माथिल्लो मनाङ फड्केको भरमा- समाचार - कान्तिपुर समाचार

माथिल्लो मनाङ फड्केको भरमा

चामेबाट माथिल्लो क्षेत्र पुग्ने डेढ किलोमिटर बाटो बाढीले भत्काएको छ, कडा चट्टानी भीरमा नयाँ ट्य्राक खोल्न काम सुरू भएन 
आश गुरुङ

लमजुङ — जेठ १४ मा मनाङमा पहिलो पटक भीषण बाढी आयो । तिमाङखोला छहरा र माथिल्लो क्षेत्रमा काठेपुल बगायो । थान्चोक र तिमाङबीचको काठेपुल पनि बगायो । जेठ ३१ को बाढीले तिमाङखोलाको बेलिब्रिज र स्याल्क्युखोला लघु जलविद्युत् आयोजना पनि बगायो ।

माथिल्लो मनाङमा सडक बगाएपछि भ्राताङको पहिरोमा आउजाउ गर्न काठको फलेक राखेर बनाइएको फड्के । तस्बिर : कान्तिपुर

त्यतिबेला मर्स्याङ्दीको बाढीले नासों गाउँपालिका–१ तालबजार डुबाएको थियो । चामेमा ५ घर डुबाएको थियो । घट्टेखोलाले ५ घर बगाएको थियो । असार २ को बाढीले धारापानीमा नासों गाउँपालिका कार्यालय, २ वटा बैंकका कार्यालयसहित १० घर बगायो । त्यहीबेला बेंसीसहर–चामे सडकको मनाङ खण्ड तालगाउँदेखि चामेसम्म तहसनहस बनायो ।

त्यतिबेला धेरैलाई माथिल्लो मनाङको सडकबारे चासो थिएन । मनाङ ङिस्याङ गाउँपालिका–१ पिसाङका छिरिङ गुरुङका अनुसार तलेखुदेखि माथिल्लो क्षेत्र तहसनहस छ । माथिल्लो मनाङदेखि भ्राताङ भीर नजिकैसम्म मर्मतको काम भइरहेको छ । ‘भ्राताङ भीरबाट सडक निकाल्ने कुनै उपाय छैन । एग्रो मनाङ (स्याउ फार्म) का कर्मचारी र स्थानीयले काठको फड्के बनाएका छन् । जोखिम मोलेर त्यहींबाट वारपार हो,’ उनले भने, ‘केही गरी फड्के भाँचियो या हिँड्नेको खुट्टामात्रै ठोक्किएमा पनि सिधै मर्स्याङ्दीमा खसिन्छ । मर्स्याङ्दीको बाढीमा मिसिएपछि सास न लास ।’

मनाङका अगुवा विनोद गुरुङका अनुसार भ्राताङदेखि तलेखुसम्मको सडक सबै बिग्रिएको छ । मान्छे हिँड्न पनि गाह्रो छ । ‘मर्स्याङ्दीको बाढीले चट्टानमा बनेको बाहेक सबै सडक तानेको छ । गाडी त के, मान्छे हिँड्ने बाटोसमेत छैन,’ उनले भने । मर्स्याङ्दी छेउका सडक सबै बाढीले भत्काएको छ । ‘डेढ महिना भयो भ्राताङ भीरमाथि अलिअलि बाटो बनाएको छ । भ्राताङ भीर कटेर जानआउन कठिन छ,’ उनले भने ।

तल्लो क्षेत्रबाट मानिससमेत आउजाउ गर्न नसक्ने अवस्था आएपछि मुस्ताङबाट थोराङ्ला (५,६१६ मि.) उचाइको पास गरेर खच्चडमार्फत खाद्यान्न ल्याइएको छ । माथिल्लो मनाङमा खाद्यान्न नआएको डेढ महिना भयो । सडक नभएकाले तल (बेंसीसहर–चामे) बाट केही आउँदैन । भोकै हुने अवस्था आएपछि मुक्तिनाथ फेदीबाट दुई दिन लगाएर माथिल्लो मनाङमा खाद्यान्न आपूर्ति सुरु गरिएको हो । उनका अनुसार पिसाङमा दुई ट्रिप र खाङसारमा एक ट्रिप चामल, नुनतेल, दाललगायत खाद्यान्न ल्याइएको छ । उनका अनुसार मुक्तिनाथ फेदीसम्म सवारी चल्ने र त्यसपछि खच्चडमार्फत खाद्यान्न ल्याइएको हो ।

