बालुवाटारमा संवैधानिक परिषद्को बैठक, सभामुख सापकोटा र कांग्रेस सभापति देउवा अनुपस्थित- समाचार - कान्तिपुर समाचार

बालुवाटारमा संवैधानिक परिषद्को बैठक, सभामुख सापकोटा र कांग्रेस सभापति देउवा अनुपस्थित

कान्तिपुर संवाददाता

काठमाडौँ — प्रधानमन्त्री निवास बालुवाटारमा संवैधानिक परिषद्को बैठक सुरु भएको छ । संवैधानिक परिषद्का अध्यक्षसमेत रहेका प्रधानमन्त्री केपी शर्मा ओलीले आह्वान गरेको बैठकमा राष्ट्रिय सभाका अध्यक्ष गणेशप्रसाद तिमिल्सिना र प्रधानन्यायाधीश चोलेन्द्र शम्शेर जबरा सहभागी भएका छन् ।

तस्बिर : प्रधानमन्त्रीको निजी सचिवालय

सभामुख अग्नि सापकोटा र प्रतिपक्ष दल कांग्रेसका नेता शेरबहादुर देउवा भने बैठकमा अनुपस्थित भएका छन् ।

देउवाले शनिबार प्रेस विज्ञप्ति जारी गर्दै सरकारले अध्यादेशमार्फत संवैधानिक परिषद्सम्बन्धी ऐन संशोधन गर्दै संसदीय मूल्य मान्यता प्रतिकुल र लोकतान्त्रिक अभ्यासमै प्रहार गरेको भन्दै बैठकमा आफूले पनि भाग नलिने र अरु सदस्यलाई पनि भाग नलिन आग्रह गरेका थिए ।

त्यस्तै संवैधानिक नियुक्तिविरुद्ध सर्वोच्च अदालतमा गएकाले त्यसैको निरन्तरता हुने बैठकमा सहभागी नहुने बताएका थिए । त्यस्तै नेकपा माओवादी केन्द्रका अध्यक्ष पुष्पकमल दाहालले पनि संवैधानिक परिषद्को बैठकमा सहभागी नहुन सदस्यहरुलाई आग्रह गरेका थिए ।

प्रधानन्यायाधीशले जोगाउनुपर्ने संवैधानिक परिषद्को लाज

सरकारले गत मंगलबार संवैधानिक परिषद्सम्बन्धीसहित सातवटा अध्यादेश जारी गरेको पाँचौं दिन आइतबारका लागि प्रधानमन्त्री ओलीले संवैधानिक परिषद्को बैठक डाकेका हुन् ।

उनले प्रतिनिधिसभामा सोमबार विश्वासको मत लिन लागेका छन्, हालकै अवस्थामा विश्वासको मत पाउने सम्भावना छैन । यस्तो अवस्थामा उनले एक दिनअघि संवैधानिक निकायमा नियुक्तिका लागि बैठक डाकेका हुन् । बैठकले विभिन्न संवैधानिक आयोगमा रिक्त रहेका प्रमुख आयुक्त, आयुक्त तथा सदस्य सिफारिस गर्ने कार्यसूची रहेको छ

गत मंसिर ३० गते जारी गरिएकामा झैं यस पटकको अध्यादेशमा पनि संवैधानिक परिषद्को अध्यक्ष र तत्काल बहाल सदस्यहरूको बहुमत भए गणपूरक संख्या मानिने व्यवस्था छ । यसबाट प्रधानमन्त्रीसहित अरू दुई सदस्य उपस्थित भए संवैधानिक परिषद्को बैठक बस्न सक्नेछ । सर्वसम्मतिमा निर्णय हुन नसके प्रधानमन्त्रीसहित तत्काल बहाल सदस्यहरूको बहुमतले निर्णय गर्न सक्ने व्यवस्था गरिएको छ ।

