गण्डकी सरकारले ११ जिल्लालाई औषधि किन्‍न ५५ लाख दिने- समाचार - कान्तिपुर समाचार
कान्तिपुर वेबसाईट
AdvertisementAdvertisement

गण्डकी सरकारले ११ जिल्लालाई औषधि किन्‍न ५५ लाख दिने

कान्तिपुर संवाददाता

कास्की — औषधि खरिदका लागि गण्डकी प्रदेश सरकारले प्रदेशका ११ जिल्लालाई ५५ लाख रुपैयाँ दिने भएको छ । स्वास्थ्य मन्त्रालयको जिम्मेवारीसमेत समालेका मुख्यमन्त्री पृथ्वीसुब्बा गुरुङले कोभिड १९ संक्रमणको रोकथाम, निदान, नियन्त्रण र उपचारसम्बन्धी बसेको बैठकमा प्रदेशका ११ वटै जिल्ला स्वास्थ्य कार्यालयलाई ५/५ लाखको दरले उपलब्ध गराउने निर्णय गरेको हो ।

यसैगरी, अक्सिजन फिलिङ र ढुवानीका लागि ११ वटै जिल्ला अस्पताललाई ५/५ लाख रुपैयाँ दिइने निर्णय भएको छ । कोभिड उपचारमा खटिने स्वास्थ्यकर्मी, चिकित्सक र कर्मचारीलाई खाजा खुवाउन प्रत्येक जिल्ला अस्पतालाई ५/५ लाख रुपैयाँको दरले ५५ लाख रुपैयाँ दिने निर्णय पनि सो बैठकले गरेको मुख्यमन्त्रीका प्रेस संयोजक विक्रम न्यौपानेले जानकारी दिए ।

उनका अनुसार सबै जिल्लाका डीसीसीएमसीलाई कोभिड व्यवस्थापनका लागि पनि २/२ लाख रुपैयाँ दिने निर्णय भएको छ । यससँगै प्रदेश सरकारले गाउँ गाउँमा एन्टिजेन परीक्षणको दायरा बढाउने भएको छ ।

समयमै कोभिड परीक्षणका लागि कर्मचारीलाई प्रेरित गर्ने, मनोबल उच्च बनाउने र टिम बनाएर गाउँ गाउँ खटाउने योजना सरकारले तय गरेको छ । भर्चुअल बैठकमा सबै जिल्लाका स्वास्थ्य कार्यालयका प्रमुख, जिल्ला अस्पतालका मेसुर, जिल्ला आयुर्वेद अस्पतालका प्रमुख र स्वास्थ्य तथा जनसंख्या मन्त्रालयका निर्देशकहरुको सहभागिता थियो ।

प्रकाशित : जेष्ठ १६, २०७८ २२:१४
प्रतिक्रिया
पठाउनुहोस्

कोरोना संक्रमित स्वास्थ्यकर्मी र कर्मचारीलाई उपचार खर्च र क्षतिपूर्ति

टीकाप्रसाद भट्ट

रामेछाप — रामेछापको लिखु तामाकोसी गाउँपालिकाले कोरोना संक्रमित हुने स्वास्थ्यकर्मीलगायत कर्मचारीलाई उपचार र क्षतिपूर्तिको घोषणा गरेको छ । 

गाउँ कार्यपालिकाको आइतबारको बैठकले कोरोनाका कारण बिरामी भई उपचार गराउनुपर्ने कर्मचारीलाई १ लाख उपचार खर्च र सोही रोगका कारण मृत्यु हुने पुगेमा त्यस्ता कर्मचारीका परिवारलाई १० लाख क्षतिपूर्ति उपलब्ध गराउने निर्णय गरेको गाउँपालिकाका अध्यक्ष गोबिन्दवहादुर खड्काले जानकारी दिए ।

खड्काका अनुसार पालिकामा हालसम्म ७ जनाको कोरोनाले ज्यान गएको र केही उपचारको क्रममा रहेकोले थप कोरोना फैलन नदिन सतर्कता अपनाउने, संक्रमित भई उपचार गर्ने बिरामीलाई उपचारका अतिरिक्त १ हजार उपलब्ध गराउने र संक्रमितका लागि पालिकाबाट २ वटा डेडिकेटेड एम्बुलेन्सका अतिरिक्त २ वटा गाडी व्यवस्था गरिएको छ ।

यसैबीच नेपाल सरकारको नीतिअनुसार लिखु तामाकोसी गाउँपालिकामा निर्माण हुने १५ शय्याको अस्पताल बिजुलीकोटको नागिमा शीलान्यास गरेकोमा बजेट खिम्ती प्राथमिक स्वास्थ्यका लागि विनपयोजन भएकाले उक्त अस्पताल नाघीमा नै बनाउने निर्णय गरेको खड्काले बताए । उनले नाघी पालिकाका अधिकांश नागरिकलाई पायक पर्ने स्थान रहेको बताए ।

प्रकाशित : जेष्ठ १६, २०७८ २१:५३
पूरा पढ्नुहोस्
प्रतिक्रिया
पठाउनुहोस्
×