बाबुराम-उपेन्द्र समूहले विश्वासको मतको विपक्षमा मतदान गर्ने- समाचार - कान्तिपुर समाचार
कान्तिपुर वेबसाईट
AdvertisementAdvertisement

बाबुराम-उपेन्द्र समूहले विश्वासको मतको विपक्षमा मतदान गर्ने

बबिता शर्मा

काठमाडौँ — जनता समाजवादी पार्टीका संघीय परिषद् अध्यक्ष बाबुराम भट्टराई र केन्द्रीय कार्यकारिणी अध्यक्ष उपेन्द्र यादव समूहले प्रधानमन्त्री केपी शर्मा ओलीले लिने विश्वासको मतको विपक्षमा मतदान गर्ने भएका छन् ।

आइतबार संघीय परिषद् अध्यक्ष भट्टराईको निवासमा बसेको शीर्ष ६ नेताहरुको बैठकले पार्टीले ह्विप जारी नगर्ने, पक्ष वा विपक्षमा मतदानको अधिकार सांसदहरुलाई नै दिने सर्वसम्मतिले निर्णय गरेको थियो ।

त्यसलगत्तै त्यहीं बसेको भट्टराई र यादवपक्षका नेताहरुको अनौपचारिक बैठकले विपक्षमा मतदान गर्ने निर्णय गरेको नेता राजेन्द्र श्रेष्ठले बताए ।

‘तटस्थ रहन चाहनेले तटस्थ रहन पायो । विश्वास भएकाहरुले विश्वासको मत दिन पनि पायो । हामीले विश्वासको मतको विपक्षमा मतदान गर्छौं । त्यसबारे पहिला नै निर्णय गरिसकेका छौं,’ श्रेष्ठले भने, 'हामीले किन विश्वास गर्दैनौं भने प्रधानमन्त्री केपी ओली इतिहासमा नै सबैभन्दा धेरै पश्चगामी दृष्टिकोण भएको, संघीय लोकतान्त्रिक गणतन्त्र, समानुपातीक, समावेशिता, धर्मनिरपेक्षलगायतका परिवर्तनका एजेण्डाहरुको विपक्षमा उभिदैं आएको हुँदा उहाँलाई विश्वासको मत दिन सक्दैनौं ।’

आफ्नो पक्षका १८ सांसदले विपक्षमा मतदान गर्ने श्रेष्ठले बताए । उनका अनुसार बैठकमा महन्थ ठाकुर र वरिष्ठ नेता राजेन्द्र महतोले पक्ष विपक्षमा मतदान नगरेर तटस्थ बस्ने प्रस्ताव गरेका थिए । तर, भट्टराई र यादव पक्षले तटस्थ बस्न नहुने अडान लिएपछि सांसदहरुलाई स्वविवेक प्रयोग गर्ने सर्वसम्मतिले निर्णय भएको हो ।

एमालेको माधवकुमार नेपालपक्षका सांसदले राजीनामा दिएभने जसपाले पक्षमा मतदना गरे पनि ओलीले विश्वासको मत संख्या नपुग्ने निश्कर्षपछि सांसदहरुलाई विवेक प्रयोग गर्ने निर्णय भएको हो । नेता श्रेष्ठका अनुसार यो निर्णयले जसपा विभाजन हुनबाट रोकिएको छ । बैठकपछि भट्टराईले भनेका छन्, ‘जसपाको पदाधिकारी बैठकले पार्टी एकता कायम राख्दै ओली सरकारको बहिर्गमन सुनिश्चित गर्ने कार्यनीति तय गरेको छ। सबैले आआफ्नो विवेक प्रयोग गरेर प्रतिगमनको केन्द्र बनेको ओली सरकारलाई विदा गर्न, देशलाई अग्रगामी निकास दिन र जसपालाई देशको वैकल्पिक शक्तिको रूपमा विकास गर्न योगदान गरौं ।’

उता पूर्वराजपा पक्षका एक नेताले केही सांसदले विश्वासको पक्षमा मतदान गरे पनि अधिकांश सांसद तटस्थ बस्ने जानकारी दिए ।

