सर्वोच्चले संविधानलाई बचायो : भट्टराई- समाचार - कान्तिपुर समाचार
कान्तिपुर वेबसाईट
AdvertisementAdvertisement

सर्वोच्चले संविधानलाई बचायो : भट्टराई

कान्तिपुर संवाददाता

काठमाडौँ — जनता समाजवादी पार्टीका अध्यक्ष तथा प्रतिनिधिसभा सदस्य बाबुराम भट्टराईले सर्वोच्च अदालते संवैधानिक अंगका सबैको भूमिका स्पष्ट पारिदिएकोले आफ्नो भूमिकामा जिम्मेवारीपूर्वक लाग्नुपर्ने बताएका छन् ।

आइतबारको प्रतिनिधिसभा बैठकमा बोल्दै प्रतिनिधिसभा सदस्य भट्टराईले प्रतिनिधिसभा सदस्यलेसमेत आफ्नो भूमिकाबारे स्पष्ट नभएको भन्दै सर्वोच्चले सबैको भूमिकालाई स्पष्ट पारिदिएको बताएका हुन् । सर्वोच्च अदालतले सुन्दर ढंगले संवैधानिक व्याख्या गरेर संविधानलाई बचाएको पनि उनले बताए । उनले भने, ‘प्रतिनिधिसभा र यसका सदस्यहरुले सायद हाम्रो शक्ति चिनेको छैनौं । अहिलेको सर्वोच्च अदालतको फैसलामा राष्ट्रपति, प्रधानमन्त्री, न्यायालय हुँदै प्रतिनिधिसभा, सभामुखसमेतको अधिकार क्षेत्रको, कर्तव्यको त्यहाँ मूल्यांकन गरिएको छ । दिशानिर्देश गरिएको छ । व्याख्या गरिएको छ । हामीले आफैले लेखेको संविधान आफैं बिर्सिएको थियौं । यो प्रतिनिधिसभा सबैभन्दा उच्चतम थलो हो ।’

प्रतिनिधिसभाको विघटन गरेर देशलाई अध्यारो सुरुङभित्र हाल्ने प्रयत्न गरिएको भन्दै उनले दुर्घटनाबाट बचेको पनि उल्लेख गरे । यो संविधान अपूर्ण भएपनि अग्रगामी भएको भन्दै उनले संविधानको रक्षा गर्नुपर्नेमा जोड दिए । उनले भने, ‘यो संविधान विगतका सबै संविधानभन्दा अग्रगामी संविधान छ । अपूर्ण छ अपुरो छ तर अग्रगामी छ । त्यसैले यसलाई अवमूल्यन नगरौं ।’

प्रतिनिधि सभा पुन:स्थापनाबाट पाठ सिक्दै गल्ती दोहोर्‍याउनु नहुने भट्टराईको भनाइ छ । प्रतिनिधिसभालाई जनताको सार्वभौमसत्ता अभ्यास गर्ने थलो बनाउनुपर्नेमा उनको जोड छ । देउवा नेतृत्वको सरकारलाई स्थायी सरकार बनाउन र लोकतन्त्र र संविधानलाई जोगाउन उनले आह्वान गरेका छन् ।

प्रकाशित : श्रावण ३, २०७८ २१:३३
प्रतिक्रिया
पठाउनुहोस्

एमाले नेपाल पक्षका ११ सांसदले प्रधानमन्त्रीलाई विश्‍वासको मत दिने

ओली र नेपालका २० भन्दा बढी सांसद तटस्थ बस्ने 
कान्तिपुर संवाददाता

काठमाडौँ — नेकपा (एमाले) का वरिष्ठ नेता माधवकुमार पक्षका ११ सांसदले मात्रै प्रधानमन्त्री शेरबहादुर देउवालाई विश्वासको मत दिने भएका छन् । पार्टी एकताका लागि दबाब पुगोस् भनेर उक्त निर्णय लिइएको सांसद दिपक प्रकाश भट्टले जानकारी दिए ।

प्रतिनिधिसभाको आठौं अधिवेशन नयाँ बानेश्वरमा । तस्बिर : हेमन्त श्रेष्ठ, कान्तिपुर

उनका अनुसार देउवालाई मत दिनेहरुमा माधवकुमार नेपाल, विरोध खतिवडा, रामकुमारी झाँक्री, कल्याण खड्का, लक्ष्मी चौधरी, निरादेवी जैरुलगायत ११ छन् ।

देउवाका पक्षमा रहेका एमाले वरिष्ठ नेता झलनाथ खनाल बिरामी भएका कारण भारतमा उपचाररत छन् भने उपाध्यक्ष भीम रावलले आइतबार नै सांसद पदबाट राजीनामा दिएका छन् ।

यस्तै पार्टी एकताका लागि दबाब दिन भन्दै नेपाल पक्षकै १० जना सांसदले देउवालाई विश्वासको मत नदिने निर्णय लिएका छन् । जसमा योगेश भट्टराई, घनश्याम भुसाल, नारायण खतिवडा, गोकर्ण विष्ट, सुरेन्द्र पाण्डे, दिपक प्रकाश भट्ट, राजबहादुर बुढा, झपट रावललगायत छन् । प्रतिनिधिसभा बैठक जारी रहेकै बेला एमालेका केही सांसदहरु बाहिरएका छन् ।

यस्तै अध्यक्ष केपी शर्मा ओली पक्षका १० जना सांसद तटस्थ बस्ने भएका छन् । सांसद दिपक प्रकाश भट्टले भने, 'विश्वासको मत पक्षमा मत दिने पनि हुनुहुन्छ नदिने हुनुहुन्छ । हामी २० जना तटस्थ बस्छौं । यो संख्या बढ्न पनि सक्छ ।'

प्रधानमन्त्री देउवाले विश्वासको मत लिनका लागि अहिले प्रतिनिधिसभामा प्रक्रिया चलिरहेको छ ।

प्रकाशित : श्रावण ३, २०७८ २१:१०
पूरा पढ्नुहोस्
प्रतिक्रिया
पठाउनुहोस्
×