संखुवासभामा एकै परिवारका ६ जनाको हत्या - समाचार - कान्तिपुर समाचार
कान्तिपुर वेबसाईट
AdvertisementAdvertisement

संखुवासभामा एकै परिवारका ६ जनाको हत्या 

दीपेन्द्र शाक्य

संखुवासभा — संखुवासभाको शान्त खोलागाउँ सोमबार बिहानदेखि भयानक त्रासदीमा रुमल्लिएको छ । गाउँले निःशब्द छन् । कसले किन यस्तो अकल्पनीय घटना गरायो भनेर प्रहरीले समेत पत्ता लगाउन सकेको छैन । मादी नगरपालिका–१ का तेजबहादुर कार्कीको परिवारका ६ जनाको बीभत्स हत्याको कारण खोतल्न प्रहरीले विभिन्न कोणबाट अनुसन्धान थालेको छ ।

मृतक परिवारका ज्येष्ठ सदस्य ९३ वर्षीय बौद्धमान कार्की भने सकुशल छन् । देख्न र सुन्न नसक्ने उनले यो घटनाबारे पत्तै पाएनन् । प्रहरीका अनुसार बौद्धमानकी श्रीमती पार्वती, छोरा तेजबहादुर, बुहारी कमला, तेजबहादुरकी बुहारी रञ्जना, नाति विपिन र नातिनी गोमाको हत्या भएको हो । मृतकको शव घर वरिपरि यत्रतत्र छरिएको स्थानीय शिक्षक योगेन्द्र ओझाले बताए । उनका अनुसार गाउँलेले सोमबार बिहान १० बजेतिर मात्र घटनाबारे थाहा पाएका हुन् ।

‘हेर्न जाँदा शव यत्रतत्र छरिएका थिए । धारिलो हतियारले क्षतविक्षत हुने गरी काटिएको छ,’ उनले भने, ‘घटना आइतबार रातिको हो कि सोमबार बिहानको भन्ने थाहा भएन ।’ जुत्ता, चप्पल लगाएर भागेको जस्तो देखिएकाले शवको प्रकृति हेर्दा खेदाइखेदाइ हत्या गरेको हुन सक्ने उनको अनुमान छ । ओझाकाअनुसार तेजबहादुरको शव घरदेखि अलि पर सडकमा फेला परेको छ । उनकी बुहारी र श्रीमती खोलामा मृत भेटिएका छन् ।

नाति र नातिनीको शव घरदेखि माथि खरबारीमा भेटिएको छ भने तेजबहादुरकी आमा पार्वतीको शव घरभित्रै छ । मादी–१ का वडाध्यक्ष खेमनाथ कटुवाल आफूले बिहान १० बजेतिर छिमेकी लक्ष्मीभक्त कार्कीबाट खबर पाएको बताए । उनले घटनास्थल पुगेर इलाका प्रहरी कार्यालय चैनपुरमा फोन गरेर हत्याका बारेमा जानकारी गराएका थिए । ‘चप्पल पनि लगाएका रहेछन्, लखेटेर मारेको जस्तो देखिन्छ,’ उनले भने । कटुवालका अनुसार उनीहरू सामान्य परिवारका हुन् । दुई जना छोरा नरेश र रमेश डेढ वर्षदेखि विदेशमा छन् ।

‘नरेश मलेसियामा छन् भने रमेश दुबईमा छन्,’ उनले भने, ‘घटनाबारे उनीहरूलाई जानकारी गराइसकेका छौं ।’ हत्या हुनेमा रमेशकी श्रीमती पनि छिन् । गाउँमा उनीहरूको झैझगडा भएको कहिल्यै नसुनेको वडाध्यक्ष कटुवालले बताए । घटनास्थल पुग्दा स्थानीयको भीड जम्मा भइसकेको मादी नगर प्रमुख विदुर सुब्बाले बताए । ‘दुईवटा भैंसी बाँधिएको अवस्थामा थिए, कुखुरा र बाख्राहरू भने छाडिएको रहेछ,’ उनले सुनाए ।

