नेकपा (एस) को संसदीय दलको कार्यालय स्थापना
काठमाडौँ — नेकपा (एकीकृत समाजवादी) को संघीय संसदीय दलको कार्यालय स्थापना गरिएको छ । एमाले विभाजन भएर बनेको नेकपा (एस) को सिंहदरबारस्थित संघीय संसद् सचिवालयको १ नम्बर भवन तेस्रो तलामा कार्यालय व्यवस्थापन गरिएको हो ।
तत्कालका लागि संसदीय दलका नेता माधवकुमार नेपाल र राष्ट्रिय सभा दलको नेता बेदुराम भुसालका लागि कक्ष उपलब्ध गराइएको छ ।
प्रमुख सचेतक/सचेतक चयन भएपछि कार्यकक्ष थपिने संघीय संसद् सचिवालयले जानकारी दिएको छ ।
एकीकृत समाजवादीको संसदीय दलको बैठक कक्ष कहाँ राख्ने र कसरी व्यवस्थापन गर्ने भन्ने टुंगो नलागिसकेको सचिवालयका अधिकारीहरूको भनाइ छ ।
प्रकाशित : भाद्र १५, २०७८ १५:४४