अफगानिस्तानमा अलपत्र ३४ नेपालीलाई शनिबार स्वदेश ल्याइने- समाचार - कान्तिपुर समाचार
कान्तिपुर वेबसाईट
AdvertisementAdvertisement

अफगानिस्तानमा अलपत्र ३४ नेपालीलाई शनिबार स्वदेश ल्याइने

कान्तिपुर संवाददाता

काठमाडौँ — अफगानिस्तानमा अलपत्र ३४ नेपालीलाई शनिबार उद्धार गरेर स्वदेश ल्याइने भएको छ । अफगानिस्तानको अवस्था अझै सहज नभएपछि त्यहाँ रहेका बाँकी नेपालीलाई ल्याउन लागिएको हो । गैरकानुनी रूपमा अफगानिस्तान छिरेकाले उनीहरूसँग आवश्यक कागजपत्रसमेत छैन । उनीहरूलाई फर्काउन नयाँदिल्लीस्थित नेपाली दूतावासले समन्वय गरिरहेको छ ।

दिल्लीस्थित नेपाली दूतावासका उपनियोग प्रमुख रामप्रसाद सुवेदीका अनुसार नेपाली टोलीले शनिबार बिहान १० बजे काबुल छाड्नेछ । आफगानिस्तानबाट उड्ने चार्टर विमानमा संयुक्त राष्ट्रसंघ (यूएन) र युनिसेफमा काम गरिरहेका करिब एक सय नेपाली पनि सँगै आउने उनले प्रस्ट पारे । अलपत्र नेपालीलाई काबुलमा यूएनको सहयोगमा सुरक्षित रूपमा राखिएको छ ।

अमेरिकी सेनाले २० वर्षपछि अगस्ट ३० मा अफगानिस्तान छाडेपछि त्यहाँ नेपालीसहित विदेशी नागरिकको सुरक्षालाई लिएर प्रश्न उठिरहेको छ । सरकारले अफगानिस्तानमा करिब १५ सय नेपाली रहेको अनुमान गरेको थियो । तर, हाल करिब एक हजार नेपाली रहेको देखिन्छ । परराष्ट्र मन्त्रालयका अनुसार हालसम्म ९ सय ४० नेपालीको उद्धार भइसकेको छ । यसबाहेक अफगानिस्तानमा अलपत्र परेका थप नेपाली भने हालसम्म भेटिएका छैनन् ।

दिल्ली दूतावासले यसअघि अफगानिस्तानमा रहेका नेपाली खोज्न त्यहीं रहेका नेपालीलाई नै जिम्मेवारी दिएको थियो । जसले गर्दा दूतावासलाई त्यहाँ रहेका सम्पूर्ण नेपालीको अवस्थाबारे थाहा पाउन सहज भएको थियो । दिल्लीस्थित नेपाली दूतावासले अफगानिस्तानलाई समेत हेर्ने भए पनि कूटनीतिक कर्मचारीले काबुल नटेकेको करिब ४ वर्ष भइसकेको छ ।


प्रकाशित : आश्विन १, २०७८ २१:३९
प्रतिक्रिया
पठाउनुहोस्

एमालेको सहयोगबिना एमसीसी संसद्‌बाट अनुमोदन गर्न ज्ञवालीको चुनौती

कान्तिपुर संवाददाता

काठमाडौँ — एमालेका प्रवक्ता प्रदीप ज्ञवालीले आफूहरुको सहयोगबिना संसद्‌बाट एमसीसी पास गर्न चुनौती दिएका छन् । काठमाडौंमा शुक्रबार आयोजित ‘नयाँ सरकारको कूटनीतिक अभिमुखीकरण : सम्भाव्य विश्लेषण’ विचार गोष्ठीमा बोल्दै नेता ज्ञवालीले वर्तमान सरकारसँग बहुमत रहेकाले प्रतिपक्षी दलको सहयोगबिना एमसीसी संसद्‌बाट पास गर्न चुनौती दिएका हुन् ।

फाइल तस्बिर

विगतमा एमाले नेतृत्वको सरकारले एमसीसी पास गर्न खोज्दा वर्तमान सत्ता गठबन्धनकै दलहरुले सडकमा आगो बालेको भन्दै सम्झौता गलत भए किन सम्झौता गरेको भन्ने उनले प्रश्नत गरे । एमाले स्थायी कमिटी सदस्य रहेका ज्ञवालीले सम्झौता सही थियो भने संसद्‍बाट पास गर्न किन रोकिएको हो भन्ने प्रश्न पनि गरे ।

नेता ज्ञवालीले एमसीसीलाई आन्तरिक राजनीतिको किचलोको विषय बनाउनु नहुने बताए । यसले छिमेकी राष्ट्रहरुमा देशको विश्वसनीयतालाई कमजोर गराउने उनको तर्क छ । उनले सरकारले लिपुलेक, लिम्पियाधुरा र कालापानीलाई समस्याको रुपमा लिएको भन्दै सीमा समस्या नै नभएको चिनसँग भने सीमा समस्या देखाएर सम्बन्धमा चिसोपन निम्त्याउने काम गरेको बताए ।

एमसीसी पास गर्न प्रतिपक्षको सहयोग मागेको भन्दै उनले अब सरकारले संसद्‌मा प्रस्ताव ल्याएपछि मात्रै आफूहरुको धारणा सार्वजनिक गर्ने स्पष्ट पारे ।

प्रकाशित : आश्विन १, २०७८ १९:३३
पूरा पढ्नुहोस्
प्रतिक्रिया
पठाउनुहोस्
×