बाढीले मेलम्चीको पानी आउने मिति सर्‍यो- समाचार - कान्तिपुर समाचार
कान्तिपुर वेबसाईट
AdvertisementAdvertisement

बाढीले मेलम्चीको पानी आउने मिति सर्‍यो

बाढीको त्रास कायमै रहेकाले असोजपछि मात्र काम सुरु गरिने
दीपेन्द्र विष्ट

काठमाडौँ — मेलम्ची खोलामा आइतबार राति आएको बाढीले निर्माणाधीन सडक संरचना बगाएपछि मेलम्ची खानेपानी सम्पन्न हुने मिति थप अनिश्चित बनेको छ । हेलम्बुको क्युल क्षेत्रमा निर्माण भइरहेको करिब २ किमि सडक पछिल्लो बाढीका कारण क्षतिग्रस्त बनाएपछि मेलम्चीको पानी काठमाडौं पुर्‍याउने लक्ष्य प्रभावित भएको मेलम्ची खानेपानी आयोजना प्रमुख रामकुमार श्रेष्ठले जनाए ।

मेलम्ची खानेपानी आयोजनाको सुरूङ ।  फाइल तस्बिर : कान्तिपुर

‘आयोजनालाई त खास क्षति पुर्‍याएको छैन,’ उनले भने, ‘तर हेलम्बु गाउँपालिकासँग समन्वय गरेर निर्माण भइरहेको बाटो ध्वस्त भयो । अब वर्षापछि मात्र काम सञ्चालन गर्ने कि भन्ने सोचाइमा पुगेका छौं,’ उनले भने । श्रेष्ठले प्रतिनिधिसभा अन्तर्गतको विकास तथा प्रविधि समितिलाई बाढीबाट मेलम्ची खानेपानी आयोजनामा पुगेको क्षतिबारे जानकारीसमेत दिइसकेको बताए । आइतबार बसेको विकास समिति बैठकले मेलम्चीको थिल्लो क्षेत्रको भौगर्भिक अवस्थाको अध्ययन गरिदिन एसियाली विकास बैंक (एडीबी) लाई पत्राचारसमेत गरेको छ । ‘माघसम्म पानी ल्याउन हामीले कार्ययोजना बनाएका थियौं तर अब त्यो पनि पूरा नहुने भयो,’ उनले भने ।

यसअघि आयोजनाले असोज ७ गतेभित्र पहुँच मार्गको कार्य प्रारम्भ गर्ने, असोज १५ भित्र हेडवर्क्स क्षेत्रको ढुंगा, गिट्टी, बालुवा र माटो हटाउने, कात्तिक १५ भित्र अम्बाथान पोर्टल खुला टनेलको निरीक्षण गर्ने, पुसभित्र कफर ड्याम निर्माण सम्पन्न गरी माघ ७ भित्र पानी पथान्तरण गर्ने कार्ययोजना सरकारलाई बुझाएको थियो । असार १ मा मेलम्चीमा आएको बाढीले बजारदेखि हेडवर्क्ससम्मको करिब २१ किमिमध्येको ८ किमि सडक संरचना पूरै बगाएकाले त्यो रुटमा गाडी सञ्चालन हुन सकेका छैनन् ।

‘केही स्थानमा त सडक नामो निसान छैन,’ प्रमुख श्रेष्ठले भने, ‘तत्काल करिब ३० करोड रुपैयाँ सरकारले सडक निर्माणका लागि दिएमा सुरुङमा पानी हाल्न सकिन्थ्यो । सधैं बाढी आयो भने कसरी अघि बढ्ने भन्नेबारे छलफल गरिराखेका छौं ।’ पहिलोपटकको बाढीले आयोजनामा १ अर्ब ८८ करोड रुपैयाँ बराबरको क्षति पुगेको उनले जनाए ।

