संखुवासभा सामूहिक हत्याकाण्ड :  मृतकको मोबाइल आरोपितको घरमा- समाचार - कान्तिपुर समाचार
कान्तिपुर वेबसाईट
AdvertisementAdvertisement

संखुवासभा सामूहिक हत्याकाण्ड :  मृतकको मोबाइल आरोपितको घरमा

आरोपित लोकबहादुरका भाइमाथि प्रहरीको निगरानी
दीपेन्द्र शाक्य

संखुवासभा — मादी नगरपालिका–१ खोला गाउँमा एकै परिवारका ६ जनाको हत्या घटनामा हराइरहेको मृतक रञ्जना कार्कीको मोबाइल प्रहरीले फेला पारेको छ । हत्या आरोपमा पक्राउ परेका लोकबहादुर कार्कीको घरबाट बिहीबार मोबाइल भेटिएको हो ।

मोबाइल लोकबहादुर या अन्यले लुकाएको बारे अनुसन्धान थालिएको डीएसपी लालध्वज सुवेदीले बताए । ‘अभियुक्तको घरबाटै मोबाइल फेला परेपछि यसलाई अर्को प्रमाणको रूपमा लिएर अनुसन्धान गरिरहेका छौं,’ उनले भने । फोन बरामद भएपछि लोकबहादुरका भाइ नरेशलाई शंकाको घेरामा राखी सोधपुछ गरिएको उनले बताए । ‘हत्यामा नरेशको पनि संलग्नता भए/नभएको बारे खुलिसकेको छैन,’ उनले भने, ‘अहिले पक्राउ वा नियन्त्रणमा लिइसकेको अवस्था होइन ।’

कार्की परिवारकी बुहारी रञ्जनाको मोबाइल घटना भएको बिहानदेखि हराएको थियो । स्विच अफ भएकाले फाल्न सकिने सम्भावित ठाउँमा पनि प्रहरीले खोजी गरेको थियो । प्रहरीले लोकबहादुरलाई मुख्य अभियुक्तको रूपमा सार्वजनिक गरिसकेको छ । उनले हत्या गर्दा लगाएको कपडा पनि प्रहरीले बरामद गरेको छ । हत्या गर्न चिर्पट प्रयोग गरेको उनले स्विकारेको प्रहरीको भनाइ छ । घटनास्थलमा प्रहरी निरीक्षक योगराज खतिवडाको नेतृत्वमा १० जना प्रहरी अनुसन्धानमा खटिएका छन् ।

सोमबार बिहान तेजबहादुर कार्की, उनकी आमा पार्वता, श्रीमती मनमाया, बुहारी रञ्जना, नाति दीपक र नातिनी गोमाको शव फेला परेको थियो । अनुसन्धानका लागि प्रदेश १ प्रहरी कार्यालयका प्रमुख प्रहरी नायब महानिरीक्षक अरूणकुमार बीसी, संघीय प्रहरी कार्यालय धरानबाट प्रहरी उपरीक्षक भीम दाहाल, केन्द्रीय अनुसन्धान ब्युरोबाट प्रहरी नायब उपरीक्षक रुगम कुँवर, जिल्ला प्रहरी कार्यालय संखुवासभाका प्रहरी नायब उपरीक्षक लालध्वज सुवेदीको टोली घटनास्थल पुगेको थियो ।

प्रकाशित : आश्विन १, २०७८ ०७:३७
प्रतिक्रिया
पठाउनुहोस्

संखुवासभा हत्याकाण्ड : अनुसन्धान जारी रहेको प्रहरीको भनाइ

दीपेन्द्र शाक्य

संखुवासभा — मादी नगरपालिका-१ खोला गााउँमा एकै परिवारको ६ जनाको सामूहिक हत्याको आशंकामा प्रहरीले एकजना बाहेक अन्यलाई पक्राउ नगरेको प्रष्ट्याएको छ । बिहीबार जिल्ला प्रहरी कार्यालय संखुवासभाले प्रेस विज्ञप्ति जारी गर्दै घटनास्थलमा अनुसन्धान भइरहेको जनाएको छ । 

प्रहरीका अनुसार घटनास्थलमा प्रहरी निरीक्षक योगराज खतिवडाको नेतृत्वमा १० जना प्रहरी अनुसन्धानमा खटिएका छन् । बुधबार विभिन्न अनलाइन सञ्चारमाध्याममा हत्यामा संलग्न थप पक्राउ भन्ने समाचार आएपछि प्रहरीले उक्त समाचार झुटो भएको दाबी गरेको छ । उसले सत्यतथ्य बुझेरमात्र समाचार लेख्न आग्रह गरेको छ । प्रहरीले घटनास्थलमा खानतलासी, सोधपुछ र प्रमाणलगायतका काम गरिरहेको जनाएको छ ।

हत्याको आोपमा गत आइतबार प्रहरीले २५ वर्षीय लोकबहादुर कार्कीलाई पक्राउ गरेर सार्वजनिक गरिसकेको छ । कार्कीमाथि मादी नगरपालिका–१ स्थित तेजबहादुर कार्कीसहित एकै परिवारका ६ जनाको हत्या गरिएको आरोप छ ।

प्रहरीका अनुसार उनले गत भदौ २१ गते सोमबार बिहान तेजबहादुर कार्की, आमा पार्वता कार्की, श्रीमती मनमाया कार्की, बुहारी रञ्जना कार्की, नाति दीपक कार्की र नातिनी गोमा कार्कीको सामूहिक हत्या गरेका थिए ।

प्रकाशित : भाद्र ३१, २०७८ ११:५८
पूरा पढ्नुहोस्
प्रतिक्रिया
पठाउनुहोस्
×