माओवादी केन्द्रले बोलायो आइतबार संसदीय दलको बैठक- समाचार - कान्तिपुर समाचार
कान्तिपुर वेबसाईट
AdvertisementAdvertisement

माओवादी केन्द्रले बोलायो आइतबार संसदीय दलको बैठक

कान्तिपुर संवाददाता

काठमाडौँ — नेकपा (माओवादी केन्द्र)ले आइतबार संसदीय दलको बैठक बोलाएको छ । आइतबार बिहान ११ बजे सिंहदरबारमा संसदीय दलको बैठक बोलाइएको प्रमुख सचेतक देव गुरूङले जानकारी दिए ।

तस्बिर सौजन्य : नेकपा माओवादि केन्द्रका सांसद हितबहादुर तामाङ

बैठकमा अनिवार्य उपस्थित हुन प्रमुख सचेतक गुरुङले भनेका छन् । पुन:स्थापित प्रतिनिधिसभा बैठक आइतबार अपराह्न ४ बजे नयाँ बानेश्वरमा बस्दै छ ।

मन्त्रिपरिषद्‌को सिफारिसमा राष्ट्रपति विद्यादेवी भण्डारीले बिहीबार साउन ३ गतेका लागि संघीय संसद्का दुवै सदनको अधिवेशन आह्वान गरेकी थिइन् ।

मन्त्रिपरिषद्को सिफारिसमा जेठ ८ गते राष्ट्रपति भण्डारीले दोस्रोपटक प्रतिनिधिसभा विघटन गर्दै निर्वाचनको मिति तोकेकी थिइन् । तर प्रतिनिधि सभा विघटनविरुद्धको मुद्दामा असार २८ गते सर्वोच्च अदालतको फैसलाले प्रतिनिधिसभा बूँतिएको छ । राष्ट्रिय सभाको अधिवेशन पनि असार २८ गते अन्त्य गरिएको थियो ।

प्रकाशित : श्रावण २, २०७८ १६:२४
प्रतिक्रिया
पठाउनुहोस्

दाहाल र नेपालबीच भेटवार्ता

कान्तिपुर संवाददाता

काठमाडौँ — नेकपा (माओवादी केन्द्र) का अध्यक्ष पुष्पकमल दाहाल र नेकपा (एमाले) का वरिष्ठ नेता माधवकुमार नेपालबीच भेटवार्ता भएको छ । नेता नेपाललाई भेट्न दाहाल शनिबार उनको निवास कोटेश्वर गएका हुन् । 

दाहालका प्रेस सल्लाहकार विष्णु सापकोटाले दुई शीर्ष नेताबीच समसामयिक विषयमा छलफल भएको जानकारी दिए । उनले कान्तिपुरसित भने, 'अध्यक्ष र कमरेड माधव नेपालबीच पछिल्लो राजनीतिक विषयमा भेट भएको हो । भोलि संसद् चल्ने भएकाले त्यसबारे उहाँहरुबीच छलफल भयो ।'

पुन:स्थापित प्रतिनिधिसभा बैठक आइतबार ४ बजेका लागि आह्वान गरिएको छ । केपी ओली नेतृत्वको सरकारको सिफारिसमा विघटन गरिएको प्रतिनिधिसभा असार २८ गते सर्वोच्च अदालतले पुन:स्थापना गराएको हो । सर्वोच्चले निवेदकहरुको माग अनुसार कांग्रेस सभापति शेरबहादुर देउवालाई प्रधानमन्त्रीमा नियुक्त गर्न परमादेश जारी गरेसँगै देउवाले २९ असारमा जिम्मेवारी लिइसकेका छन् ।

देउवाले संविधान बमोजिम नियुक्त भएको महिना दिनमा संसद्‌मा विश्वासको मत लिनु पर्ने छ । माओवादी केन्द्र, कांग्रेस, एमाले नेपाल समूह र जसपाको समर्थनमा देउवा प्रधानमन्त्री बनेका हुन् ।

प्रकाशित : श्रावण २, २०७८ १६:१२
पूरा पढ्नुहोस्
प्रतिक्रिया
पठाउनुहोस्
×