मन्त्री छान्न छाडेर यादव कार्यकर्ता रोक्ने अभियानमा- समाचार - कान्तिपुर समाचार
कान्तिपुर वेबसाईट
AdvertisementAdvertisement

मन्त्री छान्न छाडेर यादव कार्यकर्ता रोक्ने अभियानमा

जसपाले जिल्ला दौडाहा सकेपछि मात्र मन्त्रीको टुंगो लगाउने 
भूषण यादव

वीरगन्ज — मन्त्रिपरिषद् विस्तारको एजेन्डालाई थाती राखेर सत्तारूढ जनता समाजवादी पार्टीका शीर्ष नेता जिल्ला दौडाहामा लागेका छन् । जसपाका पूर्वअध्यक्ष महन्थ ठाकुरको समूहले नयाँ पार्टी बनाएपछि जसपा अध्यक्ष उपेन्द्र यादवलगायत नेता ‘कार्यकर्ता जोगाउन’ राजनीतिक अभिमुखीकरण कार्यक्रमका नाममा कार्यकर्तामाझ पुगेका हुन् ।

प्रधानमन्त्री शेरबहादुर देउवाले सत्ता साझेदार माओवादी केन्द्रका अध्यक्ष पुष्पकमल दाहाल र एकीकृत समाजवादीका अध्यक्ष माधव नेपालसँग मन्त्रिपरिषद् विस्तारबारे छलफल गरिरहँदा जसपा अध्यक्ष यादव शुक्रबार जनकपुरको अभिमुखीकरण कार्यक्रममा सहभागी भएर शनिबार वीरगन्ज आइपुगेका छन् । जनकपुर जानुअघि उनले विराटनगरमा भएको कार्यक्रमलाई सम्बोधन गरेका थिए ।

शनिबार वीरगन्जको नगरसभा गृहमा पर्सा, बारा, रौतहट लगायत जिल्लाका अगुवा कार्यकर्तालाई सम्बोधन गर्ने क्रममा अधिक समय उनले ठाकुरको आलोचना गर्नमा खर्चिएका थिए । उनले ठाकुर तराई कांग्रेसका वेदानन्द झाको बाटोमा हिँडेको आरोपसमेत लगाए । ‘२००७ सालको उपलब्धि राजा महेन्द्रले समाप्त गरे । जब महेन्द्रले संसदीय व्यवस्था समाप्त गरे, त्यसबेला मधेसमा एउटा मात्र मधेसी दल थियो, तराई कांग्रेस । पार्टीको नेता थिए– वेदानन्द झा,’ उनले भने, ‘वेदानन्दले तराई कांग्रेस दरबारमा बुझाए र राजतन्त्र समर्थन गरेबापत पुरस्कारमा केही दिनको गृहमन्त्री र राजदूत पाए । हिजो जसरी वेदानन्द झाले लोकतन्त्रको हत्या र प्रतिगमनकारी शक्तिको मद्दत गरेका थिए । आज वेदानन्द झाको भूमिकामा महन्थ ठाकुर ठाकुर एन्ड कम्पनी रहेका छन् ।’ ठाकुर समूहले असंवैधानिक कदमको समर्थन गर्दै जसपा फुटाएको उनको भनाइ थियो ।

अध्यक्ष यादवका अनुसार अल्पमतमा रहेका तत्कालीन प्रधानमन्त्री केपी शर्मा ओलीले जसपा फुटाएर सरकार सञ्चालन गर्ने योजनामा थिए । ‘असंवैधानिक कदमविरुद्ध विरोध गर्ने निर्णय जसपाले गर्दा ठाकुर समूह साथमै थियो । जब आन्दोलन बढ्दै गयो, तब ओली कमजोर हुँदै गए । पछाडि फर्केर हेर्छौं त ठाकुर समूह छैन, अनि एकजनाले भने कि उहाँहरू बालुवाटार पुग्नुभएको छ,’ उनले भने । उनले ठाकुर समूह अलग भए पनि फरक नपर्ने दाबी गरे । ‘कहिलेकाहीं हावा चल्दा रूखबाट पात झर्छन्, हाँगा भाँचिन्छ तर रूख उभिरहेको हुन्छ,’ उनले थपे, ‘जसपा फुटेको छैन, झन् बलियो भएको छ । गन्धा विचार भएका स्वार्थी समूह बाहिरिएपछि पार्टी शुद्धीकरण भएको छ । वेदानन्द प्रवृत्तिका व्यक्तिहरू बाहिर गएका छन् ।’ उनले ठाकुर लगायतका नेता बाहिरिएपछि झन्डै ८० प्रतिशत कार्यकारिणी समितिको उपस्थितिमा बैठक गरेको दाबी गरे । जसपाको केन्द्रीय कार्यकारिणी समितिले गत भदौ ६ मा भदौ ९ देखि १७ सम्म सातवटै प्रदेशमा प्रदेशस्तरीय अभिमुखीकरण कार्यक्रम गर्ने निर्णय गरेको थियो । जिल्ला दौडाहा सकिएपछि जसपाले संघीय सरकारमा जाने मन्त्रीको टुंगो लगाउने तयारी छ ।

