सप्तरीका ६ सय घर डुबानमा - समाचार - कान्तिपुर समाचार

सप्तरीका ६ सय घर डुबानमा 

अवधेशकुमार झा, सन्तोष सिंह

सप्तरी, धनुषा — लगातारको वर्षाले खोलाहरूमा बाढी आउँदा मंगलबार सप्तरीका आधा दर्जन पालिकाका बस्ती जलमग्न भएका छन् । त्रियुगा नदीसँगै सहायक खोलानालामा आएको बाढी चन्द्रनहरको बाँध भत्काएर आसपासको बस्तीमा पसेको हो । सप्तकोसी, कञ्चनरूप, तिरहुत र महादेवाका विभिन्न भागमा बाढी पस्दा करिब ६ सय घर डुबानमा परेका छन् । 

डुबानमा परेको सप्तरीको तिलाठी कोइलाडी गाउँपालिका-८ स्थित तोपा बस्ती ।

उता धनुषामा कमला नदीमा आएको बाढीले बाँध लगातार कटान भइरहेको छ । बाँध भत्किए बाढी धनुषाको पूर्वीक्षेत्रका बस्तीमा पस्ने जोखिम बढेको छ । बाँध जोगाउन सेना, सशस्त्र प्रहरीसँगै स्थानीय बासिन्दा मिलेर काम गरिरहेका छन् ।

सप्तरीको अमहा, टेंग्रालगायतका खोलाको बाढी बस्तीमा पस्दा सप्तकोसी नगरपालिकाका करिब ३ सय घर डुबानमा परेका छन् । नगरप्रमुख उत्तम गौतमका अनुसार १, २, ४ र ११ नम्बर वडाका बस्ती जलमग्न भएका हुन् । ३ फिटसम्म पानी बगिरहेको उनले बताए । जिता नदीको पानी सप्तरीकै तिलाठी कोइलाडी–७ मंसापुर र वडा ५ को बरसाइनका केही घरमा पसेको छ । तिलाठी कोइलाडी गाउँपालिकाका अध्यक्ष सतीशकुमार सिंहका अनुसार करिब २ सय ७५ घर डुबानमा परेका छन् । वर्षाको पानीले निकास नपाउँदा वडा ८ को तोपामा २५ घर डुबानको चपेटमा परेका छन् ।

चन्द्रनहर मुलुककै पहिलो सिँचाइ आयोजना हो । यो सिँचाइ प्रणालीको मूल नहर मंगलबार ५ ठाउँमा भत्किएको छ । अविरल वर्षाका कारण त्रियुगा, अमहा, महुली, टेंग्रा र सुन्दरीलगायतका नदीमा आएको बाढीले चन्द्रनहरको मूल नहर भत्किएको हो । सप्तकोसी नगरपालिका–४ मा नहरको दायाँ डिल भत्किएको कोसी पम्प चन्द्रनहर सिँचाइ डिभिजन कार्यालयका प्रमुख राजेन्द्र साहले बताए । ‘२५ मिटर लामो र १२ मिटर चौडाइमा नहरको डिल भत्किएको छ,’ उनले भने । यसैगरी कञ्चनरूप नगरपालिका–३ सुबाटोलस्थित नहरको दायाँ डिल ३५ मिटर भत्किएको छ ।

कमला नदीको बाढी धनुषाका बस्तीहरूमा पस्ने जोखिम बढेपछि मंगलबार सबैला–१३ किरतपरमा कटान रोकथाम गरिँदै। तस्बिर : सन्तोष सिंह/कान्तिपुर

तिरहुत गाउँपालिकामा पर्ने मयनाकरेडीमा नहरको दायाँतर्फ १० मिटर र बायाँतर्फ २५ मिटर डिल भत्किएको छ भने महादेवा गाउँपालिका–१ र बन्द्रा खोला नहर प्रणालीमा पनि कटान भएको छ । निरन्तरको वर्षाले नदीमा बाढी आउँदा नहरका संरचना क्षतिग्रस्त भएको डिभिजन प्रमुख साहले बताए ।

