कांग्रेसको निमन्त्रणामा नेपाल आएका भाजपा नेता चौथाइवाले राजनीतिक भेटघाटमा व्यस्त
काठमाडौँ — भारतीय जनता पार्टी (भाजपा)का विदेश विभाग प्रमुख विजय चौथाइवालेले सोमबार पनि राजनीतिक भेटघाट गरेका छन् । उनले सोमबार प्रमुख प्रतिपक्षी दल नेकपा एमालेका अध्यक्ष एवं पूर्वप्रधानमन्त्री केपी शर्मा ओली, नेकपा माओवादी केन्द्रका अध्यक्ष एवं पूर्वप्रधानमन्त्री पुष्पकमल दाहाल र प्रस्तावित लोकतान्त्रिक समाजवादी पार्टीका अध्यक्ष महन्थ ठाकुरलाई निवासमै पुगेर भेटवार्ता गरेका हुन् ।
कांग्रेसको निमन्त्रणामा चार दिने भ्रमणका लागि नेपाल आएका चौथाइवालेले आइतबार नै प्रधानमन्त्री एवं कांग्रेस सभापति शेरबहादुर देउवालाई बालुवाटार पुगेर भेटेका थिए । देउवा प्रधानमन्त्री भएपछि नेपालको आएका उनी नै पहिलो उच्चस्तरीय भारतीय नेता हुन् । भारतीय प्रधानमन्त्री नरेन्द्र मोदी र गृहमन्त्री अमित शाहको निकटस्थ मानिएका चौथाइवालाको भ्रमणलाई त्यसैले पनि महत्त्वका साथ हेरिएको छ ।
In last 24hrs, I met four seniormost leaders of Nepal, @SherBDeuba ji, @kpsharmaoli ji, @cmprachanda ji n Mahantha Thakur ji, representing diverse ideological and political spectrum.Each one appreciated PM @narendramodi Ji's commitment to strong relations between India and Nepal
— Dr Vijay Chauthaiwale (@vijai63) August 23, 2021
यसअघि उनी ०७७ मंसिर तेस्रो साता नेपाल भ्रमणमा आएका थिए । तर, त्यसबेला उनको भ्रमणको संयोजन एमालेका नेता विष्णु पौडेलले गरेका थिए । आठ महिनाको अन्तरालमा पुनः नेपाल आएका चौथाइवालेको राजनीतिक भेटघाटले नेपाल–भारत सम्बन्धका विषयमा नयाँ धारणा विकास हुन सक्ने जानकारहरु बताउँछन् । सोमबारका भेटघाटका क्रममा चौथाइवालेले ट्वीट गर्दै नेपाल–भारत सम्बन्धका थुप्रै सकारात्मक विषयहरुमा छलफल भएको जानकारी दिएका छन् ।
Honoured to call on former Prime Minister of Nepal and the leader of opposition Shri @kpsharmaoli ji this morning in Kathmandu. We had positive discussion to further progress India-Nepal ties. pic.twitter.com/39qnz7pAsB
— Dr Vijay Chauthaiwale (@vijai63) August 23, 2021
चौथाइवालेसँग भेटवार्तापछि आइतबार प्रधानमन्त्री देउवाले नेपाली कांग्रेस र भाजपाका बीचमा आगामी दिनमा सुमधुर सम्बन्ध विकास हुने र त्यसले नेपाल–भारत सम्बन्धलाई थप उचाईमा पुर्याउन मद्दत पुग्ने बताएका थिए ।
Had a cordial meeting for a bright beginning with @vijai63 Ji today. I look forward to future exchanges between @nepalicongress and @bjp4india to further cement the ties between the two parties. https://t.co/odt29FRBO6
— Sher Bahadur Deuba (@SherBDeuba) August 22, 2021
यसपटक चौथाइवालेको नेपाल भ्रमणको संयोजन कांग्रेस सह–महामन्त्री एवं पूर्वपरराष्ट्रमन्त्री प्रकाशशरण महतले गरेका हुन् ।
‘अरु त्यस्तो खास कारण छैन । सभापतिज्यूसँगको भेटमा दुई पार्टीबीचको सम्बन्धलाई कसरी दुई देशको हितमा उपयोग गर्न सकिन्छ भन्ने विषयमा छलफल भयो,’ महतले भने, ‘उहाँलाई मैले नेपालको भ्रमणका लागि कांग्रेसका तर्फबाट निमन्त्रणा दिएको थिएँ । यही अवसरमा उहाँले अन्य राजनीतिक दलका शीर्ष नेताहरुसँग पनि भेट्न चाहनुभएको हो ।’
देउवासँगको भेटवार्ताका क्रममा चौथाइवालेले भारतीय प्रधानमन्त्री नरेन्द्र मोदीको बधाई सन्देशसमेत सुनाएका थिए ।
प्रकाशित : भाद्र ७, २०७८ २१:१६