इलाका प्रहरी कार्यालय चैनपुर घटनास्थलबाट ५५ किलोमिटर पूर्वमा छ । खबर पाउनासाथ घटनास्थल पुगेर अनुसन्धान थालिएको जिल्ला प्रहरी कार्यालयका प्रमुख डीएसपी लालध्वज सुवेदी बताए । विराटनगर र धरानबाट खटिएको प्रहरी टोली पुग्न समय लागेकाले मंगलबार मात्रै शव उठाउने तयारी छ । अनुसन्धानका लागि संघीय प्रहरी इकाइ कार्यालय धरानका प्रहरी उपरीक्षक भीम दाहालको नेतृत्वमा तालिमप्राप्त कुकुरसहितको टोली खटिएको छ ।

प्रकाशित : भाद्र २१, २०७८ १२:३०
प्रतिक्रिया
पठाउनुहोस्

थपिँदै २० अक्सिजन प्लान्ट

दिनमा ४० सिलिन्डर भर्न सकिने, जाजरकोट र डोल्पामा निर्माण प्रक्रियै अघि बढेन
चाँदनी कठायत

वीरेन्द्रनगर — दोस्रो लहरको कोरोनाका बेला अक्सिजनको चरम अभाव भोगेको कर्णालीमा अक्सिजन प्लान्ट थपिँदै गएका छन् । कोरोनाको तेस्रो लहरको जोखिम आउने भन्दै कर्णालीका अस्पतालहरूमा अक्सिजन प्लान्ट थपिएका हुन् ।

संघीय तथा प्रदेश सरकार, स्थानीय तह र विभिन्न दातृ निकायको बजेटबाट अक्सिजन प्लान्ट खरिद गरी ल्याइएको हो । प्रदेशभरका विभिन्न अस्पतालमा ११ ठूला र ९ साना अक्सिजन प्लान्ट सञ्चालनमा ल्याउने तयारी थालिएको कर्णाली प्रदेश स्वास्थ्य सेवा निर्देशनालयले जनाएको छ । निर्देशनालयका सूचना अधिकारी नोदनारायण चौधरीले जसमध्ये दुई वटा ठूला तथा नयाँ अक्सिजन प्लान्ट रुकुम पश्चिम र कालीकोटमा जडान गरी सञ्चालनमा ल्याइएको जानकारी दिए । उनका अनुसार १७ वटा अक्सिजन जडान हुने प्रक्रियामा छन् । सञ्चालनमा ल्याइएका ठूला क्षमताका अक्सिजन प्लान्टले २४ घण्टामा ४० वटा अक्सिजन सिलिन्डर भर्न सक्ने उनले जानकारी दिए ।

जाजरकोट र डोल्पामा भने अक्सिजन प्लान्ट निर्माणको प्रक्रिया अघि बढेको छैन । संघीय सरकारको अर्थ मन्त्रालयले कर्णालीका तीन अस्पताललाई अक्सिजन प्लान्ट र हाई डिपेन्डेन्सी युनिट (एचडीयू) खरिद तथा जडानका लागि २० करोड ६५ लाख बजेट विनियोजन गरेको छ । मन्त्रालयले प्रदेश अस्पताल सुर्खेत, कर्णाली स्वास्थ्य विज्ञान प्रतिष्ठान जुम्ला र चौरजहारी सामुदायिक अस्पताल रुकुम पश्चिमका लागि उक्त प्रक्रिया अगाडि बढाउन बजेटसहित गत जेठमा सहमति दिएको हो ।

प्रदेश अस्पतालका लागि मन्त्रालयले अक्सिजन प्लान्ट खरिद र एचडीयू जडान खरिद गर्न ६ करोड २५ लाख ४० हजार तथा भेन्टिलेटर, अक्सिजन प्लान्ट र अक्सिजन ट्यांक निर्माण गर्नका लागि १२ करोड ८० लाख रुपैयाँ बजेट आएको छ । अस्पतालमा थप दुई वटा अक्सिजन प्लान्ट निर्माणको तयारी गरिएको तथ्यांक रेकर्डर अधिकृत विनोद बस्नेतले बताए । उनका अनुसार अस्पतालमा एउटा अक्सिजन प्लान्ट सञ्चालनमा छ । निर्देशनालयका अनुसार अहिले कर्णालीमा ३ हजार १ सय ४७ वटा अक्सिजन सिलिन्डर छन् ।

