इजरायलमा रहेका नेपालीलाई दूतावासको आग्रह : साइरन बज्नासाथ सुरक्षित स्थानमा जानुहोस्- समाचार - कान्तिपुर समाचार

इजरायलमा रहेका नेपालीलाई दूतावासको आग्रह : साइरन बज्नासाथ सुरक्षित स्थानमा जानुहोस्

इकान्तिपुर डेस्क

काठमाडौँ — हमास र इजरायली सेनाबीचको तनाव बढिरहेका बेला इजरायलस्थित नेपाली राजदूतवासले इजरायलमा रहेका सबै नेपालीलाई सुरक्षित स्थानमा बस्न आग्रह गरेको छ ।

इजरायली सेनाको हवाई आक्रमणपछि गाजा क्षेत्रमा देखिएको धूवाँको मुस्लो तस्बिर : रोयटर्स

इजरायलका लागि नेपाली राजदूत अन्जान शाक्यले अपिल जारी गर्दै पछिल्लो अवस्थाले सबैलाई त्रसित तुल्याएको भए पनि नआत्तिन अनुरोध गरेकी छिन् ।

उनले लेखेकी छिन्, 'विगत केही दिनयता इजरायल र प्यालेष्टाइन बीच तनाव बढ्दै गएको सम्बन्धमा सबै जानकार नै हुनुहुन्छ। केही दिनदेखि जेरुसेलम र दक्षिण ईजरायली क्षेत्रमा सयौं रकेट आक्रमण भएको छ, हिजो राति मात्रै गाजाबाट तेल अबिबलाई निशाना बनाई १८० भन्दा बढी रकेट प्रहार भएको छ। यसले हामी सबैलाई त्रसित तुल्याएको छ। तथापि, यसबाट नआत्तिन तथा सम्भव भएसम्मका सुरक्षाका उपायहरुको खोजी गर्नेतर्फ लाग्न हामी इजरायलवासी सबै नेपालीहरुमा हार्दिक अपिल गर्दछौं ।'

राजदूत शाक्यले साइरन बज्नासाथ सुरक्षति स्थानमा जान पनि सबैलाई अनुरोध गरेकी छिन् । उनले अगाडि लेखेकी छिन्, 'खासगरी साइरन बज्नासाथ घर भित्र हुनुहुन्छ भने बङ्कर, भर्याङ्ग वा त्यस्तै सुरक्षित क्षेत्रमा जान, झ्याल नजिक नजान, यदि घरबाहिर (बजार, सडक, फार्म वा अन्यत्र कतै) हुनुहुन्छ भने पनि नजिकैको बङ्करमा पुगिहाल्नुहुन र त्यो उपलब्ध नभएमा जहाँ हुनुहुन्छ त्यहाँ सुरक्षित हुने उपाय अपनाउन, कुनै समस्या परेमा दूतावास वा आफ्नो साथीभाइ वा इजरायलमा क्रियाशील नेपाली संघसंस्थाका प्रतिनिधिहरुलाई सम्पर्क गर्न समेत अपिल गर्दछौं।'

इजरायल र प्यालेस्टाइनको सीमामा सोमबार रातिदेखि चर्किएको द्वन्द्व झन् बढ्दै गइरहेको छ । इजरायली सेनालाई उद्धृत गर्दै समाचार संस्था एएफपीले प्यालेस्टिनी विद्रोही समूह हमासले अहिलेसम्म १ हजारभन्दा बढी रकेट प्रहार गरेको जनाएको छ ।

हमासले जेरुसेलम र तेल अभिभमा इजरायली सेनालाई लक्षित गर्दै हजारभन्दा रकेट प्रहार गरेको जनाइएको छ । इजरायली सेनाले ८ सय ५० वटा रकेट आफ्नो भूमिमा खसेको र प्रतिरक्षा प्रणालीले करिब २ सय रकेट गाजामै खसालिदिएको पनि बताएको छ । हमासले जेरुसेलममा रहेको अक्सा मस्जिदमा इजरायलका तर्फबाट आफूहरुलाई उक्साउने काम भएको र त्यो अहिले गाजासम्म आइपुगेको बताएको छ ।