‘बेंसीसहरबाट गाडीमा ल्याउँदा प्रतिकिलो १० रुपैयाँ पर्थ्यो । अहिले मुस्ताङबाट थोराङला पास गरेर खच्चडमार्फत ल्याउँदा प्रतिकिलो ४० रुपैयाँ भाडा परेको छ,’ उनले भने । सबैभन्दा बढी मर्का मजदुरलाई परेको छ । ‘स्थानीयले १/२ महिना जोहो गरेका हुन्छन् । मजदुरले सकिनेबित्तिकै किनेर खाने हो । किनेर खानलाई दोकानमा खाद्यान्न छैन । तलबाट ल्याउने बाटो छैन,’ उनले भने ।

प्रमुख जिल्ला अधिकारी विष्णु लामिछानेका अनुसार माथिल्लो मनाङ पुग्ने करिब डेढ किलोमिटर बाटो छैन । भीर मात्रै भएकाले नयाँ बाटो खोल्न गाह्रो परेको उनले बताए । ‘भ्राताङदेखि तलेखुसम्मको बाटो खुलाउन सकिएको छैन,’ उनले भने ।

प्रकाशित : श्रावण ५, २०७८ ०७:२५
प्रतिक्रिया
पठाउनुहोस्

लमजुङमा करेन्ट लागेर बालिकाको मृत्यु

आश गुरुङ

लमजुङ — राइनास नगरपालिका–७ सालफेंदीमा करेन्ट लागेर ८ वर्षीया बालिकाको मृत्यु भएको छ ।

प्रहरीका अनुसार टेलिभिजन हेर्न भनी सेट्रोल बक्स छुँदा करेन्ट लागेर स्थानीय सृष्टि पाण्डेको मृत्यु भएको हो । जिल्ला प्रहरी कार्यालयका इन्सपेक्टर जगदिश रेग्मीका अनुसार सोमबार बिहान ७ बजेतिर करेन्ट लागेकी बालिकाको उपचारको क्रममा ८ बजेर ३५ मिनेटतिर मृत्यु भएको हो ।

करेन्ट लागेर घाइते भएकी सृष्टिको उपचारका क्रममा नजिकै गरमबेंसीस्थित सहोदर अस्पतालमा मृत्यु भएको रेग्मीले बताए । ‘बालिका टिभी खोल्न सेट्रोल बक्समा हात लगेछ । त्यहाँ तार सट भएर करेन्ट प्रवाह भएछ । हाई भोल्टेजका कारण बालिकालाई करेन्ट लागेर ढलिछन् । परिवारले उपचारको लागि अस्पताल पुर्‍याउँदा डाक्टरले मृत घोषणा गरे,’ उनले भने ।

डीएसपी कृष्णबहादुर कार्कीले आफै घटनास्थल पुगेर यसबारे अनुसन्धान थालिएको बताए । ‘टिभी हेर्ने भनेर बक्समा हात पुर्‍याउाँदा नांगो तारमा छुन पुगिछन् । करेन्ट लागेर भुइँमा ढलेपछि परिवारले हारगुहार गरी अस्प्ताल पुर्‍याएछन् । बालिका गम्भीर घाइते भएकाले अस्पताल नपुग्दै बाटैमा मृत्यु भएको देखियो,’ उनले भने ।

बालिकाको शवको बेंसीसहरस्थित जिल्ला अस्पताल लमजुङमा पोष्टमार्टम गरी साँझपख परिवारलाई जिम्मा लगाइएको छ । मृतक बालिका धमिलिकुवास्थित शैलपुत्री मावि कक्षा २ मा पढ्दै आएकी थिइन् ।

प्रकाशित : श्रावण ४, २०७८ १९:१४
पूरा पढ्नुहोस्
प्रतिक्रिया
पठाउनुहोस्
×