आइतबार बिहान जसपा अध्यक्ष र वरिष्ठ नेता महतोले प्रधानमन्त्री ओली र कांग्रेस सभापति शेरबहादुर देउवालाई भेटेपछि शीर्ष नेताको बैठक बसेको थियो । प्रधानमन्त्री ओलीसँगको भेटमा आफूहरुले सरकारलाई विश्वासको मत दिए पार्टी विभाजन हुने भन्दै मत नदिने तर तटस्थ बस्ने बताएका थिए ।

देउवासँगको भेटमा पनि ठाकुर र महतोले ओलीलाई विश्वासको मत नदिने तर त्यसपछि बन्ने सरकारलाई पनि समर्थन गर्न नसकिने जवाफ दिएका थिए ।

प्रधानमन्त्री ओलीले सोमबार विश्वासको मत लिदैँछन् । संसद्‍मा एमालेका १ सय २१ सांसद छन् । विश्वासको मत पाउन १ सय ३६ मत चाहिन्छ । त्यसकारण ओलीलाई अझै १५ सांसद अपुग हुन्छन् । नेपालपक्षका सांसदहरुले सामूहिक राजीनामा दिने तयारी गरेका छन् । उनीहरुले राजीनामा दिएमा एमालेको सांसद संख्या पनि घट्ने छ ।

प्रकाशित : वैशाख २६, २०७८ १८:४०
प्रतिक्रिया
पठाउनुहोस्

प्रदेश १ का सबै अस्पतालमा कोभिड उपचारको व्यवस्था गर्न कांग्रेसको माग

कान्तिपुर संवाददाता

मोरङ — प्रदेश १ का प्रमुख प्रतिपक्षी कांग्रेसले दैनिक कोरोना संक्रमण दर बढ्दै गएकाले प्रदेशभरिका सबै अस्पताललाई कोभिड अस्पताल बनाउन प्रदेश सरकारलाई ध्यानाकर्षण गराएको छ ।

कांग्रेस संसदीय दलले आइतबार पत्रकार सम्मेलन गरी उपचार अभावमा दैनिक कोरोना संक्रमितले ज्यान गुमाइरहेकाले तत्काल प्रदेशभरिका निजी तथा सामुदायिक अस्पताल, प्राथमिक स्वास्थ्य केन्द्रहरुलाई कोभिड अस्पतालमा रुपान्तरण गरेर भरपर्दो उपचारको व्यवस्था गर्न माग गरेको हो ।

पत्रकार सम्मेलनमा कांग्रेसका प्रमुख सचेतक केदार कार्कीले प्रदेश सरकारले हालसम्म कोशी कोभिड १९ उपचार केन्द्र र मेची अस्पतालमा मात्रै कोभिड उपचारको व्यवस्था गर्नु लाजमर्दो भएको बतताए ।

प्रदेश १ स्थित बीपी कोइराला स्वास्थ्य विज्ञान प्रतिष्ठान धरान, विराट मेडिकल र नोबेल शिक्षण अस्पताल र बी एण्ड सी अस्पतालमा संघीय सरकारले कोभिड अस्पतालको व्यवस्थापन गरेको छ । यस प्रदेशमा प्रदेश २ का समेत संक्रमित उपचारका लागि आउने गरेकाले हाल सञ्चालनमा रहेका सबै कोभिड अस्पतालका शय्या भरिभराउ रहेकाले संक्रमित उपचार नपाएर ज्यान गुमाउन बाध्य रहेको कार्कीले बताए ।

प्रदेश २ सम्मको संक्रमितको उपचारका लागि सरकारले अहिलेसम्ममा प्रदेशभरि ६ वटा अस्पतालमा ७ सय २७ शय्याको मात्रै व्यवस्था गर्न सकेको छ । जसमा आईसियु १ सय ४०, एचडियू ८४, भेन्टिलेटर १०, पीआईसियू ६, एनआईसियू ३, अक्सिजनसहितको शय्या ३ सय ९७ र सामान्य शय्या ८७ वटा मात्रै रहेको छ । यीमध्ये सबै आईसियू, एचडियू, भेन्टिलेटर, पीआईसियू र अक्सिजन भएको शय्या संक्रमित बिरामीले भरिसकेको छ । सरकारले भने अनुसारको शय्या, भेन्टिलेटर र आईसियूहरु पनि सबै सञ्चालनमा नरहेको कार्कीले बताए ।