त्रियुगा नदीको पानी ल्याइएको चन्द्रनहरले सप्तरीका विभिन्न भागमा सिँचाइ सुविधा पुर्‍याएको छ । नहर विभिन्न ठाउँमा बाढीले भत्काएपछि फत्तेपुरस्थित हेडवर्क्सबाट निकासी बन्द गरिएको थियो । तर पानी ओभरफ्लो भई नहर भत्काउँदै बस्ती र खेतीयोग्य जमिनमा पसेको हो । श्री ३ चन्द्रशमशेरको पालामा देशकै पहिलो सिँचाइ प्रणालीको रूपमा सिभिल इन्जिनियर डिल्लीजंग थापाले नहर डिजाइन गरेका हुन् । वि.सं. १९८५ मा सुरु भएर पाँच वर्षमा निर्माण पूरा भएको उक्त नहर हालसम्म प्रयोगमा छ । १० हजार ५ सय हेक्टर जग्गामा सिँचाइ हुने भनिएको नहर बर्सेनि क्षतिग्रस्त हुँदै गएको छ ।

उता कमला नदीमा आएको बाढीले धनुषाको सबैला नगरपालिका–१३ किरतपुरमा २ सय ७० मिटर बाँध कटान गरेको छ । बाढीले बाँध कटान गरिरहेकाले पानी बस्तीमा पस्ने जोखिम रहेको कमला नदी नियन्त्रण आयोजनाका इन्जिनियर गुद्री यादवले बताए । ‘कमलाको बाढीले ठाउँ–ठाउँमा ६ सय मिटर बाँध कटान गरेको छ,’ उनले भने, ‘किरतपुरमा बाढी बस्तीमा पस्नै लागेको छ । बाँधको ८० प्रतिशतभन्दा बढी भाग बाढीले बगाएको छ । कटान रोकथामको प्रयास भइरहेको छ ।’ कमलाको कटान रोक्न दिनभर सुरक्षाकर्मी र स्थानीयले प्रयास गरेको धनुषाका प्रमुख जिल्ला अधिकारी बन्धुप्रसाद बाँस्तोलाले बताए ।

प्रकाशित : श्रावण ६, २०७८ ०६:३५
प्रतिक्रिया
पठाउनुहोस्

नेपाल समूहको नयाँ सर्त : एकताका लागि अध्यक्षबाट ओलीको राजीनामा

कान्तिपुर संवाददाता

काठमाडौँ — विवाद समाधान कार्यदलले तयार पारेको १० बुँदे सहमति प्रस्तावलाई अस्वीकार गरेको एमालेको असन्तुष्ट समूहले एकताका लागि पार्टी अध्यक्षबाट केपी शर्मा ओलीको राजीनामा आउनुपर्ने नयाँ सर्त अघि सारेको छ । 

फाइल तस्बिर

प्रधानमन्त्री शेरबहादुर देउवालाई विश्वासको मत दिएका एमालेका २२ सांसदले ओलीले अध्यक्ष पदबाट राजीनामा दिएर एकताको प्रक्रिया सुरु गर्न आग्रह गरेका छन् । वरिष्ठ नेता माधवकुमार नेपालले प्रधानमन्त्री देउवालाई विश्वासको मत दिने सांसदसँग मंगलबार छलफल गरेका थिए । उक्त छलफलमा ओलीले अध्यक्ष पद छाडेमात्रै पार्टी एकता प्रक्रिया अगाडि बढ्ने धारणा सांसदहरुले राखेका हुन् । ‘तपाईंले पार्टी एकता गर्न चाहनुहुन्छ, अझै पनि लोकतन्त्रलाई बचाउन चाहनुहुन्छ भने मार्गप्रशस्त गर्नुस् । तपाईंले पार्टी अध्यक्ष छोड्नुस्,’ झाँक्रीले भनिन्, ‘त्यसले नेकपा एमाले एकताबद्ध पनि हुन्छ । र, हामी नयाँ ढंगले अगाडि जान सक्छौं । होइन भने हामीसँग पटक-पटक बदलाको भावना राखेर हुँदैन ।’