संविधानअनुसार, संवैधानिक परिषद्मा प्रधानमन्त्री, सभामुख, प्रमुख विपक्षी दलको नेता, राष्ट्रिय सभाका अध्यक्ष, प्रधानन्यायाधीश र उपसभामुख हुन्छन् । अहिले उपसभामुखको पद रिक्त छ । सभामुख अग्नि सापकोटा र विपक्षी दलका नेता शेरबहादुर देउवाले साथ नदिने भएकाले राष्ट्रिय सभाका अध्यक्ष गणेशप्रसाद तिमिल्सिना र प्रधानन्यायाधीश चोलेन्द्रशमशेर जबराको साथमा निर्णय गर्न प्रधानमन्त्री ओलीले बैठक डाकेका हुन् ।

प्रकाशित : वैशाख २६, २०७८ १०:२०
प्रतिक्रिया
पठाउनुहोस्

महाकाली अस्पतालमा अक्सिजन अभाव

अहिले ६० संक्रमित उपचाररत रहेकोमा ९० प्रतिशतलाई अक्सिजन आवश्यक
भवानी भट्ट

कञ्चनपुर — शुक्रबार दिउँसो कञ्चनपुरको महेन्द्रनगरस्थित महाकाली अस्पतालमा अक्सिजन सकियो । नेपालगन्जबाट आउन लागेको अक्सिजन पुग्न ढिला भए पछि आधा घण्टासम्म बिरामीलाई अक्सिजन पुर्‍याउन निकै सास्ती भयो ।

महाकाली अस्पतालका लागि नेपालगन्जबाट अक्सिजन ल्याउन खाली सिलिन्डर गाडीमा लोड गरिँदै। तस्बिर सौजन्य : लक्ष्मण तिवारी

अस्पतालकै अक्सिजन प्लान्टबाट अलिअलि भरेर बिरामीलाई दिइयो । ‘आधा घण्टापछि नेपालगन्जबाट अक्सिजन नआएको भए धेरै क्षति व्यहोर्नुपर्थ्यो,’ महाकाली अस्पताल विकास समितिका अध्यक्ष कृष्णदत्त जोशीले भने, ‘एक/डेढ हप्तादेखि यसरी नै चलिरहेको छ, कतिबेला सकिन्छ भन्ने चिन्ता हुन्छ ।’ उनका अनुसार कोरोना संक्रमितको चाप बढ्दै गएर अक्सिजनको माग पनि बढेको छ । खाली सिलिन्डर अभावका कारण अक्सिजन आपूर्ति हुन सकिरहेको छैन ।

अहिले महाकाली अस्पतालमा ६० संक्रमितको उपचार भइरहेको छ । तीमध्ये ९० प्रतिशतलाई अक्सिजन आवश्यक पर्छ । दैनिक १ सय सिलिन्डर अक्सिजन आवश्यक परिरहेको अस्पतालका कोभिड फोकल पर्सन डा. गोविन्द रोकायाले बताए । उनका अनुसार आईसीयूमा भर्ना भएका बिरामीलाई ५० र अन्य बिरामीलाई ५० सिलिन्डर आवश्यक छ ।

अहिले अस्पतालको प्लान्टबाट दिनमा ६ सिलिन्डरमात्रै भरिन्छ । बाँकी नेपालगन्जबाटै मगाएर आपूर्ति भएको छ । धनगढीमा रहेको उद्योगबाट पनि थोरै मात्रै उत्पादन हुने गरेको छ, जुन धनगढीकै लागि अपुग हुन्छ । ‘शुक्रबार अक्सिजन सकिँदा निकै समस्या पर्‍यो, बिरामीहरूमा पनि मनोवैज्ञानिक त्रास बढ्छ,’ डा. रोकायाले भने, ‘कताकताबाट व्यवस्थापन गरियो, अस्पतालकै प्लान्टबाट पनि सबै सिलिन्डरमा अलिअलि भरेर काम चलायौं ।’

यस क्षेत्रका व्यवसायी र विभिन्न संघसंस्थाले अक्सिजनका लागि सहयोग गरिरहेका छन् । तर उनीहरूले खाली सिलिन्डर भरेर मात्रै ल्याउने काम गरिरहेका छन् । अहिले खाली सिलिन्डरकै अभाव भएका कारण समेत नेपालगन्जबाट भरेर ढुवानी गरि यहाँ पुर्‍याउन समस्या भएको छ । ‘खाली सिलिन्डरकै बढी अभाव देखियो,’ अस्पताल विकास समितिका अध्यक्ष जोशीले भने, ‘५०/५० सिलिन्डर भरेर ल्याउँदा पनि यहाँ सकिनै लागेको जस्तो हुन्छ ।’

