ठाकुर र यादवबीच समझदारी- राष्ट्रिय सरकार वा आफ्नै नेतृत्वमा सरकार बन्ने भए जसपा अघि बढ्ने- समाचार - कान्तिपुर समाचार

ठाकुर र यादवबीच समझदारी- राष्ट्रिय सरकार वा आफ्नै नेतृत्वमा सरकार बन्ने भए जसपा अघि बढ्ने

कान्तिपुर संवाददाता

काठमाडौँ — जनता समाजवादी पार्टीका अध्यक्षद्वय महन्थ ठाकुर र उपेन्द्र यादवबीच आफ्नै पार्टीको सरकार गठन गर्ने अवसर आए वा राष्ट्रिय सहमतिको सरकार गठन हुने भए अघि बढ्ने नभए प्रतिपक्षमा नै रहने सहमति भएको छ । 

फाइल तस्बिर

अध्यक्षद्वय ठाकुर र यादवबीच मंगलबार भएको ८ बुँदे समझदारी पत्रमा यसअघि सरकारमा नजाने निर्णय यथावत रहेको र आगामी दिनमा आफ्नै नेतृत्वमा सरकार बन्ने अवस्था आए वा राष्ट्रिय सरकार बन्ने अवस्था सिर्जना भए मात्रै अघि बढ्ने समझदारी भएको हो ।

‘तत्काल हाम्रो पार्टी सरकारमा सहभागी हुने छैन, जनता समाजवादी पार्टी नेपाल सरकारमा सहभागी नभई प्रतिपक्षमा नै रही आफ्नो भूमिका निर्वाह गर्ने पार्टीको नीति र निर्णय यथावत कायम रहनेछ तर राष्ट्रिय सहमति वा आफ्नै पार्टीको नेतृत्वमा सरकार बन्ने अवसर प्राप्त हुन सक्ने अवस्था भएमा सरकार गठन गर्न अगाडि बढ्न सकिनेछ,’ ठाकुर र यादवले हस्ताक्षर गरेको विज्ञप्तिमा लेखिएको छ ।

त्यस्तै, पार्टीभित्र देखिएका समस्याको विधानअनुसार नै छलफल गरेर समाधान गर्ने समझदारी पनि दुवैबीच भएको छ ।

तत्कालीन राजपा र समाजवादी पार्टीबीच भएको एकताले तल्लो तहमा पूर्णता नपाइसकेको अवस्थामा आगामी दिनमा ती काम सम्पन्न गर्ने पनि उनीहरूबीच समझदारी भएको छ । 'समायोजन हुन नसकेका विभिन्न स्तरका पार्टी संगठन/ भ्रातृ संगठनलगायत संगठनहरूबीच पार्टी समायोजन सम्बन्धी कार्यलाई पार्टी विधान, समायोजन सम्बन्धी निर्देशिका र पार्टीले गरेको निर्णयहरूको आधारमा यथाशीघ्र सम्पन्न गर्दै एकताबद्ध, अनुशासित एवम् सुदृढ पार्टी संगठन निर्माण गर्नु पर्दछ,' दुवैको हस्ताक्षर रहेको विज्ञप्तिमा उल्लेख छ ।

वैशाख २७ गते प्रधानमन्त्री केपी शर्मा ओलीको विश्वासको प्रस्तावको विरुद्धमा मतदान दिएका र तटस्थ बसेका जसपाका दुई पक्षबीच पछिल्लो समय सार्वजनिक रूपमा नै विवाद देखिएको थियो । उक्त कुरा पार्टी निर्णयअनुसार नै भए पनि केही नेताहरूले त्यसलाई दुरुपयोग गरेको भन्दै ठाकुर र यादवले आगामी दिनमा मिलेर अघि बढ्ने समझदारी गरेका छन् ।

'पार्टीभित्र कसैले व्यक्तिगत स्वार्थ सिद्धगर्नका लागि गुटबन्दी गर्ने, गुट उपगुट खडा गर्ने, पार्टी नेताहरूका विरुद्ध अनेकौं भ्रम फैलाउने, विखण्डन र विभाजनकारी भूमिका खेल्न खोज्ने कियाकलाप, विचार प्रकृतिहरूलाई अन्त्य गरी पार्टीलाई एकताबद्ध राख्नु पर्दछ,' दुवैले जारी गरेको विज्ञप्तिमा भनिएको छ ।

प्रकाशित : जेष्ठ ४, २०७८ १४:०६
प्रतिक्रिया
पठाउनुहोस्

सल्यानमा थप दुई कोरोना संक्रमितको मृत्यु

विप्लव महर्जन

सल्यान — कोरोना संक्रमणबाट सल्यानमा सोमबार बेलुकी र मंगलबार बिहान गरी दुई जना महिलाको मृत्युु भएको छ । दुवैको उपचारका क्रममा जिल्ला अस्पताल सल्यानमा मृत्यु भएको हो ।

मृत्यु हुनेमा शारदा नगरपालिका–२ भीमसेनस्थानकी ८२ वर्षीया त्रिवेणी गाउँपालिका–३ की ६५ वर्षीया महिला रहेका जिल्ला अस्पताल सल्यानका क्लिनिकल इन्चार्ज भीमकान्त जैसीले बताए । उनका अनुसार रुघाखोकी र ज्वरोबाट ग्रसित रहेका दुवै जनाको जिल्ला अस्पतालमा वैशाख अन्तिममा कोरोना परीक्षण गर्दा पोजेटिभ आएको थियो । कोरोना पोजेटिभ आएपछि होम आइसोलेसनमा बस्दा समस्या देखिएपछि केही दिनअघि दुवैले जिल्ला अस्पताल सल्यानमा उपचार गराइरहेका थिए ।

सोमबार बेलुकी र मंगलबार बिहान दुई महिलाको मृत्यु भएपछि जिल्लामा कोरोनाबाट मृत्यु हुनेको संख्या ३१ पुगेको स्वास्थ्य कार्यालय सल्यानका सूचना अधिकारी थलराज डिसीले बताए । जिल्लाभित्र २७ र बाहिर चार जनाको मृत्यु भएको उनले जानकारी गराए । जिल्लामा कोरोना संक्रमितको मृत्युको दर बढ्दै गएको उनको भनाइ छ ।

उनका अनुसार जिल्लामा अहिलेसम्म कोरोना संक्रमितको संख्या ९ सय ६५ पुगेको छ । जसमध्ये सक्रिय संक्रमित ५ सय ७१ र ५ सय ३४ होम आइसोलेसनमा छन् । वैशाखयता एक महिनाको अवधिमा भेटिएका संक्रमितमध्ये ३ सय ५७ निको भएर घर फर्किसकेका उनको भनाइ छ ।

प्रकाशित : जेष्ठ ४, २०७८ १३:४२
पूरा पढ्नुहोस्
प्रतिक्रिया
पठाउनुहोस्
×