एमाले सुदूरपश्चिम संसदीय दलद्वारा ओली पक्षधर ७ जना सांसदलाई निलम्बन गर्ने निर्णय- समाचार - कान्तिपुर समाचार
कान्तिपुर वेबसाईट
AdvertisementAdvertisement

एमाले सुदूरपश्चिम संसदीय दलद्वारा ओली पक्षधर ७ जना सांसदलाई निलम्बन गर्ने निर्णय

निलम्बन गरिएकामा पठानसिंह बोहरा, रतनबहादुर थापा, लिलाधर भट्ट, बलदेव रेग्मी, माया तामाङ बोहरा, नेपालु चौधरी र ग्याल्बोसिंह बोहरा रहेका छन्
अर्जुन शाह

धनगढी — ह्वीप उल्लंघन गरेको आरोपमा नेकपा एमाले सुदूरपश्चिम संसदीय दलको सोमबार बसेको बैठकले ओली पक्षधर ७ जना सांसदलाई निलम्बन गर्ने निर्णय गरेको छ । 

एमाले सुदूरपश्चिम संसदीय दलको बैठक । फाइल तस्बिर ।

निलम्बन गरिएकामा पठानसिंह बोहरा, रतनबहादुर थापा, लिलाधर भट्ट, बलदेव रेग्मी, माया तामाङ बोहरा, नेपालु चौधरी र ग्याल्बोसिंह बोहरा रहेका छन् । उनीहरुमध्ये बोहरा र थापालाई १५ दिन, भट्ट र रेग्मीलाई १० दिन र अन्य चार जनालाई ७ दिन निलम्बन गर्ने निर्णय गरिएको एमाले संसदीय दलकी प्रमुख सचेतक दुर्गाकुमारी कामीले बताइन् ।

जेठ २५ गते मुख्यमन्त्री त्रिलोचन भट्टलाई विश्वासको मत दिने निर्णयका विरुद्ध अध्यक्ष ओली पक्षधर उनीहरुले दलको ह्वीप उल्लंघन गरेका थिए । त्यस अभियोगमा उनीहरुलाई दलका नेता प्रकाशबहादुर शाहले २४ घण्टे स्पष्टिकरण सोधेका थिए । आइतबार निर्णयार्थ पेश भएको नीति तथा कार्यक्रमको समेत उनीहरुले विपक्षमा मत जाहेर गरेका थिए ।

निलम्बनको निर्णयमा परेका सांसदहरुले भने दलको विधान नै वैधानिक नभएकाले त्यसको कुनै औचित्य नभएको बताएका छन् । ‘संसदीय दलको विधान केन्द्रिय कमिटिबाट अनुमोदन हुनुपर्ने नियम छ, त्यो भएको छैन्,’ सांसद बोहराले भने, ‘हामीले पार्टी निर्देशन मान्य हो । पार्टीले विपक्षमा मतदान गर्न निर्देशन गरेको हो ।’ दलको बैठकमा निलम्बन गरिएका सांसदहरु पनि उपस्थित थिए ।

संसदीय दलले गरेको निर्णय सभामुखले स्वीकृत गरी सूचना टाँस गरेमा मात्र उनीहरु निलम्बनमा पर्ने छन् । ‘अब सभामुखको हातमा छ, हामी त भोलि संसद बैठकमा जान्छौ,’ सांसद बोहराले भने ।

प्रकाशित : जेष्ठ ३१, २०७८ २०:५४
प्रतिक्रिया
पठाउनुहोस्

सिकको दुई गोलमा चेक गणतन्त्र विजयी

एजेन्सी

ग्लास्को — बायर लेभरकुजनका फरवार्ड प्याट्रिक सिकले गरेको दुई गोलको मद्दतले चेक गणतन्त्रले सोमबार युरो २०२० को समूह ‘डी’ को खेलमा स्कटल्यान्डलाई २–० ले हराएको छ । यो जितपछि चेक टिमले समूहमा सुरुआती शीर्ष स्थान पनि कब्जा गरेको छ ।

ह्याम्पडेन पार्कमा भएको खेलमा सिक ले ४२ औं मिनेटमा हेडबाट पहिलो गोल गरे । उनले ५२ औं मिनेटमा गरेको गोल भने युरो इतिहासकै एक उत्कृष्ट गोलमध्ये रह्यो । सिकले मैदानको मध्यभागबाट गरेको प्रहारले घुमाउरो बाटो तय गर्दै सुन्दर गोलमा परिणत भएको थियो ।

पूरा खेल अवधिमा स्कटल्यान्ड हाबी रहे पनि टिमले गोल भने निकाल्न सकेन र त्यसको मूल्य चुकाउन बाध्य रह्यो ।

समूह ‘डी’ मा चेकसँगै इंग्ल्यान्डको तीन अंक भएको छ । इंग्ल्यान्ड गोल अन्तरमा दोस्रो स्थानमा छ । इंग्ल्यान्डले यसअघि क्रोएसियालाई हराएको थियो ।

प्रकाशित : जेष्ठ ३१, २०७८ २०:४६
पूरा पढ्नुहोस्
प्रतिक्रिया
पठाउनुहोस्
×