बीबीसीका अनुसार ३८ घण्टाभन्दा लामो द्वन्द्वमा अहिलेसम्म ५३ जना प्यालेस्टिनी नागरिक र ६ जना इजरायली मारिएका छन् । त्यसमध्ये १४ जना प्यालेस्टिनी बालबालिका रहेको जनाइएको छ । इजरायली सेनाको आक्रमणमा परी हमासका एक जना कमान्डर पनि मारिएको समाचार संस्था रोयटर्सले जनाएको छ ।

सम्बन्धित समाचार

इजरायल-प्यालेस्टाइन द्वन्द्व झन् चर्कियो

इजरायली सेना र हमासबीच आक्रमण जारी

इजरायल र प्यालेस्टाइनबीच फेरि द्वन्द्व चर्कियो : ९ बालबालिकासहित कम्तीमा २० जना मारिए

प्रकाशित : वैशाख २९, २०७८ २०:४७
प्रतिक्रिया
पठाउनुहोस्

ईयूद्वारा २० लाख यूरोको मानवीय सहयोग

कान्तिपुर संवाददाता

काठमाडौँ — यूरोपियन यूनियन (ईयू) ले नेपाललाई कोरोना भाइरस रोकथाम र नियन्त्रणको लागि २० लाख यूरोको मावनीय सहयोग प्रदान गर्ने वाचा गरेको छ ।

ईयूको आधिकारिक वेवसाइटमा बुधबार जारी भएको सहयोगको सूचना अनुसार नेपाललाई घरमै आइसोलेसनमा बस्दा समेत अनुगमन गर्न सक्ने टेली–हेल्थ, टेली–औषधि सेवा र अस्पतालको लागि छिटो रिभर गर्ने प्रविधिको सहयोग गर्न लागेको हो ।

यस्तै, राष्ट्रिय आपतकालीन मेडिकल टिमहरु प्रयोग र अन्तर्राष्ट्रिय आपतकालीन मेडिकल टिमहरुको परिचालन सुविधा तथा नेपालमा कोरोना भाइरस रोकथाम र नियन्त्रणका लागि आवश्यक उपकरणहरुको खरिद र आपूर्तिको गर्ने पनि ईयूले जनाएको छ ।

मुख्य उपकरणहरुमा अक्सिजन उपकरण हुनेछन् । जसमा अक्सिजन ग्यास सिलिन्डरहरु, अक्सिजन कन्सन्ट्रेटर, होम केयर किटहरु, एन्टिजेन टेष्ट किटहरुसहित डायग्नोस्टिक्स र व्यक्तिगत सुरक्षा उपकरण रहेका छन् । नेपालले ईयू नागरिक संरक्षण संयन्त्र पनि सक्रिय गरेको छ । जसको फिनल्यान्ड पहिलो सदस्य भनेको छ । उसले २० लाखभन्दा बढी सर्जिकल फेस मास्क, २ लाख ५० हजार एफएफपीटु मास्क, ५२ हजार ५ सय विनाइल जोडी ग्लोब्स र ३० हजार आइसोलेसन गाउन सहयोग गरेको छ ।

ईयूका क्राइसिस म्यानेजमेन्ट कमिसनर जानेज लेनेरिजले नेपालमा कोरोना भाइरसको संक्रमणले हरेक मिनेट देशभर वृद्धि भइरहेको उल्लेख गर्दै ईयूले महामारीविरुद्धको लडाइँमा नेपालसँग पूरा साथ दिने बताएका छन् । उनले ईयूले थप सहयोग गर्ने प्रतिबद्धता पनि व्यक्त गरे ।

ईयूका लागि नेपालका राजदूत गहेन्द्र राजभण्डारीले कोरोना भाइरसविरुद्ध आवश्यक सहयोगका लागि परराष्ट्र मन्त्रालयको समन्वयमा ईयूलाई आग्रह गरेको जानकारी दिए । ‘नेपालको बारेमा हामीले हिजो गएर त्यहाँको अध्यक्षलाई जानकारी गराएका थियौं । उहाँले सहयोग गर्छु भन्ने भएको थियो । छिटै सहयोगको प्रतिबद्धता आयो,’ उनले भने, ‘उनीहरुले थप सहयोगको लागि पनि प्रतिबद्धता गरेका छन् ।’

प्रकाशित : वैशाख २९, २०७८ २०:४६
पूरा पढ्नुहोस्
प्रतिक्रिया
पठाउनुहोस्
×