शम्भु थापाको प्रश्न- भविष्यमा विश्वासको मत पाउने आधार छ वा छैन भन्ने आधार हेर्ने राष्ट्रपति को हो ?- समाचार - कान्तिपुर समाचार
कान्तिपुर वेबसाईट
AdvertisementAdvertisement

शम्भु थापाको प्रश्न- भविष्यमा विश्वासको मत पाउने आधार छ वा छैन भन्ने आधार हेर्ने राष्ट्रपति को हो ?

प्रतिनिधिसभा विघटन मुद्दामा पक्ष र विपक्षको बहस सकियो, एमीकस क्युरीले राय व्यक्त गर्दै
कान्तिपुर संवाददाता

काठमाडौँ — संविधानको धारा ७६ को उपधारा ५ बमोजिमको प्रधानमन्त्री दाबी गर्ने व्यक्तिले संसद्‍मा गएर विश्वासको मत प्राप्त गर्न सक्छ कि सक्दैन भन्ने अधिकार राष्ट्रपतिलाई नभएको वरिष्ठ अधिवक्ता शम्भु थापाले बताएका छन् । संविधानको धारा ७६ को उपधारा ५ ले राष्ट्रपतिलाई प्रधानमन्त्री नियुक्त गर्नैपर्ने दायित्व दिएको तर राष्ट्रपति विद्यादेवी भण्डारीले त्यसो नगरेको उनले बताए । 

प्रतिनिधिसभा विघटनको मुद्दामा संवैधानिक इजलासमा सुनुवाइका क्रममा वरिष्ठ अधिवक्ता थापाले राष्ट्रपतिले संविधानले नदिएको अधिकार प्रयोग गरेको बताए । सोमबार प्रतिउत्तर बहसका क्रममा थापाले भने, 'भविष्यमा विश्वासको मत पाउने आधार छ वा छैन भन्ने आधार हेर्ने राष्ट्रपति को हो ?'

राष्ट्रपतिलाई संविधानले विश्वासको मत परीक्षण गर्ने अधिकार नभएको र साथै संसद्ले विश्वास दिएको कुरा अस्वीकार गर्ने अधिकार संविधानले नदिएको वरिष्ठ अधिवक्ता थापाले बताए । 'राष्ट्रपतिलाई विश्वासको मतको अश्वीकार गर्ने अधिकार छ ?,' उनको प्रश्न थियो ।

संसद्लाई मार्न नहुने भन्दै वरिष्ठ अधिवक्ता थापाले संसद्लाई आफै कार्यकाल सम्पन्न हुन दिनुपर्ने बताए ।

प्रधानमन्त्री ओलीले विश्वासको मत लिँदैन भनेपछि राष्ट्रपति कार्यालयमा गएर वैकल्पिक प्रधानमन्त्रीमा पेस गर्न जानु गलत भएको थापाले बताए । ओलीले प्रधानमन्त्रीमा दाबी गरेको नभई राष्ट्रपति कार्यालयमा झगडाको कागज पेस गरेको बताए ।

'प्रधानमन्त्रीले विश्वासको मत लिन्न भन्नुभयो । विश्वासको मत पनि लिनुभएन र अर्को प्रधानमन्त्री नियुक्तिका लागि लेख्नुभयो । राष्ट्रपतिसमक्ष झगडाको कागज पेस गर्ने कि म विश्वासको मत लिन्छु भनेर राष्ट्रपतिलाई विश्वासको मतको लागि संसद् बोलाउनुस् भनेर जाने ?,' उनले भने ।

प्रधानमन्त्री ओलीको पार्टी प्रतिनिधिसभाको पहिलो विघटनमा पनि एकजुट नरहेको र अहिले पनि एकजुट नरहेको तथ्य इजलासले मनन गर्नुपर्ने पनि थापाको भनाइ थियो ।

