मेलम्चीको पानी आपूर्ति २ महिना बन्द हुने- समाचार - कान्तिपुर समाचार
कान्तिपुर वेबसाईट
AdvertisementAdvertisement

मेलम्चीको पानी आपूर्ति २ महिना बन्द हुने

दीपेन्द्र विष्ट

काठमाडौँ — खानेपानी तथा सरसफाई मन्त्रालयले मेलम्ची खानेपानीको सुरुङ  मर्मत गर्ने जनाएको छ । असार १ गते सुरुङदेखि भदौसम्म मर्मत गर्ने भएकाले दुई महिना पानी आपूर्तिमा कमि हुने भएको छ । मन्त्रालयका अनुसार उपत्यकाको पानी आपूर्तिमा कमी हुन नदिन विकल्पको खोजी भइरहेको छ । 

‘विगत वर्षजस्तै यसपटक पनि वाग्मतीको पानी प्रशोधन केन्द्रबाट प्रशोधित गरेर पठाउने तयारी गर्छौं,’ मन्त्रालय का एक उच्च अधिकारीले भने, ‘जसरी पनि पानी आपूर्ति गर्नुपर्छ भन्नेमा छौं, विभिन्न चरणमा छलफल भइहरेको छ ।’ मेलम्ची कार्यान्वयन निर्देशनालय र काठमाडौं उपत्यका खानेपानी लिमिटेड (केयूकेएल)लाई वैकल्पिक व्यवस्थापन गर्न निर्देशन दिइसकेको ती अधिकारीले बताए । गत वर्षदेखि वर्षातको तीन महिना मेलम्ची खानेपानी आयोजनाले बाग्मतीबाट दैनिक करिब ३ करोड लिटर भन्दा बढी पानी प्रशोधन गरेर उपभोक्ताको घर घरमा पठाएको ती अधिकारीले बताए ।

वैशाखदेखि मेलम्ची खानेपानी आयोजनाले दैनिक १७ करोड लिटर पानी वितरण सुरु गरेको हो । गत १५ चैत्रमा साडे ४ करोडबाट सुरु गरेको आयोजनाले पानी वितरण सुरु गरेको थियो । त्यसपछि पूर्णरुपमा १७ करोड लिटर पानी वितरण गर्न थालेको हो ।

मेलम्ची खानेपानी आयोजनाका प्रमुख रामकुमार श्रेष्ठले नयाँ सुरुङ भएकाले नियमित मर्मत गर्नुपर्ने बताए । ‘कतै समस्या आएको होइन,’ उनले भने, ‘एक महिना अघि नै मर्मत गर्नु पर्ने हो, ढिलो भयो, अब त चाँडो चाँडोभन्दा मर्मत गछौं ।’ विभिन्न ढोका, सुरुङ, ढलान गरेको स्थान लगायतको निरीक्षण गरेर मर्मत गर्नुपर्ने उनले बताए । तर, हालसम्म आयोजनामा खराबी भने केही पनि नआएको उनले बताए । हाल मेलम्चीको पानी विभिन्न स्थान पठाइरहेको भन्दै उनले ती स्थानमा पानीको कमी हुन नदिने उनले बताए ।

मिनभवन, खुमलटार, अनामनगर, बालाजु, महाराजगञ्ज, बाँसबारी र महाकाल लगायतका वितरण केन्द्रमार्फत अहिले पानी वितरण भइरहेको उनले बताए । हाल काठमाडौं विभिन्न स्थानमा पानी पोखरीको निर्माण पनि अन्तिम चरणमा पुगेको भन्दै उनले पाइप सफा गर्ने काम पनि भइरहेको बताए ।

काठमाडौं उपत्यका खानेपानी लिमिटेड (केयूकेएल) का कार्यकारी निर्देशक मिलन शाक्यले १ हजार ५१ हजार ग्राहकको घरमा पानी वितरण भरहेको बताए । पानीको अभाव हुन नदिने भन्दै वैकल्पिक प्रक्रियाबाट पानी आपूर्ति गरिने बताए ।

प्रकाशित : जेष्ठ २०, २०७८ २०:३०
प्रतिक्रिया
पठाउनुहोस्

लम्ब्याइँदै मदन भण्डारी लोकमार्ग

१२६० किमि लामो सडक १३६० किमि पुर्‍याइने, हालसम्म ६६७ किमि कालोपत्र पूरा
दीपेन्द्र विष्ट

काठमाडौँ — सरकारले मदन भण्डारी लोकमार्गको लम्बाइ बढाएर १ हजार ३ सय ६० किलोमिटर पुर्‍याउने भएको छ । हाल १ हजार २ सय ६० किमि लामो यो लोकमार्गलाई थप सय किमि लम्ब्याउने तयारी गरिएको भौतिक पूर्वाधार तथा यातायात मन्त्रालयले जनाएको छ ।

गुल्मीको रिडीदेखि प्यूठान, रोल्पा हुँदै सुर्खेतसम्मको केही खण्डलाई लोकमार्गमा थप्न लागिएको मन्त्रालयका एक उच्च अधिकारीले बताए । ‘केही दिनभित्रै यो निर्णय हुँदै छ,’ उनले भने ।

