राष्ट्रपतिलाई महाभियोग लगाऔं, विपक्षीहरू एकजुट भई सरकार बनाऔं : विवेकशील साझा- समाचार - कान्तिपुर समाचार

राष्ट्रपतिलाई महाभियोग लगाऔं, विपक्षीहरू एकजुट भई सरकार बनाऔं : विवेकशील साझा

कान्तिपुर संवाददाता

काठमाडौँ — विवेकशील साझा पार्टीले राष्ट्रपति विद्यादेवी भण्डारीमाथि महाभियोग लगाएर विपक्षी दलहरू एकजुट भई नयाँ सरकार गठन गर्नुपर्ने जनाएको छ ।

प्रधानमन्त्रीले प्रतिनिधिसभामा विश्वासको मत प्राप्त गर्नुपर्नेमा बिहीबार साँझ राष्ट्रपतिले नयाँ प्रधानमन्त्री नियुक्तिका लागि अघि बढाएको प्रक्रियाबाट संविधानको ठाडो उल्लंघन भएको ठहर गर्दै पार्टीले प्रधानमन्त्रीको सिफारिसलाई राष्ट्रपतिले रबर स्ट्याम्पसरह सदर गरेको आरोप लगाएको छ ।

‘संविधानको रक्षा गर्ने दायित्व बोकेको राष्ट्रपति संस्थाको बारम्बार साख गिराउने, अपमान गर्ने र देशको होइन केवल प्रधानमन्त्रीको राष्ट्रपतिका रूपमा काम गर्ने विद्यादेवी भण्डारीमाथि तत्काल महाभियोग लगाएर उनलाई पदमुक्त गर्दै संसद्मा प्रधानमन्त्री ओलीको विपक्षमा रहेका दल तथा सांसदहरू एक जुट भई नयाँ सरकार गठनका लागि पहल गर्न विवेकशील साझा पार्टी आह्वान गर्दछ,’ पार्टीले शुक्रबार जारी गरेको विज्ञप्तिमा उल्लेख छ ।

वैकल्पिक सरकार गठनका लागि लगभग २० घण्टाको मात्र समय दिइनु ओलीलाई नै फेरि प्रधानमन्त्री बनाएर संसद् विघटन गरी मध्यावधि चुनावको बहानामा मुलुकलाई अस्थिरतातर्फ होम्ने पुरानै षड्यन्त्रको निरन्तरता रहेको पार्टीले औंल्याएको छ ।

‘संविधानत: प्रधानमन्त्रीले पदमा बहाल रहँदै अर्को प्रधानमन्त्री नियुक्त गर्न सिफारिस गर्ने र राष्ट्रपतिले त्यसलाई सदर गर्नेजस्तो अनौठो र अत्यन्त अस्वाभाविक दृश्य विश्व राजनीतिमा सायदै कतै देखिएला,’ पार्टी प्रवक्ता शरदराज पाठकले जारी गरेको विज्ञप्तिमा भनिएको छ ।

कोरोना महामारीको तेस्रो लहरले झनै भयावह स्थिति ल्याउने चेतावनी विज्ञहरूले दिइरहँदा मुलुकलाई चुनावतर्फ धकेल्न खोज्नु अक्षम्य अपराध रहेको पनि पार्टीले जनाएको छ ।

प्रकाशित : जेष्ठ ७, २०७८ ०९:४७
प्रतिक्रिया
पठाउनुहोस्

लौरो उभ्याएर भए पनि ७६(५)को वैकल्पिक सरकार दिऔँ : बाबुराम भट्टराई

'बीपी/पीएलदेखि हाम्रो पुस्तासम्मले लडेर ल्याएको संविधान/लोकतन्त्रको रक्षा नभए इतिहासले धिक्कार्नेछ!'
कान्तिपुर संवाददाता

काठमाडौँ — जनता समाजवादी पार्टी(जसपा) का संघीय परिषद् अध्यक्ष बाबुराम भट्टराईले संविधानको धारा ७६(५) अनुसार वैकल्पिक सरकार बनाउनुपर्ने बताएका छन् ।

