‘विदेशी चलखेलको कुरा सोचविचार गरेरै बोलिएको हो’- समाचार - कान्तिपुर समाचार

‘विदेशी चलखेलको कुरा सोचविचार गरेरै बोलिएको हो’

एउटा चुनाव वा ओलीलाई हटाउन मात्रै होइन, धेरै परसम्म जानुपर्छ भन्ने मान्यताले गठबन्धन बनाइएको दाबी
राजेश मिश्र

काठमाडौँ — विपक्षी गठबन्धनका नेताहरूले गम्भीर परिस्थितिको आकलन गरेरै नेपालको आन्तरिक मामिलामा विदेशी हस्तक्षेप नहोस् भनेर बोलिएको स्पष्ट पारेका छन् । गठबन्धनमा आबद्ध पाँच पूर्वप्रधानमन्त्रीले डेढ साताअघि विज्ञप्ति जारी गर्दै नेपालमा हस्तक्षेप बढेको उल्लेख गरेका थिए ।

विपक्षी पाँच राजनीतिक दलका शीर्ष नेताहरूले बिहीबार संसद् भवन नयाँ बानेश्वरमा सम्पादकहरूसँग गरेकोे अन्तक्र्रियामा माओवादी केन्द्रका अध्यक्ष पुष्पकमल दाहालले प्रत्यक्ष वा परोक्ष रूपमा विदेशी चलखेल हुन नपाओस् भनेर सबैलाई ध्यानाकर्षण र सतर्क गराउन सोचीविचारी बोलिएको बताए । विपक्षी गठबन्धनमा आवद्ध पाँच पूर्वप्रधानमन्त्रीहरूले डेढ साताअगाडि निकालेको वक्तव्यप्रति विभिन्न कोणबाट टीकाटिप्पणी भइरहेका बेला दाहालले भनेका छन्, ‘परिस्थिति गम्भीर नबनीकन बोलिएको होइन । कसले बोल्दा बढी प्रभावकारी हुन्छ भनेर पाँच जना पूर्वप्रधानमन्त्रीले बोलेका हौं ।’

उनले संविधान जारी गर्ने बेला, निर्वाचनका बेलाजस्तै अहिले पनि विदेशी दबाब बढेर गएको बताए । ‘संविधान बनाउने, निर्वाचन गर्ने बेलामा होस् वा अहिले गठबन्धन बनाउने बेलामा किन नहोस्, धेरै अप्ठ्याराको सामना गरेका छौं,’ उनले भने, ‘लोकतन्त्र, संविधान र राष्ट्रको पक्षमा जस्तोसुकै चुनौती भए पनि उभिने र जस्तोसुकै त्याग गर्ने हो भन्ने भावनाबाटै वक्तव्य दिएका हौं ।’ उनले पाँच जना पूर्वप्रधानमन्त्री तथा पाँच पार्टीले विदेशी हस्तक्षेपको विरोध गरेर परिस्थितिको सामना गर्छौं भनिरहेका बेला बहालवाला प्रधानमन्त्री केपी शर्मा ओलीले भने कुर्सीका लागि जे पनि गरिरहेको आरोप लगाए । उनले कुनै पनि छिमेकी वा मित्रराष्ट्रसँग आफूहरूलाई दुश्मनी नचाहिएकाले कसैलाई तोकेर नभनिएको बताए । ‘सबैसँग राम्रो सम्बन्ध चाहन्छौं तर हामीभित्र अनावश्यक चलखेल सह्य छैन, हामीलाई त्यो स्वीकार्य हुन सक्दैन,’ उनले भने, ‘गर्नुपर्ने काम गरियो ।’

दाहालले कुनै पनि देशलाई लक्षित नगरे पनि गठबन्धनमा आवद्ध राष्ट्रिय जनमोर्चाका महासचिव मनोज भट्टले त्यही मञ्चबाट गत कात्तिकमा भारतीय गुप्तचर प्रमुख नेपाल आएपछि एकपछि अर्को अकल्पनीय राजनीतिक घटना भएको बताए । उनले भारतको सत्तारूढ दलले नेपालमा हिन्दु राष्ट्र र राजसंस्था स्थापनाको खेल गरिरहेको उल्लेख गरे । त्यस विषयमा भारत सरकारले आफ्नो धारणा स्पष्ट पार्नुपर्ने उनको माग थियो ।

सम्पादकहरूले विपक्षी गठबन्धनलाई ‘तपाईंहरू पनि उस्तै त हो नि ? जनताले कसरी विश्वास गर्ने ?’ जस्ता प्रश्न उठाएपछि दाहालले ओलीसँग आफूहरूको तुलना नगरिदिन आग्रह गरेका थिए । उनले ओलीलाई ‘भिलेन’ को संज्ञा दिँदै जनताले त्यो थाहा पाइसकेको बताए । कार्यक्रमको अन्त्यमा सम्पादकहरूले उठाएका प्रश्नको जवाफ दिने पालो पाएका दाहालले सबै उस्तै हुन् भनेर नेताहरूको हुर्मत लिने काम नगरिदिन मिडिया क्षेत्रलाई आग्रह गरेका थिए । ‘आलोचना गर्नुहोस् तर एउटा सीमा रहोस्,’ उनले भने, ‘नेताहरूप्रति घृणा फैलियो भने त्यो झन् खतरनाक हुन्छ ।’ उनले कुर्सीका लागि संविधान, लोकतन्त्र, विधि सबैलाई ध्वस्त पार्ने ओलीसँग आफूहरूको तुलना नगरिदिन पटक–पटक आग्रह गरे । ‘हामीले पनि गल्ती गरेका छौं, मबाट पनि त्रुटि भएका छन्,’ उनले भने, ‘त्यसलाई सच्याउने प्रयास पनि गरेका छौं । सच्चिएर जान प्रतिबद्ध पनि छौं ।’

