एमाले बैठकमा एमसीसी सम्झौताबारे पार्टीको धारणा स्पष्ट पार्न माग- समाचार - कान्तिपुर समाचार

एमाले बैठकमा एमसीसी सम्झौताबारे पार्टीको धारणा स्पष्ट पार्न माग

कान्तिपुर संवाददाता

काठमाडौँ — एमालेको जारी केन्द्रीय कमिटीको बैठकमा अमेरिकासँग भएको मिलेनियम च्यालेन्ज कर्पोरेसन (एमसीसी) सम्झौताको बारेमा पार्टीले लिने धारणा स्पष्ट पार्न माग गरेका छन् । दोस्रो दिनको बैठकमा अध्यक्ष केपी शर्मा ओलीले प्रस्तुत गरेको राजनीतिक प्रतिवेदनमाथि टिप्पणी गर्दै उनीहरुले एमसीसीको विषयमा धेरै विवाद भएको भन्दै त्यस विषयमा पार्टीले स्पष्ट धारणा लिएर अघि बढ्नु पर्ने बताएका हुन् । 

बैठकमा कर्णाली प्रदेशको टोली नेता यमलाल कँडेलले समूहमा छलफल हुँदा एमसीसीको विषयमा पार्टीले औपचारिक धारणा सार्वजनिक गर्नुपर्ने बताए । 'एमसीसीको धेरै विवादित बन्यो । यो विषयमा पार्टीको धारणा के हो औपचारिक रुपमा आउनु पर्छ' कँडेलले बैठकमा भनेका थिए ।

अध्यक्ष ओलीले तयार पारेको राजनीतिक प्रतिवेदनमा एमसीसीको विषयमा मौन रहेको छ । 'विभिन्न समूहगत छलफलमा एमसीसीको विषयलाई प्रस्ट पार्नुपर्ने विषय उठेको थियो', केन्द्रीय सदस्य निरज आचार्यले भने, 'विभिन्न समूहमा रहेका नेताहरुले नेपालको विदेशनीति असंलग्नतामा आधारित रहेकाले त्यसैअनुसार अघि बढ्नुपर्नेमा सुझावहरु आएको छ ।'

आगामी साता हुने विधान अधिवेशनमा प्रस्तुत गरिने राजनीतिक प्रतिवेदन, संगठनात्मक प्रस्ताव र विधानमाथि छलफल गर्नका लागि शुक्रबारबाट एमाले केन्द्रीय कमिटीको बैठक सुरु भएको हो । पहिलो दिन अध्यक्ष ओलीले राजनीतिक प्रतिवेदन, महासचिव ईश्वर पोखरेलले संगठनात्मक प्रस्ताव र संगठन विभागको तर्फबाट उपमहासचिव विष्णु पौडेलले विधान संशोधन मस्यौदा प्रस्तुत गरेका थिए । दस वटै समूहले प्रमुखहरुले आ-आफ्नो धारणा राखेको बैठकमा समूहगत रुपमा आएको सुझावहरुको निष्कर्ष तयार पार्नका लागि आइतबार पनि केन्द्रीय कमिटीको बैठक बस्ने भएका छन् ।

प्रकाशित : आश्विन ९, २०७८ २०:१२
प्रतिक्रिया
पठाउनुहोस्

परराष्ट्रमन्त्री खड्का 'साइडलाइन' भेटवार्तामा व्यस्त

खड्काद्वारा यूएनको शान्ति सेनातर्फ यूएन मुख्यालय र स्थलगत रुपमा नेपालको उच्च तहमा सहभागिता बढाउन आग्रह
जगदीश्वर पाण्डे

काठमाडौँ — संयुक्त राष्ट्रसंघ (यूएन) को ७६ औं महासभामा नेपाली प्रतिनिधि मण्डलको नेतृत्व गर्दै न्यूयोर्क पुगेका परराष्ट्रमन्त्री नारायण खड्का साइडलाइन भेटवार्तामा व्यस्त छन् । परराष्ट्रमन्त्री खड्काले शुक्रबार यूएनको ‘पिस अपरेशन विभाग’ का उपमहासचिव जिन–पियरे लाक्वा र कुवेतका परराष्ट्रमन्त्री शेख अहमद नासिर अल–मोहमद अलसवाहसँग भेटवार्ता गरे ।

मन्त्री खड्काले यूएनको शान्ति सेनातर्फ यूएन मुख्यालय र स्थलगत रुपमा नेपालको उच्च तहमा सहभागिता बढाउन आग्रह गरेका छन् । साइडलाइन भेटवार्ताको क्रममा उनले लाक्वालाई शान्ति मिसनमा नेपाली सुरक्षा संख्यालाई बढाउन पनि आग्रह गरेका थिए ।

न्यूयोर्कस्थित यूएनका लागि नेपालको स्थायी नियोगद्वारा जारी विज्ञप्तिअनुसार शुक्रबार मन्त्री खड्काले उक्त अवसरमा शान्ति सैनिक पठाउने सम्बन्धमा नेपाल र यूएनले सहकार्य गरेर अहिलेको अवस्थाभन्दा अझै बलियो बनाउँदै लानुपर्ने उल्लेख गरे ।

विश्वमा सबैभन्दा बढी शान्ति सैनिक पठाउने सूचीमा बंगलादेशपछि दोस्रो नम्बरमा नेपाल छ । नेपालले हरेक वर्ष करिब १० हजार शान्ति सैनिक पठाउँदै आएको छ । शान्ति मिसनमा नेपालले उत्कृष्ट काम गरे पनि बलियो कूटनीतिक लबिङ र पहुँचका कारण उच्च तहका पदहरुमा नेपाली सुरक्षा अधिकारीहरु पुग्न सकेका छैनन् । मन्त्री खड्काले नेपाली सुरक्षा अधिकारीहरुलाई पनि उच्च तहमा स्थान दिन पहल गरेका हुन् ।

अर्को साइडलाइन वार्तामा खड्काले कुवेतका परराष्ट्रमन्त्री अलसवाहसँग कुराकानी गरे । उक्त भेटमा दुबै मन्त्रीहरुले दुई मुलुकका साझा चासोबारे कुराकानी भएको विज्ञप्तिमा उल्लेख छ । वैदेशिक कामदारको सहयोगबाट व्यापार, पर्यटन र लगानीको भूमिका खेल्ने विषयमा पनि कुराकानी भएको थियो । दुबै मन्त्रीहरुले बाँकी रहेका सम्झौतालाई अघि बढाउनुको साथै नजिक रहेर उच्चस्तरीय भ्रमणको आदान–प्रदानसहित सहकार्य र समन्वयन गरेर काम गर्ने विषयमा सहमति भएको छ । मन्त्री खड्काले सोमबार नेपालको तर्फबाट ७६ औं महासभामा सम्बोधन गर्ने कार्यक्रम छ ।

प्रकाशित : आश्विन ९, २०७८ २०:०७
पूरा पढ्नुहोस्
प्रतिक्रिया
पठाउनुहोस्
×