नेपाललाई सहायता पठाउने अन्तिम गृहकार्यमा बेलायत र स्विस सरकार - समाचार - कान्तिपुर समाचार

नेपाललाई सहायता पठाउने अन्तिम गृहकार्यमा बेलायत र स्विस सरकार 

नवीन पोखरेल

लन्डन — नेपालमा कोरोना भाइरसको दोश्रो लहरले विकराल रुप लिइरहँदा बेलायत र स्विस सरकार नेपाललाई सहायता पठाउन अन्तिम गृहकार्य गरिरहेको सम्बन्धित देशका राजदूतले जानकारी दिएका छन् ।

बेलायतका लागि नेपाली राजदूत लोकदर्शन रेग्मीले नेपाल सरकारको निर्देशनअनुसार खोपसहितका अन्य अत्यावश्यक सहयोगका लागि बेलायत सरकारसँग सहयोग माग गरिएको जानकारी दिए ।

‘नेपाल र ब्रिटेनको ऐतिहासिक सम्बन्ध, गोर्खाहरुको योगदान जस्ता विशिष्ट योगदानहरुको आधारमा बेलायतसमक्ष विशेष सहयोग माग गरिएको छ’ उनले भने, ‘हाम्रो आग्रहमा बेलायतको उच्च सरकारी तहबाट सकारात्मक ‘रेस्पोन्स’ प्राप्त भएको छ, हामी छिट्टै सहायता जानेमा विश्वस्त छौं ।’ दूतावासले अक्सिजन कन्सन्ट्रेटर मेसिनलगायत स्वास्थ्य सामग्रीमा सहयोग गरिदिन अनुरोध गरेको छ ।

स्विस सहयोग एक साताभित्र

स्विजरल्याण्डका लागि नेपाली राजदूत मणि भट्टराईले स्विस सरकारले एक साताभित्र स्वास्थ्य सामग्री पठाउने तयारी गरेको जनाए । मंगलबार विदेश मामिलासम्बन्धी संघीय विभाग (एफडीएफए स्विजरल्याण्ड) को एसिया प्यासिफिक डिभिजनका प्रमुखसँगको भेटमा सो प्रतिबद्धता आएको उनले जानकारी दिए ।

राजदूत भट्टराईले काठमाडौंस्थित स्वीस दूतावासले स्विस मेडिकल सामग्री पारवहनका लागि नेपालको परराष्ट्र मन्त्रालयका युरोप अमेरिका डिभिजनसँग समन्वय गरिरहेको पनि बताएका छन् । उनले विश्व स्वास्थ्य संगठन र जेनेभास्थित अन्तर्राष्ट्रिय रेडक्रस महासंघसँग पनि अत्यावश्यक मेडिकल सामग्री आपूर्तिका लागि पहल भइरहेको बताए ।

संघसंस्थाको पहल जारी

लन्डन बरो अफ बार्नेटका उपमेयर काउन्सिलर लक्ष्य गुरुङले आफ्नो क्षेत्रका सांसद डा. म्याथ्यू अफोर्डलाई एक पत्र लेख्दै ब्रिटिस सरकारसँग सहयोगका लागि पहल गरिदिन आग्रह गरेपछि सोको गृहकार्य भइरहेको जवाफ पाएको बताए ।

एनआरएनए यूकेले बुधबार साँझ लन्डनस्थित नेपाली दूतावास, एनआरएनए यूकेको संरक्षक परिषद् र बेलायतका विभिन्न स्थानीय तहमा निर्वाचित नेपाली मूलका मेयर, उपमेयर, काउन्सिलरसहितका प्रतिनिधिहरुबीच छलफल गरि सहायता पठाउन पहल सुरु गरेको छ ।

यसअघि कोभिड–१९ विरुद्ध नेपालको लडाइँमा युरोपेली संघ (ईयू) ले २० लाख युरो बराबरको मानवीय सहायता दिने प्रतिबद्धता व्यक्त गरिसकेको छ ।