अहिलेको बिरामीको अनुपात हेर्दा अस्पतालमा २ सय खाली सिलिन्डर आवश्यक पर्ने जोशी बताउँछन् । उनका अनुसार सय सिलिन्डर स्टक राख्ने र अर्को सय सिलिन्डर भर्न पठाउने गरी व्यवस्थापन गर्न सके मात्रै अहिलेको अभाव टर्ने देखिन्छ । ‘अहिले त साँझ ल्याए बिहानको चिन्ता, बिहान ल्याए साँझको चिन्ता छ,’ उनले भने, ‘यसरी कहिलेसम्म गुजारा चलाउने ?’

महाकाली अस्पतालमा जडान गरिएको अक्सिजन प्लान्टको उत्पादन क्षमता निकै कम भएका कारण पनि समस्या चर्किएको हो । अस्पताल विकास समितिले त्यतिबेलै ठूलो प्लान्ट बनाउने योजना अघि सारेको थियो । तर प्रदेश सरकारले बजेट नदिएका कारण सानो प्लान्ट बनाइएको अध्यक्ष जोशी बताउँछन् । ‘अब अक्सिजनको दीगो समाधानका लागि ठुलो प्लाण्ट निर्माण तर्फ जानुपर्छ,’ जोशीले भने, ‘यसका लागि हामीले कुरा अघि बढाएका छौं, कसै न कसैले अगुवाइ गर्नुपर्छ ।’ दिनहुँ बस्ने जिल्ला विपद् व्यस्थापन समितिको बैठकमा समेत अक्सिजनको दिगो व्यवस्थापनका विषयमा अगाडि बढ्न आग्रह गरेको उनले बताए ।

अहिले जिल्लाका विभिन्न व्यक्ति, सहकारी संस्थाहरू र उद्योगी व्यवसायीहरूले महाकाली अस्पताललाई अक्सिजनका लागि सहयोग प्रदान गर्दै आएका छन् । कसैले एक हप्तासम्म दैनिक ५० सिलिन्डर अक्सिजन दिने प्रतिबद्धता जनाएका छन् भने कसैले १० दिनसम्म दैनिक ५० सिलिन्डर अक्सिजन उपलब्ध गराउने प्रतिबद्धता जनाएका छन् । प्रतिबद्धताअनुसार अकिसजन उपलब्ध पनि भइरहेको छ । तर खाली सिलिन्डरकै अभावका कारण अहिलको आवश्यकताअनुसारको नियमित आपूर्तिको समस्या समाधान हुन सकिरहेको छैन । अस्पतालमा भएका खाली सिलिन्डर भरेरै दाताहरूले पनि आपूर्ति गरिरहेका छन् ।

स्वास्थ्यकर्मी संक्रमित भएपछि समस्या

महाकाली अस्पतालका स्वास्थ्यकर्मी संक्रमित हुन थालेपछि उपचारमा झनै समस्या भएको छ । शुक्रबार मात्रै ५ जना चिकित्सकमा संक्रमण पुष्टि भएको थियो । यसअघि ३० जना स्वास्थ्यकर्मी संक्रमित भएका छन् । ‘स्वास्थ्यकर्मी संक्रमित हुन थालेपछि उपचार गराउन निकै समस्या भएको छ,’ महाकाली अस्पतालका कोरोना फोकल पर्सन डा. रोकायाले भने, ‘केही निको भए, धेरै अझै संक्रमित नै छन् ।’ उनका अनुसार स्वास्थ्यकर्मीले रातदिन लगातार डिउटी गर्नुपरेको छ । आईसीयूमा कार्यरत स्वास्थ्यकर्मीसमेत संक्रमित हुँदा समस्या झनै थपिएको उनले बताए ।

प्रकाशित : वैशाख २६, २०७८ १०:१७
पूरा पढ्नुहोस्
प्रतिक्रिया
पठाउनुहोस्
×