भट्टराईले संसद्, संविधान र लोकतन्त्रको रक्षाका लागि वैकल्पिक सरकार बनाउनुपर्ने बताएका हुन् । त्यसका लागि सबैले आवश्यक त्याग र बलिदान गर्न पनि उनले आग्रह गरेका छन् । उनले शुक्रबार बिहान सामाजिक सञ्जालमा लेखेका छन्, 'संसद,संविधान,लोकतन्त्रको रक्षा आजको अहं प्रश्न हो!जे गरेर रक्षा हुन्छ त्यही गरौं।सबैले आवश्यक त्याग/बलिदान गरौं।लौरो उभ्याएर भए पनि ७६(५)को वैकल्पिक सरकार दिऊॅ!आजै गरौं,अहिल्यै गरौं! बीपी/पीएलदेखि हाम्रो पुस्तासम्मले लडेर ल्याएको संविधान/लोकतन्त्रको रक्षा नभए इतिहासले धिक्कार्नेछ!'

यसअघि बिहीबार बेलुका भट्टराईले प्रधानमन्त्री र राष्ट्रपतिले संविधानमाठ्ठि आक्रमण गरेको बताएका थिए । उनले राष्ट्रपति र प्रधानमन्त्रीले 'कोरोना महामारीका बेला अनिश्चित र हुनसेन स्टाइल चुनावको अँध्यारो सुरुङमा धकेलेको' बताएका थिए ।

यसैबीच जनता समाजवादी पार्टी(जसपा)ले संसदीय दलको बैठक बोलाएको छ । जसपाका वरिष्ठ नेता लक्ष्मणलाल कर्णले शुक्रबार बिहान १० बजे सिंहदरबारस्थित संसदीय दलको कार्यालयमा बैठक बोलाइएको जानकारी दिए ।

बैठकका बारेमा सबैलाई जानकारी गराइएको भए पनि अध्यक्ष महन्थ ठाकुर र राजेन्द्र महतो पक्षका सांसद मात्रै उपस्थित हुने सम्भावना रहेको पनि उनले बताएका छन् । 'पछिल्लो राजनीतिक अवस्थाबारे छलफल गर्न संसदीय दलको बैठक आह्वान गरिएको छ,' कर्णले भने, 'जानकारी त सबैलाई गरिएको छ तर हुन्छौं होला १८-१९ जना ।'

पछिल्लो समय ठाकुर-महतो समूहमा बहुमत सांसद रहेको दाबी गरिएको छ । जसपामा अहिले ३२ जना सांसद रहेका छन् ।

प्रधानमन्त्री केपी शर्मा ओलीले बिहीबार ‘मौजुदा सरकारलाई विश्वासको मत प्राप्त हुने दह्रो राजनीतिक आधार नदेखिएको’ जनाउँदै सरकार निर्माणका लागि राष्ट्रपतिलाई धारा ७६ (५) अन्तर्गतको प्रक्रिया अघि बढाउन अनुरोध गरेका छन् । त्यसै अनुरोधबमोजिम राष्ट्रपति विद्यादेवी भण्डारीले दलहरुलाई सरकार गठनका लागि आह्वान पनि गरेकी छिन् । प्रधानमन्त्री ओलीलाई जसपाको ठाकुर-महतो समूह सघाउने पक्षमा रहेको छ ।

तर प्रधानमन्त्री र राष्ट्रपतिको कदम असंवैधानिक भएको भन्दै प्रमुख प्रतिपक्षी दल कांग्रेस, नेकपा माओवादी केन्द्र र जसपाको बाबुराम भट्टराई-उपेन्द्र यादव समूहले भने विरोध गरेको छ ।

जनता समाजवादी पार्टीका अध्यक्ष उपेन्द्र यादवले रातारात प्रतिनिधिसभा समाप्त पार्न राष्ट्रपति र प्रधानमन्त्री मिलेर असंवैधानिक कदम उठाएको बताएका छन् । जसपा अध्यक्ष महन्थ ठाकुर अडिग रहे उनी प्रधानमन्त्री बन्ने सम्भावना जीवित रहेको यादवको भनाइ छ । ‘ठाकुरजी आफैं अरू कसैको पछि नलागी अडिन सक्नुपर्‍यो । सम्भावना छ,’ उनले भने, ‘त्यसका लागि शुक्रबार हामी छलफल गर्छौं ।’

प्रकाशित : जेष्ठ ७, २०७८ ०९:३३
पूरा पढ्नुहोस्
प्रतिक्रिया
पठाउनुहोस्
×