पूर्वसभामुखहरूसँग छलफलमा सभामुख सापकोटा, नेम्वाङ अनुपस्थित
काठमाडौँ — प्रतिनिधिसभा विघटनबारे सभामुख अग्निप्रसाद सापकोटाले पूर्वसभामुखहरूसँग छलफल गरिरहेका छन् । संघीय संसद् भवन नयाँ बानेश्वरमा सभामुख सापकोटा पूर्वसभामुखहरूसँग छलफलमा बसेका हुन् ।
सभामुख सापकोटाले प्रतिनिधिसभा विघटनका विषयमा पूर्वसभामुखसँग आफूले खेल्नुपर्ने भूमिकाबारे छलफल गरिरहेका हुन् । सभामुख सापकोटाका प्रेस सल्लाहकार श्रीधर न्यौपानेका अनुसार सभामुखले बोलाएको बैठकमा पूर्वसभामुख रामचन्द्र पौडेल, ओनसरी घर्ती र कृष्णबहादुर महरा सहभागी छन् । त्यस्तै, पूर्वसभामुख तारनाथ रानाभाट भने भर्चुअल माध्यमबाट बैठकमा सहभागी रहेको उनले बताए ।
संविधानसभा अध्यक्षसमेत रहेका पूर्वसभामुख सुवासचन्द्र नेम्वाङ भने सभामुख सापकोटाले बोलाएको बैठकमा अनुपस्थित छन् । उनलाई बैठकमा बोलाइए पनि अनुपस्थित रहेको बताइएको छ ।
प्रतिनिधिसभा विघटनबारे अन्य पूर्वसभामुखहरूले असंवैधानिक भनेर आलोचना गरिरहेका बेला नेम्वाङ भने बोलेका छैनन् । प्रधानमन्त्री केपी शर्मा ओलीका निकट रहेका नेम्वाङ पुस ५ गतेको विघटनमा पनि मौन रहेका थिए ।
राष्ट्रपति विद्यादेवी भण्डारीले शुक्रबार राति प्रधानमन्त्री ओलीको सिफारिसमा प्रतिनिधिसभा विघटन गरेकी थिइन् । उक्त कदमविरुद्ध प्रतिनिधिसभाका १ सय ४६ सांसद सर्वोच्च अदालतमा रिट लिएका गएका छन् । राष्ट्रपतिले भने मन्त्रिपरिषद्को सिफारिसमा कार्तिक २६ गते र मंसिर ३ गते गरी दुई चरणमा प्रतिनिधिसभाको निर्वाचन घोषणा गरेकी छन् ।
सभामुख सापकोटाले यसअघि विज्ञप्ति जारी गरेर प्रतिनिधिसभा विघटनको विरोध गरेका थिए ।
प्रकाशित : जेष्ठ ११, २०७८ १५:२२