कांग्रेस महाधिवेशनमा 'डिजिटल भोटिङ'- समाचार - कान्तिपुर समाचार
कान्तिपुर वेबसाईट
AdvertisementAdvertisement

कांग्रेस महाधिवेशनमा 'डिजिटल भोटिङ'

कान्तिपुर संवाददाता

काठमाडौँ — कोरोना महामारी नरोकिए नेपाली कांग्रेसले महाधिवेशनमा डिजिटल भोटिङमार्फत नेतृत्व चयन गर्ने भएको छ । कांग्रेसको केन्द्रीय सूचना, सञ्चार तथा प्रचार विभागको तेस्रो पूर्ण बैठकले डिजिटल भोटिङको अवधारणालाई अन्तिम रुप दिँदै आगामी दिनहरुमा प्रयोग गर्न सकिने गरी आन्तरिक डिजिटल भोटिङको व्यवस्था गरेको हो । 

विभागका प्रमुख एवं पार्टी प्रवक्ता विश्वप्रकाश शर्माको सभापतित्वमा बसेको बैठकले कोरोना महामारी न्यून भएर महाधिवेशन भौतिक रुपमै आयोजना गर्न सकिने आशाका बावजुद ‘डिजिटल भोटिङ’ को आफ्नै आन्तरिक प्रविधि विकास र सुनिश्चित गरेको विभागका सचिव दिनेश थापा मगरले जानकारी दिए ।

बैठकले केन्द्रीय समितिले जरुरी ठहर गरेर निर्णय गरेका खण्डमा शून्यबाट सुरु गर्नु नपर्ने गरी विकास गरिएको प्रविधि तत्काल आवश्यक नपर्दा भविष्यका लागि पार्टीसँग प्रविधिको सम्पत्ति र सक्षमता सुरक्षित हुने उनले बताए ।

७७ जिल्ला पार्टी कार्यालयमा उपस्थित भएर प्रदेश अधिवेशन र महाधिवेशनका प्रतिनिधिले मतदान गर्न सक्ने व्यवस्था गरिएको प्रविधिमार्फत १४ औं महाधिवेशनमै केन्द्र र ७ प्रदेशको निर्वाचन सम्बन्धी सबै प्रक्रिया सम्पन्न गर्न सकिने विभागले जनाएको छ ।

डिजिटल भोटिङको नमुना प्रदर्शनीको आन्तरिक कार्य योजनासमेत बैठकले तय गरेको छ । जिल्ला तहसम्म प्रविधि प्रशिक्षण र सहजीकरणका लागि दक्ष इन्जिनियरहरुको नेटवर्क तयार गरिएको सचिव थापामगरद्वारा जारी विज्ञप्तिमा उल्लेख छ ।

प्रकाशित : श्रावण ५, २०७८ १४:४५
प्रतिक्रिया
पठाउनुहोस्

र्‍यापर क्रिस वूलाई यौन दुर्व्यवहारको आरोप

कान्तिपुर संवाददाता

काठमाडौँ — चर्चित चिनियाँ र्‍यापर तथा कलाकार क्रिस वूलाई यौन दुर्व्यवहारको आरोप लागेको छ । कम उमेरका किशोरी तथा युवतीसँग यौन सम्बन्धका लागि प्रलोभन देखाएको आरोप लागेसँगै विभिन्न ब्रान्डले उनीसँगको सम्झौता तोडेका छन् ।

सामाजिक सञ्जालमा यो आरोपमाथि बहस चर्किएको छ । कतिले उनलाई मनोरञ्जन क्षेत्र त्यागेर देशसमेत छोड्नुपर्ने अभिव्यक्ति दिएका छन् । वू चिनियाँ-क्यानडेली र्‍यापर एवं कलाकार हुन् । १९ वर्षिया डु मैज्हुले यौन दुर्व्यवहारको आरोप लगाएसँगै क्रिस विवादमा तानिएका हुन् । डुले केही हप्तादेखि सामाजिक सञ्जालमा वूले किशोरीहरुलाई संगीत र अभिनय क्षेत्रमा काम दिने भन्दै यौन सम्बन्ध राख्न प्रलोभन देखाएको कुरा सार्वजनिक गर्दै आएकी छन् ।

आइतबार मात्रै एक अन्तर्वार्तामा उनले आफूसहित वूबाट पीडित अन्य ७ जना महिलाबारे जानकारी रहेको बताएकी छन् । तीमध्ये दुई त निकै कम उमेर समूहका रहेको उनले बताएकी छन् । वूसँग पहिलोपटक भेट्दा आफू १७ वर्ष रहेको उनले दाबी गर्दै आएकी छन् । डुले आफूलाई अन्य किशोरीहरुसँग घर बोलाएर वूले मद्यपानका लागि दबाब दिएको र भोलिपल्ट आफू वूको ओच्छ्यानमा ब्युँझिएको बताएकी छन् ।

वूले भने आफूमाथि गलत आरोप लगाएको भन्दै गालीबेइज्जती सम्बन्धी उजुरी दर्ता गराएको कुरा बीबीसीले उल्लेख गरेको छ ।

के–पप ब्यान्ड 'एक्सो'को सदस्यका रुपमा एसियामा वू चिनिएका थिए । तर सन् २०१४ मा चीन फर्केर उनले गायनसँगै मोडलिङ र अभिनयमा करियर सुरु गरे । उनले मिस्टर सिक्स(२०१५), जर्नी टु दि वेस्ट : द डेमन्स स्ट्राइक ब्याक(२०१७) लगायत भिन डिजेलसँग 'त्रिपल एक्स : रिटर्न अफ जान्डर केज' र 'भलेरियन एण्ड दि सिटी अफ अ थाउजेन्ड प्लानेट्स'मा अभिनय गरेका छन् ।

चिनियाँ अखबार ग्लोबल टाइम्समा वूले डुलाई आफ्नो कुरा बाहिर नल्याउन ७७ हजार १ सय ६६ डलर दिन खोजेको समेत उल्लेख गरेको छ ।

प्रकाशित : श्रावण ५, २०७८ १४:११
पूरा पढ्नुहोस्
प्रतिक्रिया
पठाउनुहोस्
×