पुटिनलाई एर्दोआनको फोन : अन्तर्राष्ट्रिय समुदायले इजरायललाई कडा पाठ सिकाउन आवश्यक- समाचार - कान्तिपुर समाचार

पुटिनलाई एर्दोआनको फोन : अन्तर्राष्ट्रिय समुदायले इजरायललाई कडा पाठ सिकाउन आवश्यक

सोमबार रातिदेखि सुरु भएको द्वन्द्वमा हमासका एक कमान्डरसहित ६५ प्यालेस्टिनी नागरिक र ७ इजरायलीको मृत्यु 
कान्तिपुर संवाददाता

काठमाडौँ — इजरायल र प्यालेस्टाइनबीच तनाव चर्किइरहेका बेला टर्कीका राष्ट्रपति रेचेप तैय्यप एर्दोआनले विश्वका विभिन्न मुलुकका राष्ट्राध्यक्षहरुसँग कुराकानी गरिरहेका छन् ।

टर्कीका राष्ट्रपति रेचेप तैय्यप एर्दोआन र रूसी समकक्षी भ्लादिमिर पुटिन फाइल तस्बिर : रोयटर्स

बुधबार उनले रुसी राष्ट्रपति भ्लादिमिर पुटिनसँग कुराकानी गरेका छन् । पुटिनसँग भएको टेलिफोन कुराकानीमा इजरायललाई कडा पाठ सिकाउन आवश्यक रहेको एर्दोआनले बताएका छन् । एर्दोआनले प्यालेस्टिनी नागरिकको रक्षाका लागि अन्तर्राष्ट्रिय सुरक्षा बल पठाउन आवश्यक रहेको पनि बताएका छन् । इजरायल–प्यालेस्टाइन विवाद अन्त्य नभएसम्म समाधानका लागि आफूले पहल जारी राख्ने पनि उनको भनाइ छ ।

इजरायल–प्यालेस्टाइन मामिलामा संयुक्त राष्ट्र संघमा रुस र टर्की मिलेर अघि बढ्नुपर्नेमा पनि एर्दोआनले जोड दिएका छन् । परिस्थिति नियन्त्रणबाहिर जानुभन्दा पहिले नै संयुक्त राष्ट्र संघको सुरक्षा परिषद्ले हस्तक्षेप गर्नुपर्ने पनि उनको भनाइ छ । राष्ट्रपति कार्यालयबाट जारी वक्तव्यका अनुसार एर्दोआनले अन्तर्राष्ट्रिय समुदायले इजरायललाई कडा पाठ सिकाएर द्वन्द्व समाधान गर्नुपर्ने बताएका छन् ।

त्यस्तै एर्दोआनले मध्यपूर्वमा देखिएको पछिल्लो अवस्थाका बारेमा पाकिस्तानी प्रधानमन्त्री इमरान खानसँग पनि कुरा गरेका छन् । कुराकानीमा दुवै रमजानको पवित्र महिनामा अल अक्सा मस्जिदमा नमाज पढिरहेका व्यक्तिमाथि आक्रमण गर्नु जघन्य अपराध र अन्तर्राष्ट्रिय कानुनको उल्लंघन भएको बताएका छन् ।

टर्कीको राष्ट्रपति कार्यालयबाट जारी वक्तव्यमा अनुसार प्यालेस्टिनी नागरिकको समस्या सम्बोधनका लागि पाकिस्तान र टर्की एकजुट भएर लाग्ने बताइएको छ । यस विषयलाई अन्तर्राष्ट्रिय समथर्न जुटाउनका लागि दुवै देशका विदेशमन्त्री एकसाथ अघि बढ्ने पनि जनाइएको छ ।

इजरायलमा रहेका नेपालीलाई दूतावासको आग्रह : साइरन बज्नासाथ सुरक्षित स्थानमा जानुहोस्

राष्ट्रपति एर्दोआनले यसअघि कतारका शेख तमिम बिन हमाद अल थानी, मलेसियाका राजा सुल्तान अब्दुल्लाह सुल्तान अहमद शाहसँग पनि छुट्टाछुट्टै कुराकानी गरेका थिए ।

इजरायल र प्यालेस्टाइनको सीमामा सोमबार रातिदेखि चर्किएको द्वन्द्व झन् बढ्दै गइरहेको छ । हमासले जेरुसेलम र तेल अभिभमा इजरायली सेनालाई लक्षित गर्दै हजारभन्दा रकेट प्रहार गरेको जनाइएको छ । इजरायली सेनाले ८ सय ५० वटा रकेट आफ्नो भूमिमा खसेको र प्रतिरक्षा प्रणालीले करिब २ सय रकेट गाजामै खसालिदिएको पनि बताएको छ । हमासले जेरुसेलममा रहेको अक्सा मस्जिदमा इजरायलका तर्फबाट आफूहरुलाई उक्साउने काम भएको र त्यो अहिले गाजासम्म आइपुगेको बताएको छ ।इजरायली सेनाको हवाई आक्रमणपछि गाजा क्षेत्रमा देखिएको धूवाँको मुस्लो तस्बिर : रोयटर्स

बीबीसीका अनुसार बुधबार इजरायली सेनाको कारबाहीमा हमासका एक जना वरिष्ठ कमान्डर मारिएका छन् । कमान्डर मारिएपछि हमासले इजरायलतर्फ आक्रमण तीव्र बनाएको छ । अहिलेसम्म प्यालेस्टाइनतर्फ १४ बालबालिकासहित ६५ जना र इजरायलतर्फ ७ जनाको मृत्यु भएको छ ।

