संघीयताको समीक्षा र धर्मनिरपेक्ष राज्यबारे बहस गरौं: महेश बस्‍नेत- समाचार - कान्तिपुर समाचार
कान्तिपुर वेबसाईट
AdvertisementAdvertisement

संघीयताको समीक्षा र धर्मनिरपेक्ष राज्यबारे बहस गरौं: महेश बस्‍नेत

कान्तिपुर संवाददाता

काठमाडौँ — नेकपा एमालेको केन्द्रीय कमिटी बैठकमा संघीयताको समीक्षा गरिनुपर्ने प्रस्ताव पेस भएको छ । शनिबार प्रधानमन्त्री निवास बालुवाटारमा बसेको बैठकमा केन्द्रीय सदस्य महेश बस्नेतले संघीयता र धर्मनिरपेक्षता बारे बहस हुनुपर्ने बताएका हुन् ।

महेश बस्नेत । फाइल तस्बिर

बैठकमा बस्नेतले ८ वटा प्रस्ताव प्रवेश गराएका थिए । उनका अनुसार संघियताको समिक्षा, धर्म निरपक्षताबारे बहस, प्रत्यक्ष निर्वाचित प्रधानमन्त्री, मुलुकको विशिष्ट पहिचान घोषणा गर्ने प्रस्ताव उनले पेश गरेका छन् ।

साथै, दुई कार्याकाल भन्दा बढी प्रधानमन्त्री नबनाउने संवैधानिक व्यवस्था, पार्टी अध्यक्ष २ कार्यकाल र पदाधिकारी ३ कार्यकाल भन्दा बस्न नपाउने व्यवस्था गर्नुपर्ने पनि उनको प्रस्ताव छ ।

बस्नेतले पार्टी र राज्यका राजकीय र शासकीय स्थानमा ४० प्रतिशत युवाहरुको सुनिश्चिता गर्नुपर्ने साथै पार्टी महाधिवेशनको राजनीतिक प्रतिवेदन, विधान, चुनावको घोषणा पत्रमा यो विषय सम्बोधन गर्न यो बैठकबाट कार्यदल बनाउने प्रस्ताव पनि गरेका छन् ।

बस्नेत प्रधानमन्त्री एवं पार्टी अध्यक्ष केपी शर्मा ओली निकटका नेता हुन् ।

प्रकाशित : असार १९, २०७८ १८:४५
प्रतिक्रिया
पठाउनुहोस्

बाढीले भत्कियो त्रियुगा पुल

डिल्लीराम खतिवडा

उदयपुर — दुई दिनयता लगातारको वर्षासँगै आएको बाढीले शनिबार दिउँसो उदयपुरको चौदण्डीगढी नगरपालिका– ५ सिवाईस्थित त्रियुगा नदीको पक्की पुल भत्किएको छ । बाढीले पुल भत्कँदा एउटा स्पान नदीमा झरेको छ र अर्को ढल्किएको छ ।

निर्माणको अन्तिम चरणमा पुगेको पुलको दुई स्पानमा क्षति हुँदा समस्या भएको छ । सातायता मात्र सर्वसाधरणलाई पैदलयात्रा अनुमति दिइएको पुल भत्किँदा एक स्थानीय घाइते भएका छन् । चौदण्डीगढी नगरपालिका–५ सिवाईका ४८ वर्षीय अख्तर मियाँ घाइते भएको इलाका प्रहरी कार्यालय बेल्टारले जनाएको छ । उनको अनुहार र खुट्टामा चोट लागेको छ । मियाँ पैदलयात्रा गरेर बेल्टारबाट घर जाँदै गर्दा पुलको स्लाब नदीमा झरेको थियो । स्थानीयले उनको तत्कालै उद्धार गरेका हुन् ।

चौदण्डीगढीको केन्द्र बेल्टार बजारलाई पूर्वपश्चिम महेन्द्र राजर्मागसँग जोडने गरी बनाउन लागिएको उक्त पुल निर्माणको अन्तिम चरणमा थियो । १२ वर्षयता पुल निर्माण भइरहेको छ । पुलको दक्षिण( सिवाई)का दुई स्पानमा क्षति पुगेको गाईघाट दिक्तेल सडक योजना कार्यालयका प्रमुख गोविन्द खकुरेलले बताए । बाढीले क्षति पुर्‍याउँदा एउाटा स्पान नदीमा झरेको र अर्को ढल्किएको प्रमुख खकुरेलले बताए । खकुरेलका अनुसार पुल सञ्चालनको अन्तिम चरणमा पुगेको थियो ।


बाढीले क्षति पुगेको पुलमा २५/ २५ मिटरका १२ स्पान छन् भने दुई स्पान र एक पिलर धसिएको छ । पुलको लम्बाई ३ सय ७ मिटर र ५ मिटर चौडाइ रहेको छ ।

पुलको निर्माण महालक्ष्मी/लोकप्रिय जेभी कन्स्ट्रक्सन कलंकी काठमाडौंले गर्दै आएको छ । पुलको डिजाइन र माटोको परीक्षण काठमाडौं बालाजुस्थित स्वाइल कन्सल्टेन्सी कम्पनीले गरेको हो । ९ करोड ७६ लाख रुपैयाँको लागतमा सुरु गरिएको पुल पुनर्मुल्यांकन (भिओ) गर्दा अहिले ११ करोड २७ लाख रुपैयाँ पुगेको छ ।

प्रकाशित : असार १९, २०७८ १८:४३
पूरा पढ्नुहोस्
प्रतिक्रिया
पठाउनुहोस्
×