एमालेको केन्द्रीय कमिटी बैठक सुरु, नेपाल समूह अनुपस्थित

पार्टी विवाद समाधानका लागि बनाइएको कार्यदलमा भएको सहमतिअनुसार २०७५ जेठ ३ पछिको अवस्थाबाट बैठक सुरु गरिएको हो । त्यतिबेला माओवादीसँगको एकता अनुमोदन गर्न एमालेको केन्द्रीय कमिटीको ९औं बैठक बसेको थियो ।

बैठकमा पार्टीको विधान र आगामी महाधिवेशनबारे छलफल हुने एजेन्डा रहेको छ ।

बैठकमा वरिष्ठ नेता माधवकुमार नेपाल–झलननाथ खनाल समूह भने उपस्थित छैन । आइतबार प्रधानमन्त्री शेरबहादुर देउवालाई विश्वासको मत दिने नेताहरूको बारेमा पनि बैठकमा छलफल हुने बताइएको छ ।

माधवकुमार नेपालसहित एमालेका २२ जना सांसदले देउवालाई विश्वासको मत दिएका थिए । त्यसमा अध्यक्ष केपी शर्मा ओली पक्षकै ८ जना सांसद पनि थिए । देउवालाई १६५ जना सा‌ंसदले विश्वासको मत दिएका थिए ।