यसअघि निर्वाचन आयोगले जसपाको आधिकारिता उपेन्द्र यादव पक्षलाई दिएपछि ठाकुर पक्ष सर्वोच्च अदालतमा मुद्दा हालेर साउन अन्तिम साता मधेस झरेको थियो । प्रतिगमनकारी शक्तिको मतियार बनेको, ओली सरकारमा सहभागी भई पार्टी विभाजनको बीउ रोपेको आरोप चिर्न ठाकुर पक्षले प्रदेश २ का चार जिल्लामा अगुवा कार्यकर्ता भेला गरेको थियो । महोत्तरीको जलेश्वरमा अगुवा कार्यकर्ता भेलालाई महन्थ ठाकुर, शरतसिंह भण्डारी, निर्जला राउतले सम्बोधन गरेका थिए । त्यस्तै राजविराजमा राजेन्द्र महतोले र सिरहामा अनिलकुमार झाले सम्बोधन गरे । बाराको कार्यकर्ता भेलालाई लक्ष्मणलाल कर्ण र जितेन्द्र सोनलले सम्बोधन गरे ।

मधेसका मुद्दा सम्बोधन गराउन ओली नेतृत्वको सरकारमा सहभागी भएको ठाकुर पक्षका नेताहरूको भनाइ छ । यादव १८ महिना ओली नेतृत्वको सरकारमा रहँदा गर्न नसकेको काम आफूहरूले १८ दिनमा गरेको दाबी उनीहरूको छ । अगुवा कार्यकर्ता भेलामा नागरिकतासम्बन्धी अध्यादेश ल्याएको र आन्दोलनका क्रममा मुद्दा लागेका १ सय ४० जनाको मुद्दा फिर्ता गराएको जनाएका थिए । संविधान संशोधनका लागि कार्यदलसमेत बनाउन लगाएको बताएका थिए । ठाकुर नेतृत्वको लोकतान्त्रिक समाजवादी निकट राजनीतिज्ञ शिव पटेलले मन्त्री भागबन्डापछि पार्टी फुट्ने जोखिम रहेकाले यादवले अभिमुखीकरण कार्यक्रमका नाममा नेता/कार्यकर्ता खोजिरहेको टिप्पणी गरे । ‘धेरैलाई मन्त्री बनाउने आश्वासन दिएर यादवले जसपामा बहुमत जुटाउनुभएको छ,’ उनले भने, ‘मन्त्री नपाए उनको पार्टी फुट्ने सम्भावना छ ।’

जुटफुट शृंखला

मधेसका मुद्दालाई एकीकृत पार्टीका माध्यमबाट उठाउनुपर्छ भन्ने मान्यताका साथ २०७४ वैशाखमा ६ वटा मधेस केन्द्रित दल मिलेर राष्ट्रिय जनता पार्टी गठन गरिएको थियो । २०७७ वैशाखमा समाजवादी पार्टी र राजपाबीच एकीकरण भई जनता समाजवादी पार्टी बन्यो । त्यसअघि २०७६ वैशाखमा उपेन्द्र यादव नेतृत्वको संघीय समाजवादी फोरम र बाबुराम भट्टराईको नयाँ शक्तिबीच एकता भई समाजवादी पार्टी गठन भएको थियो । मधेसकेन्द्रित शक्तिहरू एउटै पार्टीमा अटाएपछि बलिया देखिएका थिए ।

प्रदेश २ मा जसपाले ३ वर्ष ८ महिना एकल बहुमतको सरकार चलाएको थियो । तर ओलीको असंवैधानिक कदमको समर्थन र विरोधका बीच जसपामा विवाद चुलियो । ठाकुरको समूह प्रदेश २ सरकारबाट बाहिरियो । जसपाका लालबाबु राउत नेतृत्वको सरकारमा कांग्रेस र माओवादी सहभागी भएका छन् । मधेस आन्दोलनबाट उदाएका नेताहरूले मधेस मुद्दा बिर्सेको राजनीतिज्ञ शिव पटेलको बुझाइ छ ।

प्रकाशित : भाद्र १४, २०७८ ०८:५३
प्रतिक्रिया
पठाउनुहोस्

के गर्दै छन् सीके राउत ?