२०७५ जेठ ६ मा सरकारले चुरे तथा भित्री मधेसका उपत्यकालगायत मुलुकका प्रमुख सहर धरान, गाईघाट, हेटौंडा, भरतपुर, घोराही, सुर्खेत हुँदै डडेलधुराको रूपालमा गएर टुंगिने गरी लोकमार्ग बनाउन थालेको थियो । हेटौंडापूर्वको अधिकांश खण्डको काम सकिने चरणमा रहेको मदन भण्डारी सडक आयोजनाले जनाएको छ । हाल लोकमार्गको ४ सय ९३ किमि सडक विभाग र ७ सय ७७ किमि आयोजनाले निर्माण गरिरहेको आयोजना प्रमुख उमेशविन्दु श्रेष्ठले बताए । ‘पुल निर्माण, ठेक्का, कालोपत्र गर्ने काम धमाधम भइराखेको छ,’ उनले भने, ‘पश्चिम खण्डको विस्तृत अध्ययन प्रतिवेदन (डीपीआर) तयार भइरहेको छ ।’

चुरे तथा भित्री मधेसमा रहेका बस्ती विकासका लागि सडक यातायात पुर्‍याउन सरकारले यो लोकमार्ग बनाउन थालेको थियो । ‘पूर्व मेचीदेखि पश्चिम महाकालीसम्मको चुरे क्षेत्रलाई औद्योगिक करिडोरका रूपमा विकास गर्न आवश्यक देखिएपछि लोकमार्गको योजना बनेको हो,’ उनले भने । सडक बनेपछि चुरे क्षेत्र आसपासका चुनढुंगा, कोइला, फलामलगायत खानी सञ्चालनको प्रशस्त सम्भावना रहनेछ । प्रमुख सहर जोडिने भएकाले त्यहाँका उत्पादित वस्तुले बजार पाउनेछन् । ती सहरमा औद्यौगिकलगायत आर्थिक गतिविधि बढ्ने उनको दाबी छ ।

अब झापाको बाहुनडाँगीबाट सुरु भई डडेलधुराको रूपालसम्म करिब १ हजार ३ सय ६० किमि सडक हुने उनले बताए । यो लोकमार्गले धरान, चतरा, उदयरपुरको गाईघाट, कटारी, सिन्धुलीको सिन्धुलीमाढी, मकवानपुरको हेटौंडा, पूर्वी नवलपरासीको गैंडाकोट, पाल्पाको रामपुर, गुल्मीको रिडी, रोल्पा, प्यूठान हुँदै सुर्खेत जोड्नेछ  । गुल्मीको तम्घास, सिमलटारी, प्यूठानको बागदुला, देवीस्थान, दाङको घोराही, तुलसीपुर, पुरनधारा, सुर्खेतको बोटेचौर, बड्डीचौर, डोटीको सिमचौर, बीपीनगर, कैलालीको सहजपुर, बुडर, जोगबुढा हुँदै रूपालसम्म पुग्नेछ ।

दुई लेन प्रस्ताव गरिएको यो सडक निर्माणको लागत ५ अर्ब रुपैयाँभन्दा बढी अनुमान गरिएको छ । सडक ठाउँठाउँमा मध्यपहाडी, पूर्वपश्चिम राजमार्ग र धरान–चतरा राजमार्गका विभिन्न खण्डमा जोडिनेछ । प्रमुख श्रेष्ठका अनुसार धरान–चतरा–गाईघाट–सिन्धुलीमाढी–हेटौंडा खण्ड निर्माणकार्य तीव्र पारिएको छ । हेटौंडादेखि गैंडाकोटसम्म पूर्व–पश्चिम राजमार्ग नै प्रयोग हुनेछ । गैंडाकोटबाट पाल्पाको रामपुर हुँदै लोकमार्गले गुल्मी जोड्नेछ । यो खण्ड कालोपत्र भइसकेको छ । सिन्धुली–हेटौंडा खण्डको १ सय २ किमि र ३३ वटा पुलको पनि निर्माण भइसकेको छ । धरान–झापा खण्डमा ४९ वटा पुल नेपाल सरकारले निर्माण गरे पनि विश्व बैंकबाट रकम शोधभर्ना हुने गरी बनाइएको हो । आयोजनाका अनुसार लोकमार्गअन्तर्गत ६६७ किमि सडक कालोपत्र भइसकेको छ ।

केही खण्डमा डीपीआर बाँकी रहे पनि यसै वर्ष काम सुरु हुने आयोजनाले जनाएको छ  । केही खण्डमा नयाँ ट्र्याक खोल्नुपर्नेछ । केही खण्डमा स्तरोन्नति मात्रै गरे पुग्ने श्रेष्ठले बताए । पश्चिम क्षेत्रअन्तर्गत विभिन्न खण्ड निर्माणका लागि कार्यालय स्थापना गरी निर्माणको प्रक्रिया थालिएको छ । लोकमार्गअन्तर्गत विभिन्न खण्डमा अहिले पनि सवारी साधन चलिरहेका छन् ।

प्रकाशित : वैशाख १२, २०७८ ०६:५१
पूरा पढ्नुहोस्
प्रतिक्रिया
पठाउनुहोस्
×