२३.१२°C काठमाडौं
काठमाडौंमा वायुको गुणस्तर: १२२

ओलीलाई ठाकुर र महतोले दिए बधाई, एमालेले बहुमतको सरकारमा दाबी नगर्ने

काठमाडौँ — प्रधानमन्त्री केपी शर्मा ओलीलाई जनता समाजवादी पार्टीका अध्यक्ष महन्थ ठाकुर र वरिष्ठ नेता राजेन्द्र महतोले बधाई दिएका छन् । प्रधानमन्त्रीमा फेरि निर्वाचित हुन लागेकोमा ठाकुर र महतोले प्रधानमन्त्री निवास बालुवाटर पुगेर बधाई दिएका हुन् । 

ओलीलाई ठाकुर र महतोले दिए बधाई, एमालेले बहुमतको सरकारमा दाबी नगर्ने

प्रधानमन्त्री निवास बालुवाटारमा ओलीलाई बिहीबार साँझ भेट्न पुगेका ठाकुर र महतोले आफ्ना मागबारे छलफल गरेको एमाले संसदीय दलका उपनेता सुवास नेम्वाङले बताए । 'उहाँहरू आउनुभएको थियो । उहाँहरूका जुन मागहरू छन् त्यसै सन्दर्भमा कुराकानी भयो । उहाँहरूले प्रधानमन्त्रीलाई बधाई दिनभुयो, प्रधानमन्त्रीले धन्यवाद दिनुभयो,' नेम्वाङले भने, 'मागहरूबारेमा थप छलफल गर्दै अगाडि बढ्ने कुरा भयो ।'

ठाकुर र महतोले अन्य दलहरूसँग पनि आफ्ना मागबारे नै छलफल गरेको र एमालेसँग पनि सोही विषयमा छलफल गर्न आएको नेम्वाङको भनाइ थियो । 'उहाँहरू मागकै बारेमा अडानमा हुनुहुन्छ । त्यसैबारेमा कांग्रेस, माओवादीसँग पनि कुरा गरेका थियौं भन्नुभयो । सोही मागमा रहेर अडिग रह्यौं भन्ने उहाँहरूको भनाइ थियो,' भेटमा सहभागी नेम्वाङले भने ।

प्रधानमन्त्रीले बहुमतको सरकारको दाबी नगर्ने पनि नेम्वाङको भनाइ छ । राष्ट्रपति विद्यादेवी भण्डारीले नयाँ सरकार गठनका लागि दिएको तीन दिनको समय गुज्रिँदै गर्दा ओलीले संविधानको धारा ७६ उपधारा ३ अनुसार प्रतिनिधिसभाको ठूलो दलको हैसियतमा प्रधानमन्त्री बन्न चाहेका छन् ।

'प्रधानमन्त्रीले जारी प्रक्रियालाई पर्खिइराख्नुभएको छ । अब ९ बजेपछि अर्को प्रक्रिया सुरु हुन्छ,' नेम्वाङले भने, 'संविधानको धारा ७६ उपधारा २ तिर जाइँदैन । ९ बजेपछि सायद ९:५, ९:७ तिर अहिलेको अर्को प्रक्रिया घोषणा हुन्छ होला ।'

नेम्वाङले संविधानको धारा ७६ को उपधारा २ अनुसार दुई वा दुईभन्दा बढी दलको बहुमतको सरकार गठनका लागि प्रधानमन्त्री ओलीले जसपा नेताहरूसँग आग्रह नगरेको बताए । 'सत्ता समीकरणबारे जसपाका नेताहरूसँग कुरा भएको छैन,' उनले भने ।

राष्ट्रपतिले दिएको तीन दिनको समय सकिनै लाग्दा पनि प्रतिपक्षमा रहेका दलहरूले बहुमत जुटाउन नसकेपछि प्रधानमन्त्रीमा ओली दोहोरिने भएका हुन् ।

प्रकाशित : वैशाख ३०, २०७८ २०:०३
प्रतिक्रिया
पठाउनुहोस्
जनताको राय

केन्द्रमा सत्ता गठबन्धन फेरबदल हुँदा प्रदेश सरकारमा समेत त्यसको असर पर्नुको सन्देश के हो ?