१ हजार १९ अक्सिजन कन्सन्ट्रेटर, १ सय ८५ वटा एचडीयू बेड १८ वटा एनआईसीयू बेड र आठ वटा पीआईसीयू बेड तयारी अवस्थामा रहेको निर्देशनालयले जनाएको छ । अर्थ मन्त्रालयले जुम्लास्थित कर्णाली स्वास्थ्य विज्ञान प्रतिष्ठानमा अक्सिजन प्लान्ट जडानका लागि २ करोड ८० लाख र एचडीयू जडानका लागि ३ करोड रुपैयाँ बजेट पठाएको छ । अस्पतालका लेखा प्रमुख मकेन्द्र शाहीले उक्त बजेटबाट गत आर्थिक वर्षमा नै टेन्डर प्रक्रिया पूरा गरिसकिएको जनाए । उनका अनुसार प्रतिष्ठानले २ करोड ५५ लाख ६ हजार ३ सय ६० रुपैयाँमा टेन्डर गरी एचडीयू जडान गर्दै छ । यस्तै, २ करोड ४८ लाख बजेटमा अक्सिजन प्लान्ट जडानका लागि टेन्डर गरिएको उनले जानकारी दिए ।

प्रतिष्ठानमा एक मिनेटमा एक हजार लिटर अक्सिजन उत्पादन हुने ठूलो क्षमताको अक्सिजन प्लान्ट जडानको प्रक्रिया थालिएको छ । अहिले एउटा मिनी अक्सिजन प्लान्ट सञ्चालनमा रहेको शाहीले बताए । उक्त प्लान्टबाट दैनिक आठ वटासम्म सिलिन्डर भर्न मिल्छ । अस्पतालका ३२ वटा बेडमा पाइपलाइनमार्फत नै अक्सिजन सप्लाइ गरिएको छ ।

रुकुम पश्चिमको चौरजहारी अस्पताललाई अक्सिजन प्लान्ट खरिद र जडानका लागि अर्थ मन्त्रालयले ७५ लाख रुपैयाँको बजेट सहमति दिएको छ । तर अस्पतालले भने प्रदेश सरकारको १ करोड र नगरपालिकाको १२ लाख ५० हजार रुपैयाँ बजेटले अक्सिजन प्लान्ट खरिद गरी जडान गरिसकेको छ । उक्त प्लान्टले दैनिक ३० देखि ४० वटा सिलिन्डर अक्सिजन भर्न मिल्छ ।

सुर्खेतको वीरेन्द्रनगर नगरपालिकाले कटकुवा नगर अस्पतालमा अक्सिजन प्लान्ट सञ्चालनमा ल्याउँदै छ । अक्सिजन प्लान्टको संरचना निर्माण र मेसिन जडानको काम सकिएको नगरपालिकाले जनाएको छ । उक्त प्लान्टले एक दिनमा एक सय ५० देखि एक सय ७० वटासम्म सिलिन्डर भर्न सक्छ ।

संघीय सरकारले देशभरका २६ अस्पताल र ९ वटा प्रादेशिक अस्पतालमा भेन्टिलेटर, अक्सिजन प्लान्ट र अक्सिजन ट्यांक निर्माण गर्न गत जेठ २ गते २ अर्ब ९५ करोड २० लाख रुपैयाँ छुट्याउने निर्णय गरेको थियो । यस्तै, मन्त्रालयले अक्सिजन प्लान्ट र एचडीयू खरिद तथा जडानका लागि १७ करोड ८७ लाख ७० हजार बजेटसहित प्रक्रिया अगाडि बढाउन सहमति प्रदान गरेको थियो ।

प्रकाशित : भाद्र २१, २०७८ १२:२९
पूरा पढ्नुहोस्
प्रतिक्रिया
पठाउनुहोस्
×