काम बाँकी छँदै कार्यालय खारेज- समाचार - कान्तिपुर समाचार
कान्तिपुर वेबसाईट
AdvertisementAdvertisement

काम बाँकी छँदै कार्यालय खारेज

पुनर्निर्माण प्राधिकरणका ३ कार्यालय खारेज हुँदा बाँकी अनुदान रकम नपाउने चिन्तामा भूकम्पपीडित
आश गुरुङ

लमजुङ — वैशाखमै घर पुनर्निर्माण सके । तर प्रमाणीकरण गर्ने इन्जिनियर साउनमा मात्रै आए । तेस्रो किस्ताको प्रतीक्षामा रहेका दूधपोखरी गाउँपालिका–३ सानोकाभ्रेका भूकम्पपीडित नारायण गुरुङ अहिले राष्ट्रिय पुनर्निर्माण प्राधिकरणका ३ वटा जिल्ला कार्यालय नै खारेज भएपछि छटपटीमा छन् ।

‘पहिले वैशाखमा घर बनाइसक्नुपर्छ, जेठमा पैसा पाइन्छ भने । त्यहीअनुसार घर बनायौं । त्यसपछि असारमा इन्जिनियर आउँछ र कात्तिकसम्म पैसा पाउँछ भने,’ उनले भने, ‘बल्लतल्ल साउनको दोस्रो साता इन्जिनियर आए । अहिले त कार्यालय नै खारेज भयो भन्ने सुन्छु । अब के गर्ने ?’ उनका अनुसार सानोकाभ्रेका मात्रै ८५ परिवारले तेस्रो किस्ताको रकम पाउन बाँकी छ । धेरैले ऋण गरेर घर बनाएका छन् ।

दूधपोखरी–१ गैरीगाउँका इसनलाल गुरुङ पनि अनुदान दिने कार्यालय नै खारेजीमा परेपछि चिन्तामा छन् । ‘घर त जसोतसो बनाइयो । अब तेस्रो किस्ता लिने बेलामा कार्यालय नै छैन भन्छन् । अब कहाँ गएर कसलाई भन्ने ?,’ उनले दुखेसो पोखे । गैरीगाउँका मात्रै १५ घरपरिवारले तेस्रो किस्ताको रकम पाएका छैनन् ।

लमजुङमा घर पुनर्निर्माण गर्दै गरेका ४ हजार १ सय ८३ जना लाभग्राही छन् । पुनर्निर्माणका कामहरू नसकिँदै प्राधिकरणको जिल्ला इकाइ कार्यालय खारेज भएपछि दोस्रो र तेस्रो किस्ता लिन बाँकी भूकम्पपीडित थप समस्यामा परेका हुन् । उक्त कार्यालयले घर पुनर्निर्माणतर्फका लाभग्राहीलाई किस्ता रकमको व्यवस्थापन गर्दै आएको थियो । आर्थिक वर्षको सुरुवातदेखि अनुदान रकम नपाएका लाभग्राही अहिले कार्यालय नै खारेजीमा परेपछि पैसा नै नपाइने हो कि भन्ने चिन्तामा छन् । यसबाहेक जिल्ला आयोजना कार्यान्वयन इकाइ (भवन) र जिल्ला आयोजना कार्यान्वयन इकाइ (शिक्षा) कार्यालय पनि खारेजीमा परेका छन् । भवन कार्यालयले पुनर्निर्माणका लागि इन्जिनियरको व्यवस्थापन र शिक्षाले भूकम्पबाट भत्किएका विद्यालयको पुनर्निर्माण गर्दै आएको थियो ।

प्रमुख जिल्ला अधिकारी होमप्रसाद लुइँटेलका अनुसार अनुदान तथा व्यवस्थापन गर्न नयाँ खुल्ने सहरी विकास तथा भवन निर्माण विभाग जिल्ला कार्यान्वयन इकाइ (भवन र आवास) लाई जिम्मा दिइएको छ । पोखरास्थित संघीय आयोजना कार्यान्वयन इकाइले उक्त २ वटा कार्यालयको काम हेर्नेछ । लमजुङमा कार्यालय हेर्ने गरी एक जना स्थायी इन्जिनियर तोकिएको छ । शिक्षाको काम शिक्षा विकास तथा समन्वय इकाइले हेर्नेछ । यी कार्यालयका प्रमुख गत साता नै पुनर्निर्माण प्राधिकरण तानिइसकेका छन् । यी कार्यालय आव २०७४/७५ पछि खुलेका थिए ।

प्राधिकरणले अनुदान तथा व्यवस्थापन र शिक्षा कार्यालयमा प्रायः स्थायी कर्मचारी खटाएको थियो । भवनमा धेरै कर्मचारी करारमा लिएको थियो । अनुदान तथा व्यवस्थापन कार्यालयका प्रमुख इन्जिनियर सूर्यप्रसाद शर्मा र शिक्षाका प्रमुख इन्जिनियर अशोक पराजुली प्राधिकरण फर्केका छन् । भवनका कार्यालय प्रमुख शितलबाबु लोहनीलाई भने करारमा राखिएको थियो । ‘हामी ४५ जना बढी इन्जिनियर प्राविधिक थियौं । साउनदेखि म्याद थप भएन । यसले भूकम्पपीडित लाभग्राहीलाई निकै अप्ठ्यारो परेको छ,’ लोहनीले भने, ‘अहिले पनि हामीलाई फोन गरिरहेका छन् । इन्जिनियर र प्राविधिक साथीहरू फर्किसक्नुभएको छ । अब हामीले के गर्ने ?’

