वैकल्पिक सरकार भनेको ओलीरहित सरकार हो : अधिवक्ता खाती- समाचार - कान्तिपुर समाचार

वैकल्पिक सरकार भनेको ओलीरहित सरकार हो : अधिवक्ता खाती

'संविधानको धारा ७६ को उपधारा ५ बमोजिम प्रधानमन्त्री नियुक्त गरी त्यस सन्दर्भमा सदन बोलाइदियो भने विश्वासको मत आउँछ भन्ने देखिएपछि दुराशय राखेर प्रतिनिधिसभा विघटन गरिएको छ'
कान्तिपुर संवाददाता

काठमाडौँ — प्रतिनिधिसभा विघटनसम्बन्धी मुद्दाको बहसमा अधिवक्ता खम्बबहादुर खातीले प्रधानमन्त्री केपी शर्मा ओलीले बदनियत राखेर प्रतिनिधिसभा विघटन गरेको तर्क गरेका छन् । उनले पहिला संविधानको धारा ७६ (३) अनुसारको प्रधानमन्त्री नियुक्त भएपछि ओलीले वैकल्पिक सरकार गठनका लागि मार्गप्रशस्त गरेको भन्ने  अनि आफैंले दाबी गर्नु बदनियत भएको बताए । 

'वैकल्पिक सरकार उहाँसहितको नभएर उहाँ रहितको हो भन्ने बुझ्नुपर्दछ,' खातीले भने । उनले वैकल्पिक सरकार गठनका लागि मार्गप्रशस्त गरेँ भनेको अवस्थामा फेरि दाबी गर्नु बदनियत रहेको बताए ।

देउवाको पक्षमा १ सय ४९ सांसदले राष्ट्रपतिकहाँ हस्ताक्षर बुझाएको अवस्थामा प्रतिनिधिसभा विघटन गर्नका लागि बदनियत राखेर ओलीले दाबी गरेको खातीको भनाइ थियो ।

'मालाफाइड इन्टेन्सनले गरिएको कार्य हो यो । संविधानको धारा ७६ को उपधारा ५ बमोजिम प्रधानमन्त्री नियुक्त गरी त्यस सन्दर्भमा सदन बोलाइदियो भने विश्वासको मत आउँछ भन्ने देखिएपछि दुराशय राखेर प्रतिनिधिसभा विघटन गरिएको छ,' उनले भने ।

प्रतिनिधिसभाबाट प्रधानमन्त्री नियुक्त हुने अवस्था रहेसम्म विघटन नहुने खातीको भनाइ थियो । उनले संविधानको धारा ७६ को उपधारा ३ बमोजिमको संसद्को ठूलो दलको हैसियतमा बनेको प्रधानमन्त्रीले प्रतिनिधिसभा विघटन गर्न नसक्ने पनि उनको दाबी थियो । संविधानको धारा ७६ को उपधारा ७ मा उक्त धाराको उपधारा ५ बमोजिम नियुक्त प्रधानमन्त्रीले विश्वासको मत लिन नसके वा प्रधानमन्त्री नियुक्त हुन नसके मात्रै प्रतिनिधिसभा विघटनको सिफारिस मन्त्रिपरिषद्ले गर्न सक्ने व्यवस्था रहेको उनको भनाइ थियो ।

राष्ट्रपतिले प्रधानमन्त्री नियुक्त नगरेर गलत गरेको पनि खातीले तर्क गरे । 'अहिलेको राष्ट्रपति सेरेमोनियल किङ जस्तो हो । शेरबहादुर देउवालाई नियुक्त नगरी उहाँले गलत गर्नुभएको छ,' खातीले भने ।

संविधानको धारा ७६ को उपधारा ५ बमोजिमको सरकार गठन गर्दा सांसदहरूलाई ह्विप नलाग्ने पनि खातीको तर्क थियो । उनले नीति तथा कार्यक्रमलगायतका मुद्दामा मात्रै ह्विप लाग्ने तर ७६ (५)को सरकार गठन गर्नका लागि सांसदहरूलाई कारबाही नहुने तर्क गरे ।

प्रतिनिधिसभा विघटनविरुद्ध प्रमुख प्रतिपक्षी दलका नेतासमेत रहेका कांग्रेस सभापति शेरबहादुर देउवालगायत १ सय ४६ सांसदले दायर गरेको रिटमाथि संवैधानिक इजलासमा सुनुवाइ भइरहेको छ ।

प्रकाशित : असार ९, २०७८ १२:३१
प्रतिक्रिया
पठाउनुहोस्

रोल्पामा पहिरोले घर भत्किँदा एकै परिवारका तीन जनाको मृत्यु

घाइते तीनमध्ये दुई जनालाई हेलिकप्टरबाट बुटवल लगिँदै 
काशीराम डाँगी

रोल्पा — पहिरोले घर भत्किँदा रोल्पामा एकै परिवारका तीन जनाको ज्यान गएको छ । अन्य तीन जना घाइते छन् । मंगलबार राति घरमाथिबाट पहिरो खसेको प्रहरीले जनाएको छ ।

प्रहरीका अनुसार रोल्पा नगरपालिका–९ ह्वामा गाउँस्थित ढाम्पा टोलस्थित स्थानीय ४० वर्षका टीकासिंह बूढामगरको घरमाथि पहिरो खस्दा टीकासिंहकी आमा ८६ वर्षकी कर्मिता, बुहारी १८ वर्षकी सुशीला र छोरी १५ वर्षकी श्यामकलाको ज्यान गएको हो । पहिरोमा परी घर भत्कँदा टीकासिंह, उनकी पत्नी सुनमाया र ९ वर्षका छोरा शक्तिमान घाइते भएका हुन् ।

घाइतेमध्ये गम्भीर अवस्थाका टीकासिंह र उनका छोरा शक्तिमानलाई हेलिकप्टरबाट थप उपचारका लागि बुटवलस्थित अस्पतालमा लैजाने तयारी गरिएको प्रमुख जिल्ला अधिकारी नवराज सापकोटाले बताए । टीकासिंहको खुट्टालगायत शरीरको धेरै भागमा गम्भीर चोट लागेको छ । उनकी पत्नीलाई सामान्य चोट लागेको घटनास्थल पुगेका डीएसपी नरेशराज सुवेदीले बताए । जिल्लामा केही दिन यता निरन्तर वर्षा भइरहेको छ ।

वर्षा भइरहेका बेला टीकासिंहको दुई तले घर भत्किएको डीएसपी सुवेदीले बताए । उनका अनुसार बिहान ४ बजे खबर पाएपछि घटनास्थल पुग्न ४ घण्टा लागेको थियो । सदरमुकाम लिबाङदेखि करिब २० किलोमिटर टाढा पर्ने उक्त घटनास्थल लिवनस्थित वागेश्वरी माध्यमिक विद्यालय नजिकै पर्छ । वर्षाले सडक अवरुद्ध भएकाले प्रहरी घटनास्थल हिँडेर पुग्नु परेको डीएसपी सुवेदीले बताए । घटनाको खबर पाएपछि उद्धार गर्न जुटेकाले राति १ बजेदेखि अनिदो भएको प्रजिअ सापकोटाले बताए ।

‘प्रदेश र गृह मन्त्रालयमा सम्पर्क गरेपछि उद्धार र थप उपचारका लागि हेलिकप्टर बोलाउने व्यवस्था मिलाएका छौं,’ प्रजिअ सापकोटाले भने ।

प्रकाशित : असार ९, २०७८ १२:२६
पूरा पढ्नुहोस्
प्रतिक्रिया
पठाउनुहोस्
×