'बादल'को बिरासत नैनकलाको काँधमा !- समाचार - कान्तिपुर समाचार
कान्तिपुर वेबसाईट
AdvertisementAdvertisement

'बादल'को बिरासत नैनकलाको काँधमा !

कान्तिपुर संवाददाता

काठमाडौँ — सर्वोच्च अदालतको ६ जेठको आदेशअनुसार तत्कालीन गृहमन्त्री रामबहादुर थापा 'बादल' पदमुक्त भए र सिंहदरबारबाट बाहिरिए ।

तस्बिर : रासस

तर, एक महिना नपुग्दै थापा पत्नी नैनकला थापा एमाले नेतृको हैसियतमा सञ्चार तथा सूचना प्रविधिमन्त्रीको रुपमा सिंहदरबार प्रवेश गरेकी छन् । यस अर्थमा थापाको सिंहदरबारको बिरासत नैनकलाको काँधमा आएको छ ।

पालैपालो पति–पत्नी मन्त्री भएको र एकैपटक सञ्चार तथा सूचना प्रविधिमन्त्रीजस्तो महत्वपूर्ण मन्त्रालय दिइएको भन्दै नैनकलाको क्षमतामाथि प्रश्न पनि उठेका छन् । फागुन २३ मा नेकपा भंग भएपछि पूर्वमाओवादीका तर्फबाट थापा सबभन्दा वरिष्ठ नेता हुन्, जो एमालेमा गएका थिए । यस अर्थमा प्रधानमन्त्री केपी शर्मा ओलीले थापालाई खुसी पार्न र पूर्वमाओवादीको सहानुभूति लिन नैनकलालाई सञ्चार तथा सूचना प्रविधिमन्त्री मन्त्रालयको जिम्मेवारी दिएको बुझ्न कठिन छैन ।

पूर्वमाओवादी कोटाबाट दुई मन्त्री बनाउँदा नैनकला सञ्चारमन्त्री बनेकी हुन् । तर, मन्त्री कसलाई बनाउने भन्ने विषयमा पूर्वमाओवादीभित्रै छलफल नभएको यसअघि ओली सरकारमा रहेका एक मन्त्रीले बताए । उनका अनुसार थापाले नैनकलालाई मन्त्री बनाउने निर्णय एकलरुपमा लिएका हुन् ।

‘नैनकलाजीलाई मन्त्री बनाउने विषयमा बादल कमरेडले हाम्रो समूहमा छलफल गर्नुभएन, आफ्नोतर्फबाट प्रस्ताव गर्नुभयो,’ अदालतले पदमुक्त गरेका एक पूर्वमन्त्री भन्छन्, ‘उहाँको योग्यता र क्षमतामाथि प्रश्न छैन, विधि–प्रक्रियाको कुरामात्र गरेका हौँ ।’ पूर्वमाओवादी समूहका अर्का नेता टोपबहादुर रायमाझीले राष्ट्रियसभाको उपनिर्वाचनमा लुम्बिनी प्रदेशमा पराजय भोगेका चन्दबहादुर खड्कालाई मन्त्री बनाउनुपर्ने लविङ् गरेका थिए ।

यसअघि विस्तार गरेको मन्त्रिपरिषद् असंवैधानिक भन्दै सर्वोच्च अदालतमा मुद्दा चलेकै बेला ओलीले दोस्रोपटक पूर्वमाओवादीसमेत समेटेर मन्त्रिपरिषद् हेरफेर गरेका हुन् ।

विपक्षीहरुले ओलीले प्रतिगमन गरेको आरोप लगाइरहेका बेला उनकै मन्त्रिपरिषद्‍मा नैनकला सहभागी बन्ने अवसर पाएकी छन् । नैनकलाले बिहीबार पदभारसमेत ग्रहण गरेकी छन् । पदबहाली गर्दै उनले साइवर सुरक्षा नीति २०७८ कार्यदल बनाउने पहिलो निर्णय गरेकी छिन् ।

यसअघि २०६४–२०६८ सम्म महिला आयोगको अध्यक्ष भएर काम गरेकी र पछिल्लो समय सक्रिय राजनीतिबाट टाढा रहेकी नैनकलाले संचार मन्त्रालय कसरी चलाउँछिन् ? प्रश्न भने उठेको छ । नैनकलासँग राजनीतिक सहकार्य गरेकाहरुको यसबारे मिश्रित प्रतिक्रिया छ ।

