राष्ट्रपतिले ओलीलाई भन्नुपर्थ्यो 'यु आर नो मोर प्राइममिनिस्टर' : वरिष्ठ अधिवक्ता कार्की- समाचार - कान्तिपुर समाचार
कान्तिपुर वेबसाईट
AdvertisementAdvertisement

राष्ट्रपतिले ओलीलाई भन्नुपर्थ्यो 'यु आर नो मोर प्राइममिनिस्टर' : वरिष्ठ अधिवक्ता कार्की

कान्तिपुर संवाददाता

काठमाडौँ — संसद्‍बाट विश्वासको मत नलिएका प्रधानमन्त्री केपी शर्मा ओलीलाई राष्ट्रपति विद्यादेवी भण्डारीले 'अब प्रधानमन्त्रीमा रहनुभएन' भन्नुपर्नेमा त्यसो नभनिएको वरिष्ठ अधिवक्ता बद्रीबहादुर कार्कीले बताएका छन् । 

फाइल तस्बिर।

प्रतिनिधिसभा विघटनका मुद्दाको सुनुवाइका क्रममा कांग्रेस सभापति शेरबहादुर देउवासहित १ सय ४६ सांसदको तर्फबाट संवैधानिक इजलासमा वरिष्ठ अधिवक्ता कार्कीले भने, 'नैतिकताको आधारमा राजीनामा पनि दिनु नपर्ने ? हाउसको कन्फिडेन्ट नपाइकन एक मिनेट पनि प्रधानमन्त्री पदमा बस्नु हुँदैन, बस्न दिनु हुँदैन । विश्वास प्राप्त गर्न सक्दैन भनी स्वीकार गरेर लिखित रूपमा दिएको हुनाले राष्टपतिले भन्नुपर्थ्यो- यु आर नो मोर प्राइमिनिस्टर ।'

प्रधानमन्त्री केपी शर्मा ओलीले विश्वासको मत प्राप्त गर्न नसकेपछि नयाँ सरकार बन्न अवरोध गरेको वरिष्ठ अधिवक्ता कार्कीको भनाइ थियो । त्यसरी अवरोध गर्नुको उद्येश्य के हो ? भनेर उनले प्रश्न गरेका थिए । 'संसद्‍बाट विश्वासको मत नपाएपछि पनि अर्को सरकार बन्न अवरोध गर्ने ? के गरेको हो यो ?,' उनका प्रश्न थिए ।

संविधानको धारा ७६ को उपधारा ३ बमोजिम प्रधानमन्त्री नियुक्त भएपछि ओलीले संविधानको धारा ७६ को उपधारा ४ बमोजिम विश्वासको मत लिनुपर्थ्यो भन्ने वरिष्ठ अधिवक्ता कार्कीको भनाइ थियो ।

प्रधानमन्त्रीले समस्या समाधानको भूमिका खेल्नुपर्नेमा अवरोध खडा गर्ने काम गरेको कार्कीको भनाइ थियो । प्रधानमन्त्री ओलीले राजनीतिक नैतिकता नदेखाएको पनि दाबी गरे । 'प्रधानमन्त्री पद खेलाँचीको पद होइन । राजनीतिक नैतिकता नहुने ?'

दोस्रोपटक प्रतिनिधिसभा विघटन भएपछि देउवासहित १ सय ४६ प्रतिनिधिसभा सदस्य रिट निवेदन लिएर सर्वोच्च अदालत गएका थिए । उक्त रिट निवेदनमाथि बुधबारदेखि सुनुवाइ सुरु भएको छ ।

सम्बन्धित समाचारः

प्रकाशित : असार ९, २०७८ १४:०१
प्रतिक्रिया
पठाउनुहोस्

मनाङको चामेस्थित मर्स्याङ्दी नदीमा फेरि आयो बाढी

आश गुरुङ

लमजुङ — मनाङको सदरमुकाम चामेस्थित मर्स्याङ्दी नदीमा बुधबार फेरि बाढी आएको छ । माथिल्लो मनाङ जाने बेलिब्रिज नै नाघेर बाढी आएको हो । यसले नजिकैको लोकप्रिय माविलाई समेत जोखिममा पारेको छ ।

मनाङको सदरमुकाम चामेस्थित मर्स्याङ्दी नदीमा बेलिब्रिज र लोकप्रिय माविलाई जोखिममा पार्ने गरी आएको बाढी । तस्बिर सौजन्य: नारायण कुसुम 

बाढीले बगाएर ल्याएको ठूलाठूला रुख बेलिब्रिज र ठाउँठाउँमा अड्किएको छ । मर्स्याङ्दीको बाढीले धार परिवर्तन गरी दायाँतर्फ च्याप्दा विद्यालय र घरहरु जोखिममा परेका छन् ।

भेटेरेनरी अस्पताल तथा पशु सेवा विज्ञ केन्द्र मनाङका प्रमुख नारायण कुसुमका अनुसार बेलिब्रिजलाई मात्रै नभएर झोलुंगे पुललाई समेत जोखिममा पारेर बाढी आएको छ । चामे गाउँपालिकाका अध्यक्ष लोकेन्द्र घलेले केही गर्दा पनि नदी नघटेको र यसले थप जोखिममा पारेको बताए ।

मनाङका प्रमुख जिल्ला अधिकारी विष्णु लामिछानेका अनुसार ३ दिनयता लगातार बेलिब्रिजलाई जोखिममा पार्ने गरी बाढी आइरहेको छ । मंगलबार रातिको भीषण बर्षाले बाढीले झन् ठूलो रुप लिएको उनले बताए । केही दिनयता सुरक्षाकर्मीले पुल जोगाउन विभिन्न कामहरु गरिरहे पनि बाढी बढ्दै गएकाले समस्या परेको बताए ।

नेपाल प्रहरीका डीएसपी सुवास खड्काले मर्स्याङ्दी नदीले दायाँ च्याप्दा लोकप्रिय माविसँगै बजार क्षेत्र जोखिममा पारेको बताए । उनका अनुसार पुल, स्कुल र बस्ती जोगाउन प्रहरी खटिरहेका छन् । बुधबार बिहानीदेखि एक्कासि बढेको बाढीका कारण ती संरचनाहरु थप जोखिममा परेको उनले बताए । सशस्त्र प्रहरी बल नं. ३२ गुल्म, चामे मनाङका डीएसपी होमनाथ पन्थीका अनुसार बेलिब्रिजबाट ओभरफ्लो भएर पानी बगेको छ । पारिपट्टि चामेका ५/६ घर फेरि डुबानमा परेका छन् ।

जेठ ३१ गते रातिदेखि आएको बाढीले नदीको पिँधमा बालुवाजन्य पदार्थ थुपारिदिँदा पुल र बस्ती जोखिममा परेको प्रमुख जिल्ला अधिकारी लामिछानेले बताए ।

सुरक्षाकर्मी लगाएर बगाएर ल्याएको रुखलाई हटाउने प्रयास गरिए पनि पुन: थपिादै आएको उनले बताए । जेठ ३१ रातिदेखिको निरन्तर वर्षाका कारण मनाङमा ५६ घरलाई पूर्ण क्षति पुर्‍याएको छ । २ सय बढी घर जोखिममा रहेको मनाङ प्रशासनले जनाएको छ ।

प्रकाशित : असार ९, २०७८ १३:५४
पूरा पढ्नुहोस्
प्रतिक्रिया
पठाउनुहोस्
×