माओवादीले फेरि देशको नेतृत्व गर्ने अवस्था आउँछ : दाहाल- समाचार - कान्तिपुर समाचार
कान्तिपुर वेबसाईट
AdvertisementAdvertisement

माओवादीले फेरि देशको नेतृत्व गर्ने अवस्था आउँछ : दाहाल

‘जनता र कार्यकर्ता बिग्रिएका होइनन्, हामी माथिल्लो तहका नेता बिग्रियौं’
कान्तिपुर संवाददाता

काठमाडौँ — नेकपा माओवादी केन्द्रका अध्यक्ष पुष्पकमल दाहालले माथिल्लो स्तरका नेतामा विचलन आएको बताएका छन् । बुधबार पार्टी कार्यालय पेरिसडाँडामा पोस्टबहादुर बोगटीको स्मृति दिवसका अवसरमा आयोजित कार्यक्रममा अध्यक्ष दाहालले अझै पनि जनतामा क्रान्तिप्रति रुचि रहेको बताएका हुन् ।

पुस ५ गतेको प्रतिगमनपछिको आन्दोलनले लाखौंको संख्यामा क्रान्तिका लागि जनता सडकमा आउन तयार रहेको देखाएको दाहालले बताए ।

‘हामी अलिअलि बिग्रियौं कि भन्ठानेको, जनता बिग्रेको होइन । ग्रास लेभलको कार्यकर्ता बिग्रेको पनि होइन, हामी अलि माथि आएका नेताहरु, गुट गर्दै हिँड्न रमाउनेचाहिँ हामी माथिका नेता हो, तलका होइन भन्ने सावित भयो,’ दाहालले भने । लाखौं जनता सडकमा आएर प्रतिगमनलाई हराउनै पर्छ भन्ने पनि देखाएको उनको भनाई थियो । प्रतिगमनविरोधी आन्दोलनबाट जनताले गलत बाटोमा जान हुन्न है भनेर आफूहरुलाई पाठ सिकाएको पनि उनले बताए ।

आवश्यक रहे आफूहरु सडकमा जानुपर्ने अवस्था पनि आउन सक्ने उनको भनाइ छ । ‘जरुरत पर्‍यो भने हामी सडकमा पनि जानुपर्ने हुन सक्छ । विकृत बुर्जुवा प्रणालीलाई सुधार्न हामी सडकमा जानुपर्ने अवस्था पनि आउन सक्छ ।’

अध्यक्ष दाहालले माओवादी फेरि देशको नम्बर एक पार्टी बन्न सक्ने पनि बताए । पछिल्ला आन्दोलनले माओवादी पुन: शक्तिमा फर्किन सक्छ भन्ने देखाएको उनको भनाइ छ । ‘संघीय लोकतान्त्रिक गणतन्त्रलाई माया गर्ने पार्टी माओवादी मात्रै रहेछ भन्ने स्थापित भयो । हामी आउँछौं र हामीले देशको नेतृत्व गर्ने वातावरण बन्छ । हामीले राम्रोसँग देशको नेतृत्व गर्न नपाई नपाई १५ वर्ष बित्यो । दुई पटक सरकारको नेतृत्व पनि गर्‍यौं, मन्त्री पनि बनायौं । १०० जना कमरेडहरु मन्त्री भइयो । सबैभन्दा बढी मन्त्री बनाउने पार्टी पनि हाम्रै पार्टी भएछ छोटो समयमा,’ उनले भने ।

आफूहरु इमान्दार भएर लाग्दा कसैले रोक्न नसक्ने पनि उनले बताए । संविधान र लोकतन्त्रको रक्षाका लागि गठबन्धनलाई निरन्तरता दिने पनि उनले बताए । गठबन्धनलाई निरन्तरता दिँदा आगामी चुनावमा दुई तिहाई मत ल्याउने उनको दाबी छ ।

प्रकाशित : भाद्र ३०, २०७८ १२:३०
प्रतिक्रिया
पठाउनुहोस्

आफ्नैबाट असुरक्षा

पर्वत पोर्तेल

काँकडभिट्टा — दमक–३ स्थित भुटानी शरणार्थी शिविर बस्ने २७ वर्षीया मुना राई (तामाङ) लाई ३५ वर्षीय श्रीमान् सनमान तामाङले गत साउन ३ मा कुटपिटपछि हत्या गरे । उस्तै प्रकृतिको घटना २०७७ भदौ ८ मा झापा गाउँपालिका–३ कामाटोलीमा भयो ।