‘निर्माण सामग्री हेलिकप्टरबाट लग्ने कि भन्नेबारे पनि छलफल भइरहेको थियो । त्यो पनि अब नहुने भयो,’ उनले भने । सडक मार्गबाटै हेडवर्क्ससम्म सामग्री पुर्‍याउन मेलम्चीको पानीको सतह नघटेसम्म समस्या हुने भन्दै उनले कामदार पठाउनसमेत नसकिने जनाए । ‘त्यो क्षेत्रमा कामदारलाई कहाँ राख्ने भन्नेसमेत टुंगो लगाउन गाह्रो छ,’ उनले भने, ‘पहिलेका संरचना कुनै बाँकी छैनन् । अझै बाढी आउने आशंका उस्तै छ ।’ असार १ देखि भदौ अन्तिमसम्म आयोजनाका भौतिक संरचना मर्मत गर्ने भन्दै सुरुङमा पानी पथान्तरण नगर्ने निर्णय गरेको थियो ।

बाढीले बारम्बार परियोजना प्रभावित भएकाले मेलम्चीको पानी कहिलेसम्म काठमाडौं आउला भन्नेमा आयोजनाका अधिकारी नै अन्योलमा छन् । ‘हेडवर्क्स (बाँध), सुरुङ, सडक, पुललगायत मुहानको संरचना क्षतविक्षत अवस्थामा छ,’ मेलम्चीका एक अधिकारीले कान्तिपुरसँग भने, ‘सडक निर्माण भए एउटा खाका तयार हुन्थ्यो । सडक नै छैन । पानी यही मितिमा आउँछ भन्न निकै गाह्रो छ ।’ आयोजनाको पहलले मात्र केही नहुने भन्दै उनले राष्ट्रियस्तरबाट सोच्नुपर्ने बताए । अस्थायी रूपमा पानी पथान्तरण गर्न पनि तत्काल भौतिक तथा पूर्वाधार मन्त्रालय, नदी नियन्त्रणमा जलस्रोत तथा सिँचाइ मन्त्रालयले सहयोग गर्नुपर्ने आयोजना प्रमुख श्रेष्ठको धारणा छ ।

प्रकाशित : श्रावण २१, २०७८ १७:२१
प्रतिक्रिया
पठाउनुहोस्

पार्टी एकताका लागि तयार छौं तर सम्मानजनक हुनुपर्छ : माधव नेपाल

कान्तिपुर संवाददाता

काठमाडौँ — एमाले वरिष्ठ नेता माधवकुमार नेपालले पार्टी एकताका लागि आफूहरु तयार रहेको बताएका छन् । बिहीबार आफू पक्षीय केन्द्रीय सदस्यहरुको बैठकमा बोल्दै नेता नेपालले पार्टी एकताका लागि आफूहरु तयार रहेको तर सम्मानजनक एकता हुनुपर्ने बताए । 

फाइल तस्बिर : बिजु महर्जन, कान्तिपुर

नेपाल नेपालको भनाइ उद्धृत गर्दै केन्द्रीय सदस्य यज्ञराज सुनुवारले भने, 'पार्टी मैले बनाएको हुँ । एजेन्डामा हामीले जितेका छौं । केपी ओलीको ज्यादतीपूर्ण, निरंकुश कदमले अहिलेको अवस्था आएको हो । एकताको लागि तयार छौं तर सम्मानजनक एकता हुनुपर्छ ।'

बैठकको अध्यक्षता गर्दै नेता नेपालले एजेन्डामा आफूहरुले केपी ओलीलाई जितेको बताएका थिए ।

केन्द्रीय सदस्य जगन्नाथ खतिवडाले ओलीसँग लत्रिएर जानु आवश्यक नभएको बताएका थिए । उनले पनि समान हैसियतमा सहमति हुनुपर्ने धारणा राखेका थिए ।

बैठकमा केन्द्रीय सदस्यहरुले एकताका लागि हतार गर्न नहुने, ओलीसँग लत्रिन नहुने बताएका थिए । उनीहरुले अहिले ओलीलाई विगतमा गल्ती गरेको महसुस भएको र उनलाई एकता चाहिएको बताएका थिए । उनीहरुले आन्दोलनका उपलब्धि रक्षा गर्न भन्दै नेता नेपाललाई दबाब दिएका छन् ।

शुक्रबारसम्म चल्ने बैठकमा सहभागीहरुलाई ३/३ मिनेट बोल्नका लागि समय छुट्याइएको छ । बिहीबारको बैठकमा ७३ जनाले हस्ताक्षार गरेका छन् ।

प्रकाशित : श्रावण २१, २०७८ १७:१०
पूरा पढ्नुहोस्
प्रतिक्रिया
पठाउनुहोस्
×