पूर्वी नवलपरासीमा तीनै तहका जनप्रतिनिधिले रोजेनन् लोसपा र नेकपा (एस)- समाचार - कान्तिपुर समाचार
कान्तिपुर वेबसाईट
AdvertisementAdvertisement

पूर्वी नवलपरासीमा तीनै तहका जनप्रतिनिधिले रोजेनन् लोसपा र नेकपा (एस)

नारायण शर्मा

पूर्वी नवलपरासी — पूर्वी नवलपरासीका तीनै तहका जनप्रतिनिधि एमाले र जसपा विभाजनपछि बनेका नयाँ दलमा जान अनिच्छुक देखिएका छन् । दल छान्नका लागि निर्वाचन आयोगले बुधबारसम्मको मिति तोकेकोमा जिल्लाका स्थानीय तह, केन्द्र र प्रदेशबाट निर्वाचित कुनै पनि जनप्रतिनिधि सनाखत गर्न नगएका हुन् ।

जिल्ला निर्वाचन कार्यालयका अनुसार नेकपा (एकीकृत समाजवादी) र लोकतान्त्रिक समाजवादी पार्टीमा यहाँका कुनै पनि निर्वाचित जनप्रतिनिधि गएका छैनन् ।

ती दलमा जान चाहने निर्वाचित जनप्रतिनिधिले (स्थानीय तह) जिल्ला निर्वाचन कार्यालयमा उपस्थित भएर पार्टी फेरेको जानकारी दिनुपर्ने व्यवस्था गरिएको थियो । कार्यालयप्रमुख लालप्रसाद भुसालका अनुसार ती दल रोज्न कोही पनि सम्पर्कमा आएका छैनन् ।

नेकपा (एकीकृत समाजवादी)ले पुराना एमाले नेता सालिकराम भट्टराईको अध्यक्षतामा ८१ सदस्यीय जिल्ला समिति निर्माण गरेको छ । लोकतान्त्रिक समाजवादी पार्टीको जिल्ला समिति हाँक्न भने कोही अघि सरेको छैन ।


प्रकाशित : भाद्र २३, २०७८ १०:४३
प्रतिक्रिया
पठाउनुहोस्

एमाले संसदीय दलको बैठक सुरु नहुँदै बाहिरिइन् सांसद थापा

कान्तिपुर संवाददाता

काठमाडौँ — एमाले संसदीय दलको बैठक सुरु नहुँदै सांसद तुलसा थापा संसद् भवनबाट बाहिरिएकी छिन् । एमालेले बुधबार बिहान ९ बजे संसदीय दलको बैठक बोलाएको थियो । तर अध्यक्ष तथा संसदीय दलका नेता केपी शर्मा ओली समयमा नआएकाले बैठक ढिला सुरु भएको थियो ।

बैठकस्थल संसद् भवनबाट बाहिरिने क्रममा सांसद थापाले भनिन्, '९ बजे बोलाइएको बैठक अझैसम्म सुरु नभएकाले म त निस्किएँ ।' ओली आएलगत्तै उनी बाहिरिएकी थिइन् ।

थापाले पार्टी विभाजनका बेला माधवकुमार नेपाललाई साथ दिन खोजे पनि कानुनी अड्चनका कारण उनी एमालेमै रोकिएकी थिइन् । राष्ट्रिय सभा सदस्यसमेत रहेका उनका श्रीमान् वामदेव गौतमले भने एमालेबाट सबै जिम्मेवारी त्यागिसकेका छन् ।

संसदीय दलको बैठकमा अध्यक्ष ओलीले संसद्‌मा एमालेले खेल्ने भूमिकाबारे जानकारी गराउने प्रमुख सचेतक विशाल भट्टराईले बताए । एमालेले सभामुख अग्निप्रसाद सापकोटाको भूमिकाप्रति असन्तुष्टि जनाउँदै आएको छ । पार्टी निर्णयअनुसार माधवकुमार नेपालसहितका १४ जना सांसदलाई कारबाही नगरेको भन्दै एमालेले सभामुख सापकोटाको भूमिका निष्पक्ष नभएको टिप्पणी यसअघि नै गरेको थियो ।

यो विषयलाई लिएर एमालेले संसद्‌मा कडा रूपमा प्रस्तुत हुने संकेत यसअघि नै दिइसकेको छ । दिउँसो चार बजे संसद्को अधिवेशन सुरु हुँदै छ ।

प्रकाशित : भाद्र २३, २०७८ १०:३९
पूरा पढ्नुहोस्
प्रतिक्रिया
पठाउनुहोस्
×