अब सक्रिय राजनीतिमै रहन्छु : निवर्तमान प्रदेश प्रमुख पौडेल
कास्की — गण्डकी प्रदेशकी निवर्तमान प्रदेश प्रमुख सीताकुमारी पौडेलले आगामी दिनमा खुला राजनीतिमा नै सक्रिय रहने बताएकी छन् । पौडेलले बुधबार प्रदेश प्रमुखको निवासमा पत्रकारसँग भेटघाट गर्दै प्रदेश प्रमुख हुनुभन्दा अघिजस्तै पार्टीको खुला राजनीतिमा रहने बताएकी हुन् ।
‘म समाजको विकासका लागि हिजो जसरी सक्रिय थिएँ, आउने दिनमा पनि मेरो हैसियतमा रहेर निरन्तर क्रियाशील भइनै रहने छु’, उनले भनिन्, ‘संघीय लोकतान्त्रिक गण्तन्त्रको पक्षधर भएकाले पनि म पदमुक्त हुँदा कत्ति दुखी भएकी छैन । यस्ता निर्णय स्वाभाविक लाग्छन् । तर, राजनैतिक अस्थिरताले देश बन्दैन, यो सत्य हो ।’
सामाजिक परिवर्तनका लागि राजनीतिको निर्मम बाटो अपनाएर अघि बढेकाले पनि यस्ता निर्णय स्वाभाविक लाग्ने उनको तर्क थियो । विचार र आस्था फरक भए पनि राष्ट्रिय समृद्धिको पक्षमा भने साझा उद्देश्य लिएर अघि बढ्नुपर्ने उनले बताइन् । उनले गण्डकीमा रहँदा प्रदेशको बृहत् विकासको लागि शिक्षा, स्वास्थ्य, कृषि, पर्यटनमा जोड दिँदै सरकारसँग समन्वय गरेको बताएकी छन् ।
प्रदेश प्रमुख र सरकारबीच समन्वय गरेर अघि बढ्दा परिणाममुखी कार्य हुने उनको भनाइ थियो । ‘प्रदेश प्रमुख शैक्षिक सुधार कार्यक्रम’ लाई जोड दिँदै आएको बताउँदै उनले अब आउने प्रदेश प्रमुखले पनि सो कार्यक्रमलाई निरन्तरता दिन आग्रह गरेकी छन् ।
पौडेल संविधानको धारा १६३ को उपधारा २ बमोजिम राष्ट्रपति विद्यादेखी भण्डारीबाट २०७८ वैशाख २० मा नियुक्त भएकी थिइन् । केपी शर्मा ओली नेतृत्वको सरकारले माओवादीका अमिक शेरचनलाई पदमुक्त गर्दै पौडेललाई प्रदेश प्रमुखमा नियुक्त गरेको थियो । २ महिना २४ दिनको कार्यकालमा विधि र प्रक्रियालाई नै आत्मसाथ गरेको उनले बताइन् । ओलीको पालामा गण्डकीबाट पदमुक्त बनेका शेरचन मंगलबार राष्ट्रपतिबाट पुन: लुम्बिनी प्रदेशको प्रमुखमा नियुक्त भएका छन् । शेरचन भन्दा अघि प्रदेश प्रमुखको रुपमा कांग्रेसका बाबुराम कुँवर थिए । तत्कालीन नेकपाले कुँवरलाई हटाउँदै शेरचनलाई नियुक्त गरेको थियो । प्रदेश प्रमुखमा सवैभन्दा छोटो कार्यकाल पौडेलको रहेको छ । उनी मंगलबार पदमुक्त भएकी हुन् ।
प्रकाशित : श्रावण १३, २०७८ १६:१२