प्रधानमन्त्री देउवा हामीले बनाएको घरमा सर्दै हुनुहुन्छ: ओली - समाचार - कान्तिपुर समाचार
कान्तिपुर वेबसाईट
AdvertisementAdvertisement

प्रधानमन्त्री देउवा हामीले बनाएको घरमा सर्दै हुनुहुन्छ: ओली 

कान्तिपुर संवाददाता

काठमाडौँ — प्रमुख प्रतिपक्ष ‌एमाले अध्यक्ष केपी शर्मा ओलीले आफ्नो कार्यकालमा भएका कामको उद्घाटन गर्न लागेको बताएका छन् । काठमाडौंमा बिहीबार आयोजित कार्यक्रममा ओलीले आफ्नो कार्यकालमा बनेको प्रधानमन्त्री निवासमा प्रधानमन्त्री देउवा सर्न लागेको बताए ।  

'प्रधानमन्त्री देउवा हामीले बनाएको घरमा सर्दै हुनुहुन्छ । मलाई खुसी लाग्छ उहाँले रिबन काट्नुहुनेछ, बत्ती बाल्नुहुनेछ । घर हामीले बनायौं उहाँले बत्ती बाल्ने र रिबन काट्नुहुनेछ,' ओलीले भने, 'प्लग हामीले बनायौं स्वीच उहाँले थिच्नुहुनेछ ।'

बालुवाटारमा नयाँ प्रधानमन्त्री निवास बनिरहेको छ । प्रधानमन्त्री निवास निर्माण अन्तिम चरणमा पुगेको छ । सोही विषयलाई लिएर ओलीले अभिव्यक्ति दिएका हुन् ।

आफू नेतृत्वको सरकारले व्यापक काम गरेको देखि नसकेर हटाएको ओलीको भनाइ थियो । 'सही नसक्नुभएको यहीँ हो, एमाले दुई वर्ष सरकारमा रहेको भए उहाँहरूको राजनीतिक सटर बन्द हुन्थ्यो । त्यसै कारण हटाउनुपर्‍यो ।'

ओलीले राम्रा काम गरिरहेका राजदूत फिर्ता गरेको भन्दै सरकारको आलोचना गरेका छन् । उनले ११ राजदूत पहिल्यै नियुक्त हुन नदिएको र बाँकी राम्रो काम गरिरहेका राजदूतलाई पनि फिर्ता बोलाएर सही निर्णय नगरेको भनाइ राखे ।

प्रकाशित : आश्विन ७, २०७८ १७:१७
प्रतिक्रिया
पठाउनुहोस्

खप्तड निकुञ्जबाट दुई सिकारी पक्राउ

वसन्तप्रताप सिंह

बझाङ — खप्तड राष्ट्रिय निकुञ्जभित्र चोरी सिकारमा संलग्न भएको आरोपमा दुई जना पक्राउ परेका छन् ।

पक्राउ पर्नेहरूमा बझाङको खप्तड छान्ना गाउँपालिका वडा नं–१ का ५९ वर्षीय दिलबहादुर जेठारा र ३५ वर्षीय वीरेन्द्रबहादुर कार्की रहेका छन् । उनीहरुलाई निकुञ्जको सुरक्षार्थ खटिएको नेपाली सेना तथा निकुञ्जका कर्मचारीको टोलीले पक्राउ गरेको हो ।

पक्राउ परेकाहरूबाट एक थान भरुवा बन्दुक, बन्दुकमा लाग्ने पाँच थान गोली, बारुद दुई डिब्बा तथा बन्दुकको केप एक डिब्बा बरामद गरेको खप्तड राष्ट्रिय निकुञ्जका खरिदार बर्क सुनारले जानकारी दिए । उनीहरूलाई खप्तड राष्ट्रिय निकुञ्जको पौवागढी भन्ने ठाउँबाट पक्राउ गरिएको हो । पक्राउ परेकाको बयान लिने काम भइरहेको बताउँदै उनले आवश्यक कानुनी कारबाहीका लागि जिल्ला न्यायधिवक्ताको कार्यालयमार्फत अभियोग दर्ता गरिने उनले बताए ।

प्रकाशित : आश्विन ७, २०७८ १७:०६
पूरा पढ्नुहोस्
प्रतिक्रिया
पठाउनुहोस्
×