नेपाल सरकारका सम्बन्धित मन्त्रालय, विभाग एवं निकायका प्रतिनिधि र भारत सरकारका अधिकारी, परामर्शदाता तथा परियोजनाको कार्यान्वयनमा संलग्न सरोकारवालाहरुको उपस्थिति थियो ।

भारतको सहयोगमा नेपालमा सञ्चालित भूकम्पपछिको पुनर्निर्माण परियोजनाहरुको प्रगतिको समिक्षा गर्न दुवै मुलुक मिलेर सन् २०१७ अगस्टमा उक्त जेपीएमसी संयन्त्र खडा गरिएको थियो । उक्त बैठक यसअघि २०७६ को फागुन २५ गते बसेको थियो ।

प्रकाशित : आश्विन १४, २०७८ १७:५७
प्रतिक्रिया
पठाउनुहोस्

प्रतिनिधिसभा विघटनपछि आत्महत्या गर्ने कि लड्ने विकल्प मात्र थिए : दाहाल

'जसलाई धेरै पटक मन्त्री बनाए ती पार्टीबाट पतन भए'
कान्तिपुर संवाददाता

काठमाडौँ — प्रतिनिधिसभाको २०७७ पुस ५ को विघटनपछि आफ्नो अगाडि तत्कालीन प्रधानमन्त्री र नेकपाका अध्यक्ष केपी शर्मा ओली अगाडि आत्मसमर्पण गर्ने कि आत्महत्या गर्ने कि लड्ने भन्ने विकल्प मात्र थिए भनेर माओवादी केन्द्रका अध्यक्ष पुष्पकमल दाहालले बताएका छन् । 

अखिल (क्रान्तिकारी)को २२ औँ राष्ट्रिय सम्मेलनलाई बिहीबार सम्बोधन गर्दै दाहालले आफूले लड्ने विकल्प रोजेको बताए । सत्ताबाट सडकमा पुग्दा कार्यकर्ताले सहयोग गर्ने हो कि होइन भन्ने अवस्थामा आफूहरू पुसको चिसोमा पनि सडकमा आएको उनको भनाइ थियो ।

'आफूले नै बनाएको पार्टी अध्यक्ष र प्रधानमन्त्रीबाट प्रतिगमनको काम भयो । संविधानका उपलब्धि उल्ट्याउने कुरा भयो । क्रान्तिकारी एजेन्डा, माओवादी आन्दोलन सिध्याउने, घेराबन्दीमा राख्ने र सखाप पार्ने काम भएको थियो । प्रतिनिधिसभा विघटन गर्नु मात्रै थिएन त्यसको लक्ष्य संविधानका उपलब्धि उल्ट्याउनु थियो । माओवादी आन्दोलनको विरासत उल्ट्याउने षड्यन्त्र थियो,' दाहालले भने, 'अब फेरि लडाइँ गर्ने कि आत्मसमर्पण गर्ने भन्ने विकल्प थिए । आत्मसमर्पण त मैले गर्न सक्दैन । हजारौं सहिदहरूको ऋण मेरो टाउकोमा छ । या त मैले सुसाइड (आत्महत्या) गर्नुपर्ने थियो या त लड्नपर्ने । अब लड्ने कि मर्ने ! मुक्ति वा मृत्युको ठाउँमा पुगेको देखेँ ।'

त्यसपछि आफ्नो टीमा नेताहरूले मिलेर लड्ने निर्णय लिएको दाहालले बताए । उनले भने, 'पार्टीका टीमका साथीहरूको सहयोगबाट फेरि लड्ने, क्रान्तिकारी ढंगले लड्ने, जोखिम उठाएर लड्ने निर्णय भयो । जेल जान पर्ने भएपनि जेल जाने, मारिनुपर्ने भए पनि मर्ने संकल्प हामीबाट भयो ।'

पछिल्लो समय माओवादी नेताहरू बिग्रिन लागेको भन्ने अभिव्यक्ति पनि दाहालले दिएका छन् । 'हामी बिस्तारै-बिस्तारै, थाहै नपाइकन गएको १०-१५ वर्षयता हाम्रो क्रान्तिकारी चरित्रमा ह्रास आएको छ,' उनले भने ।

पार्टीको नेतृत्वमा पुगेकाहरू अवसरवादी बन्न पुगेको पनि उनको भनाइ थियो । पद, प्रतिष्ठा, पैसा, कमिसनको निम्ती दलाल पुँजीपतिका हितहरूप्रति बढी संवेदनशील भएका र आफ्नै वर्ग यो परिवर्तनको निम्ती त्याग गरेकालाई बिस्मृतिमा पारिएको पनि उनले बताए ।

'जो जतिमाथि नेतृत्वमा पुग्यो, त्यो त्यति अवसरवादी । जो जति धेरै मन्त्री भयो, त्यो त्यति धेरै अवसरवादी,' उनले थपे, 'जसलाई धेरै पटकमन्त्री बनाए ती पार्टीबाट पतन भए । जो जतिमाथि आयो त्यो त्यति पतन भयो ।'

प्रकाशित : आश्विन १४, २०७८ १७:५५
पूरा पढ्नुहोस्
प्रतिक्रिया
पठाउनुहोस्
×