लमजुङमा घर निर्माण सकिएका कतिपयले तेस्रो किस्ता पाएका छैनन् । १५ हजार ५ सय ७६ लाभग्राहीमध्ये १४ हजार ६ सय २७ जनाले मात्रै पहिलो किस्ता लिएका छन् । यीमध्ये २४ जनाले पहिलो किस्ता फिर्ता गरेका थिए ।

प्रकाशित : आश्विन ४, २०७८ १२:३३
प्रतिक्रिया
पठाउनुहोस्

हाम्रो पार्टी बिस्तारै बिस्तारै एमालेकरण भइरहेको छ : दाहाल

‘जनताको चाहनाअनुसार नचल्ने हो भने पार्टी चलाएर के काम ?’
कान्तिपुर संवाददाता

काठमाडौँ — नेकपा (माओवादी केन्द्र) का अध्यक्ष पुष्पकमल दाहालले आफ्नो पार्टी बिस्तारै एमालेकरण हुँदै गएको हो कि भन्ने चिन्ता बढेको बताएका छन् । सोमबार सूर्यनाथ राम यादवको स्मृतिमा आयोजित कार्यक्रममा बोल्दै अध्यक्ष दाहालले आफ्नो पार्टीमा बिस्तारै एमालेकरण हुँदै गएको हो कि भन्ने चिन्ता भएको बताएका हुन् ।

नेकपा माओवादी केन्द्रका नेतामा पनि बिस्तारै बिस्तारै व्यवहारमा एमालेको नेताको जस्तै व्यवहार देखिन थालेकाले चिन्ता बढाएको उनको भनाइ थियो । उनले समाजको विकास र न्यायका निम्ति पनि पार्टी र आफूहरुमा रुपान्तरण देखिनुपर्ने बताए ।

अध्यक्ष दाहालले नेकपा एमालेका अध्यक्ष केपी शर्मा ओलीको निरंकुशता थाहा पाए पनि केही साथीहरुले आफूलाई आत्मसमर्पण गरेको आरोप लगाएको बताए । नेकपा एमालेले मदन भण्डारी र एमालेको लोगो भएपछि एमाले भनिरहेको भन्दै एमालेको कुनै सिद्धान्त नरहेको उनको आरोप थियो ।

थोरै मिहेनत गरे नेकपा माओवादी केन्द्र अबको चुनावमा पहिलो नम्बरमा आउन सक्ने उनको दाबी थियो । माओवादी केन्द्रले मात्रै साँचो अर्थमा समाजवादी क्रान्तिको रणनीतिमा देशलाई अघि बढाउन सक्ने उनको भनाइ थियो ।

‘समाजवादी क्रान्ति अघि बढाउनका लागि विकास समृद्धिको यात्रा हुँदै न्यायसहितको एउटा नयाँ समाज निर्माणको निम्ति हाम्रो पार्टीले आफूलाई रुपान्तरण गर्नैपर्छ, हाम्रो पार्टी बिस्तारै बिस्तारै एमालेकरण हुनथाल्यो, यस्तै भइरहने हो भने मैले भनिसकेको छु पार्टी छ नभने हुन्छ, मैले पार्टी सकिदिने भन्न खोजेको होइन,’ उनले भने, ‘जनताको चाहनाअनुसार नचल्ने हो भने यस्तो सिद्धान्तहीन पार्टी चलाएर के काम भन्न खोजेको हो, तर यो पनि मैले भनिरहेको छु कि नेकपा माओवादीले नै जनता र समाज साथै समाजवादी क्रान्तिको रणनीतिमा आफूलाई अघि बढाउँछ, नेकपा माओवादी नाम त छ, विज्ञापन जस्तो तर जनयुद्ध लड्ने योद्धाहरु भनेर चिनिनु पर्ने ठाउँमा चिनिदैनन्, नाम छ, तर काम हेर्दा जनताले छुट्याउन सक्दैनन्, को कांग्रेस को माओवादी, को एमाले ? त्यसैले हामीले थोरै मिहेनत गर्‍यौँ भने अब आउँदो चुनावमा एक नम्बर हुने सम्भावना छ ।’

अध्यक्ष दाहालले अब फेरि एकपटक सम्पूर्ण कम्युनिस्टहरुले सोच्नुपर्ने बेला आएको बताए ।

प्रकाशित : आश्विन ४, २०७८ १२:३२
पूरा पढ्नुहोस्
प्रतिक्रिया
पठाउनुहोस्
×