६ महिनापछि हुने स्थानीय चुनावमा बलियो उपस्थिति जनाउन तल्लो तहसम्म संगठन विस्तार गर्ने र मधेसको विकासमा युवालाई समेट्ने रणनीति
पुराना माग र मुद्दा छाडेर मूलधारको राजनीतिमा आएपछि मधेसमा जनमत पार्टीप्रति आकर्षण झन् बढेको दाबी
भूषण यादव

वीरगन्ज — अमेरिकाबाट फर्केका इन्जिनियर सीके राउतले पृथकतावादी नारा दिँदै तराई–मधेसमा अभियान चलाउँदा सबैलाई झस्काएको थियो । गैरसंवैधानिक गतिविधिका कारण उनी र उनका कार्यकर्ता पटकपटक पक्राउ पर्दै छुट्ने गरेका थिए । राउत आफैं झन्डै ५ महिना हिरासत बसेपछि सरकारसँग सहमति गरेर मूलधारको राजनीतिमा आए ।

फाइल तस्बिर

२०७५ फागुन २४ मा खुला राजनीतिमा आएपछि उनको समूह मधेस राजनीतिको तेस्रो धार बन्न सक्ने आकलन गरिएको थियो । तर पछिल्लो समय राउत खासै चर्चामा छैनन् । राष्ट्रिय राजनीतिका मुद्दामा पनि उनका क्रिया–प्रतिक्रिया उति सुनिँदैनन् ।

साढे दुई वर्ष अगाडि सरकारसँग ११ बुँदे राजनीतिक सहमति गरेका राउतले सिरहाको लहानमा राष्ट्रिय परिषद् बैठक गरेर आफ्नो नेतृत्वमा २०७५ चैत ४ मा जनमत पार्टी गठन गरेका थिए । त्यसअघि उनी स्वतन्त्र मधेस गठबन्धनका नाममा राजनीति गर्थे । जनमत पार्टी २०७६ जेठ ६ मा निर्वाचन आयोगमा दर्ता भइसकेको छ ।

उक्त पार्टीको गत चैत अन्तिम साता भएको महाधिवेशनले राउतलाई निर्विरोध अध्यक्ष चुनेको थियो । मूलधारमा आएपछि ओझेलमा परेको र पुराना कार्यकर्ताले पार्टी छाडेको चर्चा मधेसको राजनीतिक क्षेत्रमा भइरहेको छ । पहिले विखण्डनको पाठ रटाएका आफ्ना युवा पंक्तिलाई अहिले सम्झाउन राउतका लागि चुनौती रहेको विश्लेषकको बुझाइ छ । जनमत पार्टीका नेताहरू भने संगठन विस्तारमा केन्द्रित भइरहेको बताउने गरेका छन् ।

जनमत पार्टीका महासचिव चन्दन सिंहले चुनाव नजिकिँदै गरेका पार्टीको आन्तरिक गृहकार्यमा आफूहरू लागेको बताए । ‘अबको ६ महिनापछि स्थानीय चुनावको वातावरण बन्न थाल्छ,’ कान्तिपुरसँग फोनमा महासचिव सिंहले फोनमा भने, ‘त्यसपछि अरू चुनाव पनि हुन्छन् । त्यहीअनुसार संगठनको तयारी भइरहेको छ । प्रत्येक जिल्लाको ग्रासरुट लेभलमा बुथ समिति निर्माण गर्ने अभियानमा केन्द्रित छौं ।’ उनले संगठन शुद्धीकरणसँगै पालिका र वडास्तरमा अधिवेशन गरिरहेको जानकारी दिए । ‘हामी लक्ष्यबाट विचलित भएका छैनौं,’ उनले भने ।

पुराना माग र मुद्दा छाडेर मूलधारको राजनीतिमा आएपछि जनमत पार्टीप्रति युवाको आकर्षण कम भएको टिप्पणीप्रति महासचिव सिंहले असहमति प्रकट गरे । ‘युवाको झुकाव अहिले पनि सीके राउतप्रति नै छ,’ उनले भने, ‘हामीसँग पढेलेखेका हजारौं युवाको जमात छ । केही मान्छेले दिग्भ्रमित गरेका मात्र हुन् ।’ मधेसमा विकासको राजनीतिक वातावरण युवाले नै तयार गर्ने उल्लेख गर्दै उनले भने, ‘हामीसँग विदेशमा पढेर, काम गरेर फर्केका युवा छन् । विदेशमै बसेका पनि छन् । ती युवाको भरोसाको केन्द्र सीके राउत हुन्, जनमत पार्टी हो ।