सामाजिक विकास समितिका सदस्य कार्कीले हालै कोभिड अस्पतालहरुको अनुगमनका क्रममा बीपी कोइराला स्वास्थ्य विज्ञान प्रतिष्ठानमा सरकारले भने अनुसारको १५० शय्याको व्यवस्था नभएको पाइएको बताए ।

‘सरकारले स्वास्थ्यमा समस्या आएपछि मात्रै भर्ना लिने लिएको नीतिले सर्वसाधारणको दैनिक ज्यान गइरहेको छ,’ उनले भने, ‘दोस्रो चरणको कोरोना संक्रमणले अघिल्लो भन्दा बढी संक्रमितको ज्यान लिइरहेको सरकारले देख्न सकेको छैन ।’ संक्रमितलाई स्वास्थ्यमा अचानक समस्या देखिएर तत्कालै मृत्यु भइरहेको छ । सरकारी नीतिले संक्रमितहरु अस्पतालै नपुगी ज्यान गुमाउन बाध्य रहेको उनको भनाइ थियो ।

‘सरकारसँग अस्पतालमा भएका शय्याहरुको बारेमा पनि सही तथ्यांक नभएको अवस्थामा सर्वसाधारण जनता उपचारै नपाई ज्यान गुमाउन बाध्य छन् । तर सरकार मूकदर्शक बनेर बसेको छ', कार्कीले भने, ‘सरकारलाई तत्काल सम्पूर्ण कोरोना संक्रमित बिरामीको उपचारको भरपर्दो व्यवस्था गर्न ध्यानाकर्षण गराउँदछौं । स्वास्थ्य उपचार पाउने मौलिक हक सरकारले कुण्ठित गर्न पाउँदैन ।’

जिल्ला अस्पताल संखुवासभा लगायतका जिल्ला अस्पतालहरु, स्थानीय तहमा रहेका सबै प्राथमिक स्वास्थ्य केन्द्रहरुमा कोरोना संक्रमितको उपचारको व्यवस्था गर्न सकिए धेरै संक्रमितको ज्यान बचाउन सकिने उनको भनाइ छ ।

यसअघि विराटनगरकै न्यूरो अस्पतालमा सञ्चालित कोभिड अस्पतताल प्रदेश सरकारको बेवास्ताले सञचालन हुन सकेको छैन । यी यस्ता धेरै अस्पतालमा कोभिड अस्पताल सन्चालनको तयारी भए पनि सरकारको अदृष्य स्वार्थले सन्चालन हुन नसकेको उनको आरोप छ । ‘महामारीको बेलामा यी यस्ता स्वार्थबाट मुक्त भएर जनताको हितमा लाग्न प्रदेश सरकारको ध्यानाकर्षण हुनु आवश्यक छ,’ उनले भने, ‘महामारीको बेला बजारमा कालोबजारी पनि चरम सीमामा पुगेकाले सेवाग्राही दैनिक उपभोग्य सामग्रीको चर्को मूल्य तिर्न बाध्य छन् । सरकार आफ्नो दायित्वबाट चुकिरहेको छ ।’

सरकारलाई सही बाटोमा डोर्‍याउने प्रतिपक्षको धर्म भएकाले पटक पटक कोरोना महामारीको रोकथाम, नियन्त्रण र निदानका लागि सरकारको ध्यानाकर्षण गराएको प्रमुख सचेतक कार्कीले सुनाए । कोरोना महामारीबाट प्रदेशवासीको ज्यान जोगाउन निजी क्षेत्रका साथै गैर सरकारी संघ संस्था, नागरिक समाजलाई समेत अघि बढ्न उनले आग्रह गरे । कोरोना महामारीकाो रोकथाम, नियन्त्रण र निदानका लागि कांग्रेस प्रदेश सरकारलाई सकारात्मक सहयोग गर्न तयार रहेको कार्कीले प्रतिबद्धता जनाए ।

प्रकाशित : वैशाख २६, २०७८ १८:३८
पूरा पढ्नुहोस्
प्रतिक्रिया
पठाउनुहोस्
×