'यो मुद्दामा केपी ओलीले दाबी गर्ने हो भने संसद्‍मा गर्नुपर्थ्यो । यो दाबी देउवाको मात्रै हो,' उनले भने । देउवाको दाबी आइसकेपछि राष्ट्रपतिले विश्वासको मत परीक्षणका लागि संसद्‍मा पठाउनुपर्नेमा त्यसो नगरेको थापाले बताए ।

'विश्वासको मत पाउँछ र पाउँदैन भन्ने परीक्षण संसद्मा गर्ने हो । दाबी गर्न आइसकेपछि विश्वासको मत परीक्षणका लागि पठाउनुपर्ने हो । भविष्यमा पाउँछ कि पाउँदैन भन्ने हेर्ने होइन,' थापाले भने ।

वरिष्ठ अधिवक्ता थापाले राष्ट्रपति विश्वकै कमजोर रहेको पनि बताए । उनले भने, 'प्रधानमन्त्रीले जे-जे भन्यो लुरुलुरु मान्ने राष्ट्रपति विश्वकै कमजोर हो ।'

प्रतिनिधिसभा विघटन मुद्दामा पक्ष र विपक्षको बहस सकिएको छ । रिट निवेदकका कानुन व्यवसायीले प्रतिउत्तर बहस सकेसँगै मुद्दाको बहस सकिएको हो ।

उक्त मुद्दामा अब एमीकस क्युरीले राय व्यक्त गर्न बाँकी छ । सोमबार साढे २ बजेपछि एमीकस क्युरीले राय व्यक्त गर्ने तयारी भइरहेको छ । चार जना एमीकस क्युरीका लागि २ घण्टाको समय निर्धारण गरिएको छ ।

सम्बन्धित समाचारः

प्रकाशित : असार २१, २०७८ १३:५१
प्रतिक्रिया
पठाउनुहोस्

चिनियाँ राष्ट्रपति सीले नेपालसहित दक्षिण एसियाका शीर्ष नेताहरुसँग छलफल गर्दै

कान्तिपुर संवाददाता

काठमाडौँ — चिनियाँ कम्युनिस्ट पार्टी (सीपीसी) एक सय वर्ष पुगेको उपलक्ष्यमा राष्ट्रपति तथा पार्टी महासचिव सी चिनफिङले दक्षिण एसियाली मुलुकका शीर्ष नेताहरुसँग मंगलबार बेलुकी भर्चुअल अन्तरक्रिया गर्दैछन् ।

तस्बिर : रोयटर्स

उक्त अन्तरक्रियाको मुख्य वक्ता सी रहनेछन् भने नेपालसहित दक्षिण एसियाका शीर्ष नेताहरुले पनि आ–आफ्ना धारणा राख्ने छन् ।

नेपालबाट प्रधानमन्त्री तथा नेकपा एमालेका अध्यक्ष केपी शर्मा ओलीको पनि उक्त कार्यक्रममा सहभागी हुने कार्यक्रम तय भइसकेको छ । प्रधानमन्त्रीका परराष्ट्र मामिला सल्लाहकार राजन भट्टराईका अनुसार उक्त कार्यक्रममा ओलीले सहभागिता जनाउनेछन् ।

यस्तै, नेपाली कांग्रेसका सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल, जनता समाजवादी पार्टीका अध्यक्षद्वय उपेन्द्र यादव र बाबुराम भट्टराईलगायतका नेताहरुले पनि उक्त भर्चुअल बैठकमा सहभागिता जनाउनेछन् र आ–आफ्ना धारणा राख्ने छन् ।

चीनले आफ्नो चिनियाँ कम्युनिस्ट पार्टी गठन भएर एक सय वर्ष पुगेको उपलक्ष्यमा विभिन्न कार्यक्रमहरु मनाइरहेको छ । त्यसैअन्तर्गत यो पनि एउटा छलफल हो । उक्त कार्यक्रममा नेपालसहित दक्षिण एसियाका नेताहरुले सीपीसीलाई शुभकामना दिने कार्यक्रम रहेको छ ।

प्रकाशित : असार २१, २०७८ १३:३४
पूरा पढ्नुहोस्
प्रतिक्रिया
पठाउनुहोस्
x
×