सप्तरीको तोपामा जब पस्यो बाढी- समाचार - कान्तिपुर समाचार
कान्तिपुर वेबसाईट
AdvertisementAdvertisement

सप्तरीको तोपामा जब पस्यो बाढी

अवधेशकुमार झा

सप्तरी — मंगलबारको बिहान । तिलाठी कोइलाडी–८ तोपा बस्तीमा इनरदेवी यादव खाना पकाउन आँगनको चुलोका लागि गुइँठा र दाउराका झिक्रा तयार पार्दै थिइन् । पति रामविलास नजिकैको तोपाचोकमा चिया खान गएका थिए । इनरदेवीले चुलोमा आगो जोर्नै लाग्दा पानीको भेल आँगनमा पस्यो ।

हेर्दाहेर्दै चुलो छोपियो, भाँडाकुँडा पानीमा तैरिन थाले । एकछिन त उनी अक्क न बक्क भइन् । भाँडाकुँडा बटुलेर राख्न नभ्याउँदै पानी घरमा पस्यो । भित्रका सामान भिजाउन थाल्यो । ओढ्ने–ओछ्याउनेसँगै भिज्न नहुने सामान हतारहतार खाटमा राखेर जोगाइन् ।

मंगलबार बिहान ८ बजे तोपामा पसेको बाढीले समस्यामा परेका इनरवती मात्रै थिइनन् । करिब ५० घरआँगन जलमग्न भए । बुधबार साँझ बाढी घटेको छ । तर घरआँगन हिलाम्य छ । पकाउन, खान र सुत्न समस्या भएको छ । ‘म चोकबाट फर्किंदा घरभित्र तीन फिटसम्म पानी थियो,’ रामविलासले भने, ‘मंगलबार न बिहानको खाना पकाउन पायौं न त रातिको । पानी घटेपछि आज (बुधबार) बल्ल सास फर्किए जस्तो भएको छ ।’

वर्षाको पानीको उचित निकास नहुँदा तोपा डुबानमा परेको हो । ‘घरैघर पानी पसेपछि हाम्रो हाल बेहाल भएको छ,’ स्थानीय बन्ठु यादवले भने । गाउँपालिकाको विपद् व्यवस्थापन शाखाका कर्मचारी राजेशकुमार झाले पानीको सतह घट्दै गएपछि तोपामा केही सहज भएको बताए ।

उता निरन्तरको वर्षासँगै खाडो र जिता खोलामा आएको बाढीले हनुमाननगर कंकालिनी–१४ को मल्हनियालाई घेरेको छ । चारैतिर जलमग्न भएपछि उक्त बस्तीका करिब ३ सय परिवारको बाहिर आउजाउ बन्द भएको छ ।

प्रकाशित : श्रावण ७, २०७८ ०८:०५
प्रतिक्रिया
पठाउनुहोस्

लक्ष्यभन्दा बढी राजस्व संकलन

निषेधाज्ञाले विभिन्न पेसा, व्यवसाय ठप्प भए पनि राजस्व संकलनमा वृद्धि
कान्तिपुर संवाददाता

काभ्रे — कोरोना संक्रमणको दोस्रो लहरमा गरिएको निषेधाज्ञाले विभिन्न पेसा, व्यवसाय ठप्प भए पनि गत आर्थिक वर्ष २०७७/७८ मा राजस्व संकलनमा भने वृद्धि भएको छ । काभ्रे, सिन्धुपाल्चोक, दोलखा र रामेछाप कार्यक्षेत्र भएको आन्तरिक राजस्व कार्यालय धुलिखेलले लक्ष्यभन्दा बढी राजस्व संकलन गरेको हो ।

वैशाख १६ बाट जारी निषेध आदेश कायम रहे पनि सामाजिक दूरी कायम गर्दै पेसा, व्यवसाय सञ्चालन गर्न अनुमति दिइएको छ । पहिलो लहरको संक्रमणका बेला भने लक्ष्य पूरा हुन सकेको थिएन ।

गत वर्ष २ अर्ब ९३ करोड ४३ लाख २९ हजार रुपैयाँ राजस्व संकलन गर्ने लक्ष्य राखिएकामा ३ अर्ब ९६ करोड १ लाख २४ हजार रुपैयाँ संकलन भएको प्रमुख राजस्व अधिकृत कमलबहादुर राजलवटले जानकारी दिए । उक्त अंक लक्ष्यको १३४.९६ प्रतिशत हो । ‘गत वर्षको भन्दा यो वर्ष निषेधाज्ञाको अवधि कम भएकाले पनि लक्ष्य पूरा भएको हुन सक्छ,’ राजलवटले भने, ‘कर सचेतना र अनुगमन पनि बढाएका थियौं ।’ उनका अनुसार असारमा मात्रै ७४ करोड ८ लाख रुपैयाँ राजस्व उठेको थियो ।

आन्तरिक राजस्व कार्यालय काभ्रेले रामेछाप र दोलखामा भएका दुई करदाता सेवा कार्यालय र धुलिखेलबाट काभ्रे र सिन्धुपाल्चोकका करदाताबाट राजस्व असुली गर्छ । वस्तु, सेवामा लाग्ने कर, आयकर, मूल्य अभिवृद्धि कर, अन्तःशुल्कलगायतका राजस्व आन्तरिक राजस्व कार्यालयमार्फत संकलन हुन्छन् । गत आवमा १ अर्ब ९३ करोड २ लाख ८८ हजार आयकर, १ अर्ब ४१ करोड ६४ लाख २७ हजार मूल्य अभिवृद्धि कर, ३२ करोड १८ लाख ५८ हजार अन्तःशुल्क, २३ करोड ८३ लाख ५२ हजार ब्याज कर र ५ करोड ३१ लाख ७६ हजार रुपैयाँ घर बहाल कर संकलन भएको छ ।

काभ्रे, सिन्धुपाल्चोक, रामेछाप र दोलखामा गरी ३८ हजार २ सय ६५ करदाता व्यक्तिगत प्यानमा, ३३ हजार २ सय ५३ जना आयकरमा, ४ हजार २ सय ४९ जना मूल्य अभिवृद्धि करमा, १ हजार ४ सय ७५ जना अन्तःशुल्कमा, ८ सय जना संस्थागत प्यानमा आबद्ध छन् । अघिल्लो आवमा भने लक्ष्यभन्दा कम राजस्व संकलन भएको थियो । ३ अर्ब ३० करोड ८६ लाख २० हजार रुपैयाँ अनुमान गरिएकामा २ अर्ब ७८ करोड ५४ लाख ६६ हजार रुपैयाँ मात्रै राजस्व संकलन भएको थियो । उक्त रकम लक्ष्यको ८४.१९ प्रतिशत हो ।

प्रकाशित : श्रावण ७, २०७८ ०७:५९
पूरा पढ्नुहोस्
प्रतिक्रिया
पठाउनुहोस्
×