प्रारम्भमै बोलेका कांग्रेस सभापति शेरबहादुर देउवाले प्रधानमन्त्री ओलीमा देखिएको शासकीय अहंकार र स्वेच्छाचारी निर्णयका कारण संविधान संकटमा परेको बताए । उनले राष्ट्रपति र प्रधानमन्त्रीको मिलेमतोबाट मध्यरातमा असंवैधानिक तरिकाले गरिएको प्रतिनिधिसभा विघटनले लोकतन्त्रमाथि नै खतरा उत्पन्न गरेको उल्लेख गरे । नेपालका बारेमा नेपालीले नै निर्णय गर्ने कुरामा उनले जोड दिए । ‘हामी सबै मित्र राष्ट्र तथा अन्तर्राष्ट्रिय समुदायसँग स्वतन्त्र परराष्ट्र नीतिका आधारमा सुमधुर सम्बन्ध कायम गर्न चाहन्छौं,’ उनले भनेका छन्, ‘नेपालको गौरव र स्वाभिमानलाई ध्यानमा राख्दै नेपालको बारेमा नेपालीले नै निर्णय गर्ने कुरामा अटल विश्वासका साथ बदलिँदो विश्व परिवेशमा राष्ट्रिय हितको रक्षा लोकतान्त्रिक प्रणालीका आधारमा गर्नुपर्छ भन्ने मान्यता राख्छौं ।’

एमाले नेता तथा पूर्वप्रधानमन्त्री माधवकुमार नेपालले देश गम्भीर संकटमा रहेको भन्दै एकताबद्ध भएर देशलाई भड्खालोमा जानबाट बचाउन सबै लाग्नुपर्ने बताए । उनले देशको स्वाधीनता, स्वाभिमान र राष्ट्रिय हितको रक्षा गर्ने मिसनका लागि आफूहरू एकताबद्ध रहेको बताए । आफूहरू कोर्स करेक्सनको अभियानमा रहेको तथा ओलीले गल्ती भयो भनेर, त्यसलाई सुधार गरेर आए साथमा लान सकिने बताए ।

जसपा अध्यक्ष उपेन्द्र यादवले राष्ट्रपति कार्यालयदेखि संवैधानिक निकायहरूमाथि नियन्त्रण गरेर ओलीले स्वेच्छाचारी शासन चलाउन खोजेको आरोप लगाए ।

फरक प्रसंगमा नेता दाहालले एमसीसीका विषयमा गठबन्धनभित्र कुनै समस्या नरहेको बताए । राष्ट्रिय हितअनुकूल बनाएर त्यसलाई संसदीय प्रक्रियाबाटै लैजाने विषयमा सबै सहमत रहेको उनको भनाइ थियो । उनले संविधान, लोकतन्त्र र राष्ट्रियताको रक्षाका लागि विपक्षी गठबन्धनलाई लामो अवधिसम्म लगिने बताए । उनले पार्टीको आन्तरिक समस्याका कारण गठबन्धनभित्र एमाले नेता नेपाल र जसपामा केही अप्ठ्यारा देखिए पनि त्यसलाई सामूहिक ढंगले नै बुझ्ने र सहयोग गर्ने समझदारी रहेको उल्लेख गरे । एउटा चुनाव वा ओलीलाई हटाउन मात्रै होइन, धेरै परसम्म जानुपर्छ भन्ने मान्यताले गठबन्धन बनाइएको उनको दाबी थियो ।

प्रकाशित : असार १०, २०७८ २२:५९
प्रतिक्रिया
पठाउनुहोस्

जसपाको आधिकारिकतामा यादवको दाबी

आयोगमा बुझाए ३० जनाको हस्ताक्षर
राजेश मिश्र

काठमाडौँ — जनता समाजवादी पार्टीका अध्यक्ष उपेन्द्र यादवले निर्वाचन आयोगमा दलको आधिकारिकतामा दाबी गरेका छन् । जसपाका अर्का अध्यक्ष महन्थ ठाकुरसँग विवाद उत्कर्षमा रहेका बेला यादवले राजनीतिक दलसम्बन्धी ऐनले गरेको दलको मान्यतासम्बन्धी विवाद निरूपणका लागि शुक्रबार आयोगमा निवेदन दिएका हुन् ।