नैनकलाकी पूर्वसहकर्मी जयपुरी घर्ती भन्छिन्, ‘अहिलेको सरकार सञ्चालन, मन्त्रिपरिषद् यो सबै हेर्दा अरुले सक्छन्, उहाँले सक्नु हुन्न भन्ने भएन । उहाँको क्षमता–योग्यता पनि छ । अब कसरी जानुहुन्छ, त्यो उहाँको विषय भयो । किनकी अहिले राजनीतिक–वैचारिक हिसाबले उहाँ प्रतिगमनको कित्ता समाउनु भएको छ, म प्रतिगमनको विरुद्धमा छु ।’

पूर्र्वशिक्षिका समेत रहेकी नैनकला ०३५/०३६ विद्यार्थी आन्दोलनमा सहभागी भएकी थिइन् । अखिल नेपाल महिला संघको केन्द्रीय सदस्य हुँदै महासचिव भएर उनले काम गरेकी थिइन् ।

त्यसपछि सक्रिय राजनीतिमा नरहेकी नैनकला तत्कालीन माओवादी केन्द्रको केन्द्रीय सल्लाहकार थिइन् । फेरि सक्रिय राजनीतिक मैदानमा उत्रेकी नैनकलाको अर्को परीक्षा सुरु भएको छ । यसको नतिजा उनको कार्यकालले तय गर्नेछ ।

प्रकाशित : जेष्ठ २७, २०७८ २०:०१
प्रतिक्रिया
पठाउनुहोस्

गण्डकीका विपक्षी गठबन्धनका नेताहरु भन्छन्, 'बहुमत पुर्‍याएर सरकारमा जान्‍छौं'

प्रतीक्षा काफ्ले

कास्की — गण्डकी प्रदेशमा मुख्यमन्त्री पृथ्वीसुब्बा गुरुङले बिहीबार विश्वासको मत प्राप्त गर्न नसकेपछि नयाँ सरकार गठनकाँ लागि बाटो खुलेको छ । विपक्षी गठबन्धनका प्रस्तावित मुख्यमन्त्री कृष्णचन्द्र नेपालीले बहुमत पुर्‍याएर नयाँ सरकार गठन गर्ने बताएका छन् ।

संचारकर्मीसँग कुरा गर्दै उनले सरकार गठनका लागि बहुमत पुर्‍याएर सरकारमा जाने बताएका हुन् । गठबन्धन (कांग्रेस, माओवादी, जसपा र राजमो) को लागि सरकार गठनको लागि ३१ मको आवश्यक पर्छ ।

माओवादी केन्द्रका सांसद लेखबहादुर थापाले पनि गठबन्धनले सरकार बनाउने दाबी गरेका छन् । जसपाका हरिशरण आचार्यले पनि नयाँ सरकार गठन हुनेमा दाबी गरेका छन् ।

वैशाख २९ मा मुख्यमन्त्री नियुक्त भएका गुरुङले जम्मा २७ जनाको विश्वासको मत पाएका थिए । विश्वासको मत नपाएपछि उनी पदमुक्त भएका छन् । गुरुङले संवैधानिक प्रक्रियाअनुसार अगाडि बढ्ने बताएका छन् ।

प्रदेश प्रमुखले अब संविधानको धारा १६८ को ५ अनुसार मुख्यमन्त्री नियुक्तिका लागि आह्वान गर्नेछिन् । ६० सदस्यीय रहेको गण्डकीमा कांग्रेसका १५, माओवादीका सभामुखसहित १२, जसपाका २ र राजमोका ३ सांसद छन् । गुरुङले लिएको विश्वासको मतको पक्षमा जम्मा २७ जना उभिएका थिए भने राजमोका कृष्ण थापा तटस्थ बसेका थिए ।

मुख्यमन्त्रीले नै नियुक्त गरेका युवा तथा खेलकुदमन्त्री राजीव गुरुङ भने उपस्थिति भएनन् ।

प्रकाशित : जेष्ठ २७, २०७८ १९:५३
पूरा पढ्नुहोस्
प्रतिक्रिया
पठाउनुहोस्
×