इजरायलका प्रधानमन्त्री बेन्यामिन नेतान्याहुले यसअघि मंगलबार हमासले ‘रेड लाइन’ नाघेर आक्रमण गरेको बताएका थिए । । सन् २०१४ को युद्धपछि पहिलो पटक हमासद्वारा रेड लाइन नाघिएको पनि उनले दाबी गरेका छन् ।

पछिल्ला केही दिनदेखि जेरुसेलममा हिंसा भड्किइरहेको छ । जेरुसेलमस्थित अल अक्सा मस्जिदमा जान प्रतिबन्ध लगाइएपछि प्यालेस्टाइनका नागरिक क्रुद्ध भएका छन् । यो मस्जिदलाई इस्लाममा तेस्रो पवित्र स्थान मानिन्छ । यो यहुदीहरुको पनि पवित्र धार्मिक स्थलमा रुपमा रहेको छ ।

प्यालेस्टाइन रेड क्रेसेन्ट सोसाइटीका अनुसार इजरायली प्रहरीसँगको झडपमा ३ सयभन्दा बढी घाइते भएका छन् । सोमबार ‘जेरुसेलम दिवस’ मनाइरहँदा हिंसा भड्किएको हो । सन् १९६७ को अरब–इजरायल युद्धपछि पूर्वी जेरुसेलममाथि कब्जा गरिएको सम्झनामा सोमबार जेरुसेलम दिवस मनाइएको थियो ।

हमासले अल अक्सा र शेख जराह मस्जिदबाट प्रहरी हटाउन पहिलेदेखि नै इजरायलसँग आग्रह गर्दै आएको थियो । उसले दिएको समयसीमा सकिएपछि रकेट प्रहार गरेको बताएको छ ।

सन् १९६७ को मध्यपूर्वको युद्धपछि इजरायलले पूर्वी जेरुसेलममाथि कब्जा गरेको थियो । त्यसपछि उसले पूरा जेरुसेलमलाई आफ्नो राजधानी दाबी गर्दै आएको छ । तर अन्तर्राष्ट्रिय समुदायले यसलाई मान्दैन । प्यालेस्टाइनले भने पूर्वी जेरुसेलमलाई भविष्यको एक सार्वभौम र स्वतन्त्र मुलुकको राजधानीका रुपमा लिँदै आएको छ ।

यही विषयमा प्यालेस्टाइन र इजरायलबीच विवाद रहँदै आएको छ भने पटक–पटक यसले युद्धको रुप लिएको छ । सन् २०१४ को जुलाईदेखि अगस्टको बीचमा भएको द्वन्द्वमा २२५१ प्यालेस्टाइनी मारिएका थिए । तीमध्ये १४६२ त सर्वसाधारण नै थिए । त्यस्तै इजरायलका ६ सर्वसाधारणसहित ६७ जना सैनिक मारिएका थिए ।

सम्बन्धित समाचार

इजरायल-प्यालेस्टाइन द्वन्द्व झन् चर्कियो

इजरायली सेना र हमासबीच आक्रमण जारी

इजरायल र प्यालेस्टाइनबीच फेरि द्वन्द्व चर्कियो : ९ बालबालिकासहित कम्तीमा २० जना मारिए

प्रकाशित : वैशाख ३०, २०७८ १०:११
प्रतिक्रिया
पठाउनुहोस्

सिन्धुलीमा निषेधाज्ञा १० दिन लम्बियो

राजकुमार कार्की

सिन्धुली — सिन्धुलीमा जारी निषेधाज्ञा जेठ ८ गतेसम्म लम्बिएको छ । जिल्ला कोभिड–१९ संकट व्यवस्थापन केन्द्र (डीसीसीएमसी) को बैठकले कोरोना संक्रमण बढ्दै गएको भन्दै निषेधाज्ञा थप गरेको हो ।

यसअघि जारी एक साता लामो निषेधाज्ञा बुधबार रातिबाट सकिएको थियो । कोरोना संक्रमण दर बढ्दै गएपछि डीसीसीएमसीले प्रमुख जिल्ला अधिकारीलाई निषेधाज्ञाको समय थप गर्न सिफारिस गरेको जिल्ला प्रशासन कार्यालयका अधिकृत भीम बस्नेतले जानकारी दिए ।

संक्रमण फैलन नदिन निषेधाज्ञा थप कडा बनाइने प्रजिअ न्यौपानेले बताए । ‘अबका केही दिन अझ भयावह अवस्था नआओस् भनेर थप कडाइ गर्न लागेका छौं,’ उनले भने, ‘यो जिल्ला र राष्ट्रवासीकै लागि हो भनेर नियम पालना गर्नुपर्छ ।’ बीपी राजमार्ग, मध्यपहाडी लोकमार्ग र मदन भण्डारी राजमार्गमा सवारीसाधन ‘चेकिङ’ बढाइने न्यौपानेको भनाइ छ ।

उनका अनुसार अब बिनाकाम हिँड्नेलाई सोधपुछ गर्नुका साथै मापदण्ड पालना नभएको खण्डमा कारबाही गरिनेछ । सिन्धुलीमा बिहीबार बिहानसम्म ३७१ जना सक्रिय संक्रमित छन् भने आठ जनाको मृत्यु भएको छ ।


प्रकाशित : वैशाख ३०, २०७८ १०:११
पूरा पढ्नुहोस्
प्रतिक्रिया
पठाउनुहोस्
×