राष्ट्रिय सभा : संसद् अवरोध गरिरहेको एमालेले मत विभाजनमा भाग लियो - समाचार - कान्तिपुर समाचार

राष्ट्रिय सभा : संसद् अवरोध गरिरहेको एमालेले मत विभाजनमा भाग लियो 

कान्तिपुर संवाददाता

काठमाडौँ — संसद् अवरोध गरिरहेको प्रमुख प्रतिपक्ष एमाले विनियोजन विधेयकमाथिको मत विभाजनमा भाग लिएको छ । राष्ट्रिय सभाको मंगलबारको बैठकमा विनियोजन विधेयकमाथि विचार गरियोस् भन्ने प्रस्ताव निर्णयार्थ प्रस्तुत गर्ने क्रममा गरिएको मत विभाजनमा एमालेले भाग लिएको हो ।

राष्ट्रिय सभाका अध्यक्ष गणेशप्रसाद तिमिल्सिनाले मंगलबार सभाको दोस्रो बैठकमा अर्थमन्त्री जनार्दन शर्माले प्रतिनिधिसभाका पास भइ सन्देशसहित पेस गरेको विनियोजन विधेयक, २०७८ माथि विचार गरियोस् भन्ने प्रस्ताव निर्णयार्थ प्रस्तुत गरेका थिए । निर्णयार्थ प्रस्तुत भएको उक्त प्रस्तावको पक्षमा सत्तारुढ दलका सांसदहरूले मत जाहेर गरेका थिए ।

एमालेबाट निर्वाचित माधवकुमार नेपालसहित १४ सांसदलाई पार्टीले कारबाही गरेको र सभामुख अग्निप्रसाद सापकोटाले पदमुक्त भएको सूचना टाँस नगरेको भन्दै राष्ट्रिय सभाको दशौं अधिवेशनको पहिलो दिन भदौ २३ गतेदेखि संसद् एमालेले संसद् अवरुद्ध गरिरहेको छ ।

सोही विषयलाई लिएर एमालेले राष्ट्रियसभामा सभामुख सापकोटाको राजीनामा मागसमेत गरेको थियो । संसद्का कुनै पनि प्रक्रियामा भाग नलिइरहेको र कारबाही अगाडि नबढाउन भनिरहेको अवस्थामा चलेको संसद्‌मा एमालेले मतविभाजनमा भाग लिएको हो ।

राष्ट्रिय सभा अध्यक्षले प्रतिनिधिसभाबाट सन्देशसहित प्राप्त विनियोजन विधेयक, २०७८ माथि विचार गरियोस् भन्ने प्रस्ताव निर्णयार्थ प्रस्तुत गर्दा विपक्षमा हुने सांसदहरूले ‘हुन्न’ र पक्षमा हुने सांसदहरूले ‘हुन्छ’ भन्न निर्देशन दिएका थिए ।

जसमा एमालेका सांसदले ‘हुन्न’ भन्दै हात उठाएका हुन् । त्यसमा अग्रसरता राष्ट्रिय सभामा प्रतिपक्षी दल एमालेका मुख्य सचेतक खिमलाल भट्टराईले सुरुमा हात उठाएर ‘हुन्न’ भनेका थिए । त्यसपछि अरु सांसदहरूले पनि हुन्न भन्दै हात उठाएका थिए ।

भट्टराईले प्रतिपक्षमा अभ्यस्त भइनसकेकाले भूलवस संसद्को प्रक्रियामा भाग लिन पुगिएको बताए । उनले भने, ‘मत विभाजनमा भाग लिने योजना थिएन । तर ‘हुन्न’ भनियो ।’

यस्तो किन हुन गयो भन्नेबारे भट्टराईको भनाइ थियो, ‘हामी लामो समयसम्म प्रतिपक्षको भूमिकामा थिएनौं । अलि थाहा छैन नि त । बाइमिस्टेक भयो ।’

‘हुन्छ’ र ’हुन्न’ भन्ने संसदीय प्रक्रियामा भाग लिँदै आएको तर आफैले विरोध गरिरहेको अवस्थामा भाग लिन हुन्न भन्ने थाहा नभएको उनले बताए । उनले थपे, ‘प्रतिपक्षमा अभ्यस्त भइसकिएको छैन नि त !’