बब्बु भन्ने सुनिल टुडूले मादक पदार्थ सेवन गरी कुटपिट गर्दा ७० वर्षीय बुवा साइला टुडुको ज्यान गयो । ०७७ भदौ २८ मा कमल गाउँपालिका–७ ठूलो बाह्रघरेका २३ वर्षीय दिनेश ऋषिदेवले ४५ वर्षीया आमा मीरा ऋषिदेवलाई बन्चरो प्रहार गरी हत्या गरे ।

परिवारभित्र सबभन्दा बढी विश्वास गरिने श्रीमान् र सन्तानबाटै कति धेरै असुरक्षा छ भन्ने बुझाउन यी हत्या शृंखला हेरे पुग्छ । ‘पति या छोराहरूवाट महिलाले असुरक्षित महसुस गर्न थाल्नु सिंगो समाजकै लागि गम्भीर कुरा हो,’ अधिकारकर्मी कविता शर्मा भन्छिन्, ‘पितृसत्ता र उसको दम्भका कारण महिलाहरूले अनाहकमा मारिनुपरेको हो ।’

जिल्ला प्रहरी कार्यालय झापाका अनुसार वर्ष दिनयता १४ जनाको हत्या श्रीमान्, छोरा या साथीबाट भयो । अघिल्लो वर्ष आफन्तबाट हत्या हुनेको संख्या १२ मात्रै थियो । १० जनाको त श्रीमान्बाटै हत्या भएको थियो । एक घटनामा छोराद्वारा बुबा र अर्को घटनामा छोराबाट आमा मारिनुपर्‍यो । दुई घटना नजिकका नातेदारबाट भयो । यो वर्षको साउनमा मात्रै दुई महिलाको हत्या श्रीमान्बाटै भएको छ ।

‘महिला हत्याका प्रायः घटनामा श्रीमान्कै संलग्नता पाइएको छ,’ झापाका प्रहरी प्रवक्ता डीएसपी राके थापा भन्छन्, अधिकांश घटनाको कारक मादक पदार्थ पाइएको छ ।’ प्रहरीका अनुसार धेरैजसो हत्यामा धारिलो हतियार प्रयोग गरिएको देखिन्छ । ‘श्रीमान् रक्सी पिएर आउने, विवाद हुने अनि आवेगमा हत्या गर्ने पाइएको छ,’ डीएसपी थापा भन्छन्, ‘आफ्ना मान्छेहरूबाटै आफ्नाको हत्या बढ्नु दुःखद कुरा हो ।’

पछिल्लो समय महिलाको शंकास्पद मृत्युका घटना पनि ह्वात्तै बढेको छ । बिर्तामोडकी २५ वर्षीया युवती सिर्जना बस्नेत, इलाम घर भई दमकमा नर्सिङ पढ्दै गरेकी एक किशोरीको पनि शंकास्पद मृत्यु भएको छ । ती घटनामा नजिककै आफन्त संलग्न हुन सक्ने प्रहरी अनुमान छ । भदौ १४ मा अर्जुनधारा–१० मा एक महिला डेरा नजिकै मृत फेला परिन् । भदौ २० मा बिरिङ खोलामा छोरासहित ३८ वर्षीय उमा विकको शव भेटियो । त्यही दिन अपराह्न भद्रपुर–७ देउनिया खोलामा ३६ वर्षीया मेनुका बानियाँ मृत

भेटिइन् । भदौ २५ मा झापा गाउँपालिका–५ सन्थाल बस्तीकी ५५ वर्षीया मञ्जु टुडू र झापा–१ सालमारा सानो माइखोलामा एक महिलाको बेवारिसे शव भेटियो । यी सबै घटनाको प्रहरीले अनुसन्धान गरिरहे पनि सुराक फेला पारेको छैन ।

महिला हिंसाका अधिकांश घटनामा मादक पदार्थ कारक बन्ने गरेको पाइएको छ । तर, उनीहरूमाथिको हिंसाको कारण त्यो मात्रै भने हैन । वैदेशिक रोजगारीलगायतका अन्य घरायसी समस्या पनि रहेको कानुन व्यवसायी लक्ष्मी खनाल बताउँछिन् । ‘वैदेशिक रोजगारीले झन् गम्भीर अवस्था सिर्जना गरेको पाइयो,’ उनले भने, ‘पति–पत्नीबीच उत्पन्न असमझदारी बढ्दै जाँदा हत्या गर्ने अवस्थासम्म पुगेको देखिन्छ ।’ विदेशमा पति भएका पत्नीको परपुरुष सम्बन्ध र विदेशमा पत्नी भएका महिलाको स्त्रीगमन प्रवृत्तिका कारण समेत महिला हिंसा र हत्यासम्मको घटना निम्तिएको प्रहरी अनुसन्धानले देखाएको छ ।

प्रकाशित : भाद्र ३०, २०७८ १२:२२
पूरा पढ्नुहोस्
प्रतिक्रिया
पठाउनुहोस्
×