नेपालपक्षीय सांसदको सर्त– ‘ओलीले अध्यक्ष छाडे मात्रै एमाले एकता’

नेपाल समूहले पनि अब ओलीसँग मिल्ने सम्भावना नरहेको निष्कर्षमा पुग्दै आफ्नो समूहको छलफल र भेलालाई तीव्रता दिएको छ ।

ओली समूहले मंगलबार आफ्नो भ्रातृ संगठन युवा संघलाई वरिष्ठ नेता माधवकुमार नेपालविरुद्ध सडकमा उतारेको छ । ओलीद्वारा ‘गद्दार’ घोषित नेता नेपालको विरोधमा ओलीनिकट युवाले राजधानीमा बाँदरको वेशमा ‘बाँदरे जुलुस’ प्रदर्शन गरेका थिए । नेपाल समूहले भने मंगलबार देउवालाई विश्वासको मत दिएका २२ सांसदसँग छलफल गर्‍यो । बुधबारका लागि केन्द्रीय कमिटी र सांसदहरूको बैठक बोलाइएको छ ।

मंगलबारको बैठकमा २२ जना सांसदले अब ओलीले अध्यक्ष पदबाट राजीनामा दिए मात्र एकताको प्रक्रियामा फर्किन सक्ने धारणा राखेका छन् । उता ओलीपक्षीय केन्द्रीय कमिटी बैठकमा नेता नेपाललाई छिटो पार्टीबाट निष्कासन गर्नुपर्ने माग उठिरहेको छ । ‘पार्टी एकता गर्न चाहने हो र अझै पनि लोकतन्त्रलाई बचाउन चाहने हो भने मार्ग प्रशस्त गर्नुपर्छ पार्टी अध्यक्ष छाड्नुपर्छ,’ सांसद रामकुमारी झाँक्रीले भनिन्, ‘त्यसले एमाले एकताबद्ध पनि हुन्छ । र, हामी नयाँ ढंगले अगाडि जान सक्छौं । होइन भने हामीसँग पटक–पटक बदलाको भावना राखेर हुँदैन भन्ने कुरा पनि आयो ।’

देउवालाई विश्वासको मत दिएपछि आफूहरूको भूमिका के हुने भन्नेबारे पनि सामान्य छलफल भएको झाँक्रीले बताइन् । ‘संविधान, लोकतन्त्र र संसद्लाई बचाउन भएका प्रयत्नका साथै सरकारलाई विश्वासको मत दिएपछि स्वभावैले हाम्रो भूमिका के हुन्छ भन्नेबारे पनि छलफल भयो,’ उनले भनिन्, ‘हामी एमालेको संसदीय दलका सदस्य हौं । यही बेला एमाले विपक्षमा छ । त्यसकारण कानुन र अरू जटिलताले सरकारमा जाने कुरा भएन ।’

अर्का सांसद विरोध खतिवडाले अझै केही सांसद र केन्द्रीय सदस्यलाई आफ्नो समूहमा गोलबद्ध गरेर पार्टी संगठनमा बलियो उपस्थिति जनाउने विषयमा छलफल भएको बताए । ‘केपी अझै सुध्रिएनन्, केन्द्रीय कमिटीको बैठक राखेर स्पष्टीकरण सोधिएको हल्लाधारी विषयमा पनि छलफल भयो । साथै आउने दिनमा हामी अझ बलियो हुने, अरू सांसद र थप केन्द्रीय सदस्यलाई गोलबद्ध गर्दै पार्टी संगठनमा बलियो उपस्थिति जनाउने र त्यहीअनुसार देशव्यापी रूपमा संगठन बलियो बनाउने विषयमा पनि छलफल भयो ।’

खतिवडाका अनुसार बुधबारदेखि नेपाल समूहको आगामी कदमबारे निर्णायक छलफल हुनेछ । बुधबार नेता नेपालले स्थायी कमिटीका सदस्यहरूसँग र बिहीबार केन्द्रीय कमिटीका सदस्यहरूसँग छलफल गर्ने उनले बताए । ‘केपीको ज्यादतीविरुद्ध लडाइँ यथावत् छ । उनी सुध्रिन्छन् र गल्ती स्वीकार गर्छन् भने पार्टी एकताको प्रयास अगाडि बढ्छ,’ उनले भने, ‘अहिलेकै ढंगबाट अगाडि बढे भने हामी अलग कोर्समा जान्छौं भनेर पहिलादेखि नै भन्दै आएका छौं । त्यसबारे स्थायी र केन्द्रीय कमिटीमा खास छलफल हुनेछ ।’ एमाले केन्द्रीय कमिटीको सोमबार बसेको बैठकले पार्टी निर्णयविपरीत देउवालाई विश्वासको मत दिएका २२ सांसदसँग २४ घण्टाभित्र स्पष्टीकरण माग गर्ने निर्णय गरेको थियो । खतिवडाका अनुसार मंगलबारसम्म स्पष्टीकरण माग गरिएको पत्र पुगेको छैन ।

‘स्पष्टीकरणको पत्र तयार छ’

प्रधानमन्त्री देउवालाई विश्वासको मत दिने वरिष्ठ नेता नेपालसहितका सांसदमाथिको कारबाहीबारे मंगलबार बसेको एमाले केन्द्रीय कमिटी बैठकले निर्णय गर्न सकेन । ललितपुरको च्यासलस्थित तुलसीलाल स्मृति प्रतिष्ठानमा बसेको दोस्रो दिनको केन्द्रीय कमिटी बैठकले कारबाहीबारे कुनै निर्णय नगरेको प्रवक्ता प्रदीप ज्ञवालीले बताए । सोमबार त्यहीं बसेको बैठकले नेपालसहित २२ सांसदलाई २४ घण्टे स्पष्टीकरण सोध्ने निर्णय गरेको थियो ।

स्पष्टीकरण सोधेको २४ घण्टा पूरा नभएका कारण कारबाहीबारे निर्णय नभएको ज्ञवालीले बताए । उनका अनुसार स्पष्टीकरण पत्र तयार छ । पत्र बुझेको २४ घण्टापछि मात्रै त्यसबारे निर्णय हुनेछ । बैठकमा विभिन्न प्रदेश कमिटीका अध्यक्षहरूले संगठनात्मक अवस्थाबारे रिपोर्ट प्रस्तुत गरेका थिए ।

‘विभिन्न प्रदेश कमिटीका अध्यक्षहरूले आफ्नो प्रदेशमा संगठनात्मक अवस्था, राजनीतिक शक्ति सन्तुलनको अवस्था, भोलि पार्टीबाट केही मान्छे बाहिरिँदा एमालेको अवस्था कस्तो हुन सक्छ भन्नेबारे सुझावसहितको रिपोर्ट प्रस्तुत गर्नुभयो,’ ज्ञवालीले भने । बैठक बुधबार पनि बस्ने भएको छ ।