एमालेले विपक्षमा मत जाहेर गरे पनि राष्ट्रिय सभाबाट विनियोजन विधेयकमाथि विचार गरियोस् भन्ने प्रस्ताव पारित भएको छ । राष्ट्रिय सभाको अर्को बैठक असोज ७ गते २ बजेका लागि आह्वान गरिएको छ ।

प्रकाशित : आश्विन ५, २०७८ १५:१२
प्रतिक्रिया
पठाउनुहोस्

कांग्रेसको अबको लक्ष्य तीनै तहको निर्वाचन जित्‍ने हो : सहमहामन्त्री महत

रासस

काठमाडौँ — नेपाली कांग्रेसका सहमहामन्त्री डा. प्रकाशशरण महतले पार्टीको अबको लक्ष्य आगामी तीनै तहको निर्वाचन जित्ने रहेको बताएका छन् । कांग्रेसले तीनै तहको निर्वाचन जित्न पार्टीको आगामी १४औँ महाधिवेशनको ठूलो भूमिका रहने उनले उल्लेख गरे ।

कांग्रेस काठमाडौं महानगरपालिका–४ र ५ द्वारा आयोजित छुट्टाछुट्टै वडा अधिवेशनको मंगलबार उद्घाटन समारोहमा सहमहामन्त्री महतले कांग्रेसको मुख्य लक्ष्य नै आगामी आम निर्वाचन जित्ने रहेको स्पष्ट पारे । निर्वाचन जित्ने ढंगले संगठन निर्माणमा लाग्नुपर्नेमा जोड दिँदै उनले त्यसमा क्रियाशील सदस्यको अहम भूमिका रहने बताए । पार्टीको आदर्श, सिद्धान्त, नीति र अनुशासनमा रही निरन्तर क्रियाशील रहन उनले सबैमा आग्रह गरे ।

“पार्टीमा समय दिनसक्ने, संगठन विस्तार गर्नसक्ने र मतदातालाई आकर्षित गर्नसक्ने कार्यकर्ताको खाँचो छ, सक्रिय सदस्य बन्नुभएका पार्टी कार्यकर्तालाई वडादेखि राष्ट्रिय तहसम्म पार्टीले सुम्पिएका जिम्मेवारी पूरा गरी पार्टीलाई जनतासँग जोड्ने प्रयासमा लाग्नुस्,” नेता महतले भने । कांग्रेसको नेतृत्वमा बनेको वर्तमान संविधानको भावना र मर्मअनुरुप एक तिहाइ स्थानमा महिला निर्वाचित गर्ने कामको थालनी भएको उनको भनाइ थियो ।

दुई तिहाइको सरकार राज्य सञ्चालनमा असफल भएपछि अप्ठ्यारो अवस्थामा कांग्रेसको नेतृत्वमा संयुक्त सरकार बनेको स्पष्ट पार्दै नेता महतले प्रतिकूलतासँग जुध्दै सरकार सम्पूर्ण नागरिकलाई खोप दिएर सुरक्षाको प्रत्याभूति दिलाउन लागि परेको बताए । कांग्रेसका संस्थापक नेता बिपी कोइराला, गणेशमान सिंह र कृष्णप्रसाद भट्टराईले सोचेजस्तो नेपाली जनताको सेवा गर्दै समृद्ध र स्वाभिमानी बनाउने जिम्मेवारी पूरा गर्न पार्टीको १४औँ महाधिवेशनले महत्वपूर्ण योगदान पुर्याउने नेता महतले बताए ।

प्रकाशित : आश्विन ५, २०७८ १५:०३
पूरा पढ्नुहोस्
प्रतिक्रिया
पठाउनुहोस्
×