जनमत पार्टीका पूर्वकेन्द्रीय सदस्य सञ्जय साहले पुराना मुद्दा छाडेपछि कृपावाद हाबी हुनाले २०७७ जेठमा आफूलगायत ७ केन्द्रीय सदस्यले पार्टी छाडेको बताए । त्यतिबेला पार्टीको ३५ सदस्यीय केन्द्रीय समिति थियो । ‘जेलनेल भोगेका कार्यकर्तालाई पाखा लगाएर नातावाद र जातिवादका आधारमा कार्यकारिणी समिति निर्माण हुन थालेपछि हामीले राजीनामा दियौं,’ उनले भने, ‘ग्रासरुटमा काम गर्ने कार्यकर्ताको मूल्यांकन छैन । जनता राज ल्याउने नारा भए पनि गतिविधिचाहिँ अन्य पार्टीजस्तै छ ।’ उनले राउतले नेतृत्व गरेको अभियानमा आफू २०७१ सालमा सामेल भएको जानकारी दिए । २०७७ चैत २८ मा जनकपुरको बाह्रबिघामा जनमत पार्टीको प्रथम महाधिवेशन भएको थियो । २५ सदस्यीय केन्द्रीय कार्यसमितिका लागि भएको निर्वाचनमा ४ हजार ५ सय प्रतिनिधिले मतदान गरेका थिए ।

गत वैशाख ९ र १० मा धनुषाको हारसर जीवन केन्द्रमा बसेको केन्द्रीय समितिको विस्तारित बैठकले जनमत पार्टीका आगामी निर्वाचन लक्षित प्रचारप्रसारका कार्यक्रम वडा स्तरसम्म चलाउने निर्णय गरेको थियो । निर्वाचन आयोगको मतदाता नामावलीमा नाम छुटेकाहरूको नाम दर्ता गराउने अभियान हरेक वडामा चलाइने निर्णय पनि गरिएको थियो । पार्टीका कार्यकर्ताले जनतामाझ पुगेर गाउँघर सरसफाइ कार्यक्रम, प्रभातफेरी, जनचेतनामूलक नाटकलगायत सञ्चालन गर्ने पनि उक्त पार्टीको निर्णय छ । हरेक वडाबाट कम्तीमा ३० जना स्वयंसेवकको सूची केन्द्रीय सचिवालयलाई उपलब्ध गराउन निर्देशनसमेत दिइएको थियो ।

जनमत पार्टीले स्थानीय तहको उपनिर्वाचनमा भाग लिएको थियो । तर कोही पनि विजयी हुन सकेनन् । महासचिव सिंहले भने उपनिर्वाचनमा सांकेतिक रूपले केही ठाउँमा वडा अध्यक्ष र एउटा गाउँपालिकामा अध्यक्ष पदका लागि पार्टीले उम्मेदवार खडा गरेको बताए । ‘पार्टी बनेको केही महिना मात्र भएकाले जित हासिल गर्न सकिएन,’ उनले भने, ‘भोट भने राम्रो आयो । आगामी चुनावमा हाम्रो राम्रो उपस्थिति हुन्छ ।’

राजनीतिक विश्लेषक विनोद गुप्ताले तराई–मधेसका जनताले मूलधारकै राजनीतिलाई रुचाउने बताउँछन् । ‘सरकारसँग सहमति गरेर मूलधारमा आए पनि सीके राउतले अप्रत्यक्ष रूपले जनमतसंग्रहको माग गर्दै आएका छन्, त्यही भएर नरुचाइएका हुन् । मधेसका जनता नेपालको मूलधारको राजनीतिबाट अलग बस्न रुचाउँदैनन्,’ उनले भने । अमेरिकाको नासामा काम गरेर फर्किएकाले राउतप्रति एउटा तप्काको आकर्षण बढेको उनको बुझाइ छ । ‘नासामा काम गरेर आएकाले केही विशेषता होला भनेर पनि लगाव थियो, पढेलेखेका मानिसले राउतको राजनीति बुझिसकेका छन्,’ उनले भने ।

प्रकाशित : भाद्र १३, २०७८ ०७:५१
पूरा पढ्नुहोस्
प्रतिक्रिया
पठाउनुहोस्
×