जसपा संसदीय दलको विधान पारित, अनुमोदनका लागि कार्यकारिणी समितिमा पठाइने

'बैठकमा मस्यौदा प्रस्तुत भई व्यापक छलफल भयो । छलफलको क्रममा माननीय सदस्यहरुबाट आएका सुझावहरु समेतलाई समावेश गरी संघीय संसदीय दलको विधान २०७८ पारित गर्ने निर्णय गरियो,' बैठकको निर्णयमा भनिएको छ ।

बैठकमा विधानका सम्बन्धमा प्राप्त सुझावहरुलाई समावेश गर्न सांसदहरु रामसहायप्रसाद यादव र मोहम्द इस्तियाक राईजलाई जिम्मेवारी दिने निर्णयसमेत भएको छ । उक्त विधानलाई अनुमोदनका लागि पार्टीको केन्द्रीय कार्यकारिणी समितिमा पठाउने निर्णय भएको अध्यक्ष उपेन्द्र यादवको सचिवालयले जनाएको छ ।

संसदीय दलका जेष्ठ सदस्य महिन्द्रराय यादवको अध्यक्षतामा बसेको बैठकमा २२ जना सांसद उपस्थित थिए । दलको अर्को बैठकले संसदीय दलको नेता चयन गर्नुका साथै सरकारमा सहभागी हुने मन्त्रीहरुको नाम टुङ्गो लगाइने छ ।

३२ सांसद रहेको जसपा दुई समूहमा विभाजित छ । उपेन्द्र यादव-बाबुराम भट्टराई पक्षमा २२ र महन्थ ठाकुर-राजेन्द्र महतोको पक्षमा १० सांसद मात्र देखिएका छन् ।