फोटो पत्रकार क्लबको अध्यक्षमा श्रेष्ठ- समाचार - कान्तिपुर समाचार
कान्तिपुर वेबसाईट
AdvertisementAdvertisement

फोटो पत्रकार क्लबको अध्यक्षमा श्रेष्ठ

कान्तिपुर संवाददाता

काठमाडौँ — नेपालका विभिन्न छापा सञ्चार माध्यममा कार्यरत फोटो पत्रकारहरुको छाता संगठन फोटो पत्रकार क्लबको अध्यक्षमा श्रुति श्रेष्ठ चयन भएकी छन् । 

शनिबार भएको ११ औं साधारणसभाबाट श्रेष्ठको नेतृत्वमा १२ सदस्यीय नयाँ कार्यसमिति चयन भएको हो । कार्यसमितिको उपाध्यक्षमा दिपेश श्रेष्ठ, महासचिवमा प्रकाशचन्द्र तिमिल्सेना, सचिवमा अमूल थापा र कोषाध्यक्षमा द्वारिकाप्रसाद काफ्ले निर्विरोध भएका छन् । विकास द्धारेले प्रवक्ताको जिम्मेवारी पाएका छन् ।

यस्तै सदस्यहरुमा अंगद ढकाल, निशा भण्डारी, बर्षा शाह, स्कन्द गौतम, दिपेन श्रेष्ठ र लक्ष्मीप्रसाद ङाखुशी चयन भएका छन् । नवनिर्वाचित पदाधिकारीहरुलाई शनिबार नै एक समारोहका बीच निर्वाचन समिति संयोजक एवं अधिवक्ता निरन्जन राजवंशी, फोटो पत्रकारहरु नरेन्द्र श्रेष्ठ, किरण पाण्डे, भास्वर ओझा तथा क्लबका पूर्वअध्यक्ष प्रकाश माथेमा, पूर्वकार्यवहाक अध्यक्ष केशवराज थोकरले प्रमाणपत्र प्रदान गरे ।

नेपाल पत्रकार महासंघका वरिष्ठ उपाध्यक्ष रमेश विष्टको प्रमुख आतिथ्यमा भएको अधिवेशनमा एशोसियट प्रदेशका महासचिव रोयल आचार्य, क्लबका पूर्वअध्यक्ष तथा पत्रकार महासंघका केन्द्रीय सदस्य विकास कार्की र पूर्वअध्यक्ष प्रकाश माथेमाको उपस्थिति थियो ।

क्लबले प्रेस तथा अभिव्यक्ति स्वतन्त्रता रक्षा र श्रमजीवी पत्रकारहरुको हकहितका लागि अझै सक्रिय भूमिका निभाउँदै पत्रकार महासंघको हरेक गतिविधिमा सक्रिय सहभागिता जनाउँदै पैरवी गर्ने निर्णय साधरणसभाले गरेको छ । यस्तै फोटो पत्रकारहरुको क्षमता अभिवृद्धिका लागि पनि विभिन्न कार्य गर्ने निर्णय भएको क्लबले विज्ञप्तिमार्फत जनाएको छ ।

नयाँ कार्यसमितिको बैठकले निवर्तमान कार्यसमितिका सबै पदाधिकारी तथा सदस्यलाई संस्थालाई पुर्‍याएको योगदानका लागि विशेष धन्यवाद ज्ञापन गरेको प्रवक्ता विकास द्धारेले जनाए ।

प्रकाशित : आश्विन ९, २०७८ १७:४३
प्रतिक्रिया
पठाउनुहोस्

नेकपा (एस)मा भरतमोहनकी छोरी, भन्छिन्- 'समाजका लागि योगदान गर्छु'

कान्तिपुर संवाददाता

काठमाडौँ — वामपन्थी आन्दोलनका दिवंगत नेता भरतमोहन अधिकारीकी छोरी लीमा अधिकारी माधवकुमार नेपाल नेतृत्वको नेकपा (एकीकृत समाजवादी)मा लागेकी छन् ।

लीमालाई नेकपा (एस)को वाग्मती प्रदेश कमिटी सदस्यका साथै अखिल नेपाल महिला संघको केन्द्रीय पदाधिकारी र संघकै अर्थ विभाग प्रमुखको जिम्मेवारी दिइएको छ । पार्टीमा विवाद उत्पन्न भएपछि केही समय सक्रिय राजनीतिमा नरहेको बताउने लीमाले आगामी दिनमा एकीकृत समाजवादी पार्टीबाट मुलुक र समाजका लागि योगदान गर्ने योजना रहेको जानकारी दिइन् ।

नेकपा (एस)मा लागेको बताउँदै उनले भनिन्, 'म १८ वर्षदेखि नेकपा (एमाले)को संगठित सदस्य थिए । अनेमसंघमा पनि थिए । बीचमा पार्टीको राजनीति ठीक नभएकाले निक्रिय रहेर आफ्नो व्यवसाय नै गर्न लागेको थिए । अहिले एकीकृत समाजवादीको वाग्मती प्रदेश कमिटी सदस्य, अनेमसंघको केन्द्रीय सदस्य र आर्थिक विभागको पनि जिम्मेवारी दिइएको छ ।'

पूर्वप्रधानमन्त्री मनमोहन अधिकारी र पूर्वअर्थमन्त्री भरतमोहन अधिकारीको लिगेसीलाई अगाडि बढाउन आफू सक्षम रहेको बताउँदै लीमाले भनिन्, 'मेरो ठूलो बुबा मनमोहन अधिकारी, बुबा भरतमोहन अधिकारीले छोडेको राजनीतिक लिगेसी र उहाँहरूले देश र समाजका लागि जीवनभर निष्ठापूर्वक गर्नुभएको योगदानलाई अगाडि बढाउँछु ।'

एमाले सिद्धान्त र विधिबाट चल्न छोडेपछि राजनीतिबाट निस्क्रिय बनेको बताउने लिमाले एकीकृत समाजवादी संगठित रुपमा अगाडि बढ्ने भएकाले आफू पनि समाहित भएको बताइन् । 'जुन पार्टी सिद्धान्त, विधि र पद्धतिबाट चल्छ त्यो पार्टीलाई हामी युवाहरूले पनि प छ्याउने हो । कम्युनिस्ट आचरण बोकेका नेताले जुन पार्टी हाँकेको छ त्यस्तो पार्टीलाई पछ्याउने हो ।'

एकीकृत समाजवादीले युवा र महिलालाई नेतृत्वमा भूमिका दिने भएकाले पनि आफू त्यसमा लागेको उनले बताइन् । 'एकीकृत समाजवादी पार्टीमा युवाहरूको आकर्षण छ । केन्द्रीय कमिटीमा युवा र महिलाको ठूलो हिस्सा छ । पार्टीले भोलिका दिनमा युवा र महिलालाई नेतृत्वमा ल्याउने भनेर नेतृत्वले भन्नुभएको छ,' नेकपा (एस) रोज्नुको कारणबारे उनले भनिन् ।

लीमा भरतमोहन अधिकारी स्मृति प्रतिष्ठानमार्फत ज्येष्ठ नागरिकका क्षेत्रमा संलग्न छन् । त्यस्तै, उनी नेपाल चेम्बर अफ कमर्सअन्तर्गतको महिला चेम्बरको महासचिव समेत हुन् ।

प्रकाशित : आश्विन ९, २०७८ १७:४१
पूरा पढ्नुहोस्
प्रतिक्रिया
पठाउनुहोस्
×