मेलम्ची क्षेत्र पुगेर प्रधानमन्त्रीले पीडितलाई दिए जस्तापाता र रकमको आश्वासन

ह्योल्मोभूमि हेलम्बु हुँदै उर्लिएर आएको बाढीले बगर तुल्याएको २६ दिनपछि नेपाली सेनाको हेलिकप्टरबाट यहाँ आएका उनले ध्वस्त भौतिक संरचना पुनर्निर्माण गरिने बताए । ‘हेलम्बु र मेलम्ची भेगका विस्थापित ३ सय ६७ परिवारलाई १५ सय बण्डल जस्तापाता र अन्य प्रभावितलाई ५० हजार दिनेछौं, भत्किएका अन्य ब्रेलिब्रिजको बदला मोटरबेल पुल बनाउनका लागि योजना तयार गर्दैछौ,’ उनले भने ।

उनले नदीको तट क्षेत्र या वरीपरी आवास संरचना नबनाउन सुझाव दिए । ‘अन्य भौतिक संरचना पनि तटक्षेत्रबाट दीर्घकालीन रहने गरी बनाउन इन्जिनियर साथीहरुलाई मेरो सुझाव छ , नदीले झनै बर्खापिच्छै गहिरो बनाइरहन्छ,’ उनले भने । स्थायी संरचना निर्माण गर्न मेलम्चीमा चार लाख र हेलम्बुमा पाँच लाख दिइने उनले प्रतिबद्धता गरेका छन् ।

बहुप्रतिक्षित मेलम्ची खानेपानी आयोजनालाई सन २०२१ या पुसभित्रसम्म राजधानी पुर्‍याउन मुस्किल देखिएपनि त्योभन्दा अघि अर्को साल लाग्न नपओस् भन्नेमा ध्यान दिइरहेको उनले उल्लेख गरे ।

मुख्य अडिटभलमा बालुवा भरिएकाले आयोजना पछाडि धकेलिएकाले त्यसलाई अघि बढाउन सरकारको टिमले पहलकदमी गरिरहेको उनले उल्लेख गरे । ‘बालुवा भरिएको टनेललाई पहिलेकै अवस्थामा ल्याएर अघि बढाउनेछौं, जनतामाझ शिक्षा, रोजगार, खानेपानी स्वास्थ्य सबै पुगोस् भन्ने सरकारको चाहाना हो,’ उनले भने ।