प्रकाशित : वैशाख ३१, २०७८ १४:०९
प्रतिक्रिया
पठाउनुहोस्

बेलायतमा प्लाटुन कमान्डर्स ब्याटल कोर्समा नेपाली सैनिक उत्कृष्ट

नवीन पोखरेल

लन्डन — प्रशिक्षणका लागि बेलायतमा रहेका नेपाली सेनाका एक अधिकृतले अर्को सफलता प्राप्त गरेका छन् ।नेपाली सेनाका २१ वर्षीय सेकेन्ड लेफ्टिनेन्ट पिटर थापा वेल्सको ब्रेकनस्थित इन्फेन्ट्री ब्याटल स्कुलमा भएको प्लाटुन कमान्डर्स ब्याटल कोर्स (पीसीबीसी) २००३ मा टप इन्टरनेसल स्टुडेन्ट घोषित भएका हुन् । 

गत १८ जनवरी २०२१ देखि ३० अप्रिल २०२१ सम्म भएको तीन महिने उक्त कोर्समा आयरल्यान्ड, कोसोभो, हंगेरी, स्कटल्याण्ड र नेपालबाट सैनिक अधिकृतहरु सहभागी थिए ।

प्लाटुन कमान्डिङ जस्तो चुनौतिपूर्ण कोर्समा आफ्नो इन्फेन्ट्री स्किल देखाउन नेपाली सैनिक अधिकृतहरु विगतमा देखि नै सफल भएकाले यसले नेपालको छवि विश्वमा उचो बनेको थापाले बताए ।

आउँदो जुलाई अन्त्यतिर नेपाल फर्कनुअघि थापाले अब कमान्डो कोर्स गर्ने छन् । बेलायतको रोयल मरिनले सञ्चालन गर्ने अल आर्मी कमान्डोले उक्त कोर्स गराउने थापाले बताए ।

यसअघि बेलायतको स्यान्डहर्स्टस्थित रोयल मिलिट्री एकेडेमीमा तालिमका क्रममा थापाले उत्कृष्ट क्षमता प्रदर्शन गरेर ‘इन्टरनेसनल सोर्ड अफ अनर’ अवार्ड पाएका थिए । २० वर्षयता नेपाली क्याडेटले उक्त अवार्ड पाएको यो पहिलो हो । ४४ साताको उक्त प्रशिक्षणमा विश्वका विभिन्न मुलुकका ३३ क्याडेट सामेल थिए ।

यसबाहेक थापाले प्लाटुन कमान्डर पाससमेत पाएका थिए । ब्रिटिस अफिसर क्याडेटलाई तालिम दिन योग्य उक्त ‘इन्स्ट्रक्टर पास’ नेपाललाई पहिलोपटक दिइएको हो । थापा कुनै पनि बेला रोयल मिलिट्री एकेडेमी स्यान्डहस्र्ट आएर ब्रिटिस क्याडेटलाई २ वर्षसम्म प्रशिक्षण दिन सक्नेछन् ।

थापा बेलायती सेनाको एउटा मात्र कोटामा छानिएर तालिममा आएका हुन् ।

दुई वर्षअघि मात्र नेपाली सेनामा भर्ती भएका धादिङ त्रिपुरासुन्दरी नगरपालिका निवासी थापाले बेलायतमा लिएको विभिन्न कोर्सले आफ्नो क्षमता अभिवृद्धि हुनुका साथै बेलायती सेनाको कार्यशैली र रणनीति बुझ्ने अवसर पाएको बताए । ‘विभिन्न देशका उच्च दर्जाका सैनिकहरुसँगको अन्तरक्रियाले अन्तर्राष्ट्रिय सम्बन्धबारे धेरै ज्ञान हासिल गर्न समेत पाएँ,’ उनी भन्छन् ।

प्रकाशित : वैशाख १८, २०७८ १३:३९
पूरा पढ्नुहोस्
प्रतिक्रिया
पठाउनुहोस्
×