एमाले नेता यादवको कोरोनाले निधन

५४ वर्षीय यादव पूर्वी धनुषाको सबैला गाउँका बासिन्दा थिए । विद्यार्थीकालदेखि नै कम्युनिस्ट राजनीतिमा लागेका यादव २०५६ सालको आमनिर्वाचनमा नेपाली कांग्रेसकी लीला कोइरालालाई पराजित गरी पहिलोपटक सांसद निर्वाचित भएका थिए ।

पारिवारिक स्रोतका अनुसार यादव डाइबिटिजका दीर्घरोगी थिए भन्ने एक वर्षदेखि मृगौला रोगबाट समेत ग्रस्त थिए । उनको नियमित डायलसिस हुँदै आएको थियो । दुई महिनाअघि उनको मुटुको बाइपास सर्जरी गरिएको थियो ।

मृगौला प्रत्यारोपणको अन्तिम तयारीमा रहेका बेला उनलाई कोरोना संक्रमण भएको थियो । उपचारार्थ मेडिसिटीमा भर्ना गरिएका यादवलाई विगत चार दिनदेखि भेन्टिलेटरमा राखिएको तथा पछिल्लो पटक स्वास्थ्यमा सुधार हुन थालेकोमा बिहीबार अचानक निधन भएको अस्पताललाई उद्धृत गर्दै एमाले जिल्ला इन्चार्ज मण्डलले जानकारी दिए ।

यादवका सहयोगी तथा साबिक सबैला गाविसका उपाध्यक्ष राजु गुप्ताले यादवको निधनबाट नेकपा एमालेले होनहार नेता गुमाएको प्रतिक्रिया दिएका छन् । यादवका दुई श्रीमती तथा तीन छोरा छन् ।