यसअघि नेपाल समूहले एकताका लागि ओलीले प्रधानमन्त्री वा पार्टी अध्यक्षमध्ये एक पद छाड्नुपर्ने सर्त राख्दै आएको थियो । असार २८ मा सर्वोच्च अदालतले प्रतिनिसधसभा पुन:स्थापना र देउवालाई प्रधानमन्त्रीमा नियुक्त गर्न परमादेश दिएसँगै ओली पदमुक्त भएका थिए । ओलीले प्रधानमन्त्री पद गुमाएसँगै एमालेको नेपाल समूहले एकताका लागि पार्टी अध्यक्ष छाड्नुपर्ने सर्त सारेको हो । बैठकमा नेपालले भने ओलीका गतिविधि हेरेर सामूहिक रुपमा आवश्यक निर्णय लिइने बताएका थिए ।

देउवालाई विश्वासको मत दिएपछि आफूहरुको भूमिका के हुने भन्नेबारे पनि सामान्य छलफल भएको झाँक्रीले बताइन् । ‘संविधान, लोकतन्त्र र संसद्‌लाई बचाउन भएका प्रयत्नका साथै सरकारलाई विश्वासको मत दिएपछि स्वभावैले हाम्रो भूमिका के हुन्छ भन्नेबारे पनि छलफल भयो,’ उनले भनिन्, ‘हामी एमालेको संसदीय दलका सदस्य भएको हुँदा यदि बेला एमाले विपक्षमा छ । त्यसकारण विद्यमान कानुन, अरु जटिलताले सरकारमा जाने कुरा भएन ।’

अर्का सांसद विरोध खतिवडाले अझै केही सांसद र केन्द्रीय सदस्यलाई आफ्नो समूहमा गोलबद्ध गरेर पार्टी संगठनमा बलियो उपस्थिति जनाउने विषयमा छलफल भएको बताए । ‘केपी अझै सुध्रिएनन्, केन्द्रीय कमिटीको बैठक राखेर स्पष्टीकरण सोधिएको हल्लाधारी विषयमा पनि छलफल भयो । साथै आउने दिनमा हामी अझ बलियो हुने, अरु सांसदहरु र थप केन्द्रीय सदस्यहरुलाई गोलबद्ध गर्दै पार्टी संगठनमा बलियो उपस्थिति जनाउने । र, त्यहि अनुसार देशव्यापी रुपमा संगठन बलियो बनाउने भन्ने विषयमा पनि छलफल भयो ।’

उनका अनुसार बुधबारदेखि नेपाल समूहको आगामी कदमबारे निर्णायक छलफल हुने भएको छ । सोहीअनुसार बुधबार नेता नेपालले स्थायी कमिटीका सदस्यहरुसँग र बिहीबार केन्द्रीय कमिटीका सदस्यहरुसँग छलफल गर्ने खतिवडाले बताए ।

‘केपीको ज्यादतीको विरुद्धमा लड्ने लडाइँ यथावत छ । उनी सुध्रिन्छन् र गल्ती स्वीकार गर्छन् भने पार्टी एकताको प्रयास अगाडि बढ्छ,’ उनले भने, ‘अहिलेकै ढंगबाट अगाडि बढे भने हामी अलग कोर्समा जान्छौं भनेर पहिलादेखि नै भन्दै आएका छौं । त्यसबारे स्थायी र केन्द्रीय कमिटीमा खास छलफल हुनेछ ।’

सोमबार बसेको एमाले केन्द्रीय कमिटी बैठकले पार्टी निर्णयविपरीत देउवालाई विश्वासको मत दिने २२ सांसदलाई २४ घण्टाभित्र स्पष्टीकरण माग्ने निर्णय गरेको थियो । खतिवडाका अनुसार मंगलबारसम्म स्पष्टीकरण माग गरिएको पत्र पुगेको छैन ।

प्रकाशित : श्रावण ५, २०७८ २२:५६
पूरा पढ्नुहोस्
प्रतिक्रिया
पठाउनुहोस्
×