दलको नाम, छाप, विधान, झन्डा, पदाधिकारी, निर्णय वा केन्द्रीय समितिको आधिकारिकताका विषयमा कुनै विवाद उत्पन्न भए त्यसको निरूपण हुनेसम्बन्धी व्यवस्था ऐनले गरेको छ । गत वर्ष वैशाख १० मा एकीकरण भएको जसपा प्रधानमन्त्री केपी शर्मा ओलीलाई हेर्ने दृष्टिकोणमै विवाद प्रारम्भ भएर विभाजनको अवस्थामा पुगेको छ ।

ठाकुर पक्ष केही माग पूरा भएको भन्दै ओली सरकारमा सहभागी भइसकेको छ । यादव भने ओलीलाई विस्थापन गरेर कांग्रेस नेता शेरबहादुर देउवालाई प्रधानमन्त्री बनाउने अर्को गठबन्धनमा छन् ।

दुई महिनायता ठाकुर र यादवले पार्टीको गतिविधि अलगअलग ढंगले सञ्चालन गरिरहेका छन् । दुवैले आफूलाई आधिकारिक दाबी गरिरहेका बेला अब त्यसको छिनोफानो गरिदिने विषय आयोगमा पुगेको हो । यादवले ऐनको दफा ४३ (ग) बमोजिम दलको पदाधिकारी, केन्द्रीय समिति वा केन्द्रीय समितिको निर्णयको आधिकारिकताको विषयमा निर्णय गरिदिन आयोगलाई आग्रह गरेका छन् ।

जसपाको केन्द्रीय कार्यकारिणी समितिमा आफूहरूको बहुमत रहेको उनको दाबी छ । ५१ सदस्यीय कार्यसमितिमा रहेका ३० जनाको हस्ताक्षर उनले आयोगलाई बुझाएका छन् । यादवले पार्टीको बैठकमा नआई ठाकुरले एकपक्षीय रूपमा गुट बनाएर काम गरिरहेको आरोप लगाउँदै त्यसमा रोक लगाएर आफूहरूलाई आधिकारिकता प्रदान गर्न माग गरेका छन् । आयोगले यसअघि दुवै अध्यक्षले एकले अर्कालाई गरेको कारबाहीलाई मान्यता दिएको थिएन ।

आयोगका सचिव सुरेश अधिकारीले यादव पक्षले पेस गरेका कागजात अध्ययन गरेर सचिवालयले आयोगसमक्ष पेस गर्ने जानकारी दिए । ‘आयोगले उपयुक्त देखे विवाद निरूपणको प्रक्रिया प्रारम्भ हुन्छ,’ उनले भने । आधिकारिकताको मागदाबीपछि आयोगले अर्को पक्षलाई जवाफ दिन १५ दिन समय दिनुपर्ने प्रावधान छ । समय माग गरिए आयोगले थप १० दिन दिन सक्छ । त्यसपछि दुवै पक्षलाई विवाद निरूपणका लागि सहमतिको अवसर दिनुपर्ने कानुनी प्रावधान छ । विवाद समाधान नभए आयोगले प्रमाणका आधारमा केन्द्रीय समितिको बहुमत रहेको पक्षलाई आधिकारिकता तथा अर्को पक्षलाई छुट्टै राजनीतिक दल दर्ताको अवसर दिने सक्नेछ ।

ऐनले आधिकारिकता टुंग्याउनलाई केन्द्रीय समितिको संख्यालाई महत्त्वपूर्ण मानेको छ । जसपाको विधानअनुसार केन्द्रीय समितिको संरचना बनिसकेको छैंन । आयोगमा केन्द्रीय कार्यकारिणी समितिको अभिलेख मात्रै छ । विधानले कार्यकारिणी समितिलाई केन्द्रीय समिति नबसेका बेला त्यसले प्रयोग गर्ने सबै काम गर्न तथा तत्काल सम्पादन गर्नुपर्ने विषयमा निर्णय लिने अधिकार दिएको छ ।

ठाकुर पक्षद्वारा समितिमा हेरफेर

जसपाका अध्यक्ष ठाकुरले केन्द्रीय कार्यकारिणी समितिमा हेरफेर गरिएको जानकारी आयोगलाई गराएका छन् । आयोगका सचिव अधिकारीका अनुसार समितिमा १७ जना सदस्य फेरबदल गरिएको विवरण ठाकुर पक्षबाट आएको बताए । ठाकुरले साविकको राजपामा रहेका र अहिले यादव पक्षमा लागेकाहरूलाई निकालेको तथा केही नयाँ सदस्य थपिएको जानकारी आयोगलाई दिएका छन् ।

दुई दिन अगाडि आयोगमा पठाइएको पत्रमा जेठ ३ गतेको निर्णयबाट कार्यकारिणी समितिमा सदस्य हेरफेर गरिएको उल्लेख छ । त्यस्तै, गत पुसको ७ गते बसेको केन्द्रीय कार्यकारिणी समितिको बैठकले समितिमा सदस्य हेरफेरको अख्तियारी ठाकुरलाई दिने निर्णय गरेको दाबी आयोगमा गरिएको छ ।

प्रकाशित : असार ५, २०७८ ०७:११
पूरा पढ्नुहोस्
प्रतिक्रिया
पठाउनुहोस्
×