एकै दिन ९ हजार २३ जनामा कोरोना पुष्टि, ५० जनाको मृत्यु- समाचार - कान्तिपुर समाचार
कान्तिपुर वेबसाईट
AdvertisementAdvertisement

एकै दिन ९ हजार २३ जनामा कोरोना पुष्टि, ५० जनाको मृत्यु

कान्तिपुर संवाददाता

काठमाडौँ — पछिल्लो २४ घण्टामा नेपालमा ९ हजार २३ जना कोरोना संक्रमित थपिएका छन् ।

स्वास्थ्य तथा जनसंख्या मन्त्रालयका अनुसार देशका विभिन्‍न प्रयोगशालामा गरिएको १९ हजार ९८७ परीक्षणबाट शुक्रबार ९ हजार २३ जना संक्रमित फेला परेका हुन् । योसँगै नेपालमा कोरोना संक्रमितको संख्या ३ लाख ७७ हजार ६०३ पुगेको छ ।

त्यस्तै पछिल्लो २४ घण्टामा २ हजार ९०५ जना डिस्चार्ज भएका छन् । योसँगै निको हुनेको संख्या २ लाख ९५ हजार ३९५ पुगेको छ ।

सोही अवधिमा कोरोनाबाट ५० जनाको मृत्यु भएको मन्त्रालयको तथ्यांक छ । योसँगै कोरोनाबाट ज्यान गुमाउनेको संख्या ३ हजार ५७९ पुगेको छ ।

सक्रिय संक्रमित ७८ हजार ६२९ छन् भने क्वारेन्टाइनमा ३८० जना रहेका छन् ।

प्रकाशित : वैशाख २४, २०७८ १७:१४
प्रतिक्रिया
पठाउनुहोस्

वीरगन्ज महानगरपालिकाको एक सय शय्याको कोभिड अस्पताल सञ्चालनमा

भूषण यादव

वीरगन्ज — वीरगन्ज महानगरपालिकाले एक सय शय्या क्षमताको अस्थायी कोभिड अस्पताल र एक सय शय्याको आइसोलेसन सेन्टर शुक्रबारदेखि सञ्चालनमा ल्याएको छ ।

वीरगन्ज महानगरपालिका– १० घडिअर्वास्थित गोपाल मण्डलीमा बनाइएको आइसोलेसन सेन्टर र कोभिड अस्पताल मेयर विजयकुमार सरावगीले उद्घाटन गरेका थिए ।

केही दिन अगाडि मात्र संक्रमित भइ होम आइसोलेसनमा रहेकी वीरगन्ज महानगरपालिकाकी उपमेयर शान्ति कार्की पहिलो बिरामीको रुपमा भर्ना भएकी छन् । अस्पतालमा बिरामी भरिएकाले महानगरपालिकाले महानगरवासीको जीवनरक्षाका लागि शुक्रबारदेखि अस्थायी कोभिड अस्पताल र आइसोलेसन सेन्टर सञ्चालनमा ल्याएको मेयर विजयकुमार सरावगीले जनाए । महानगरमा कोभिड संक्रमितहरुको संख्या दिनहुँ बढिरहेको छ । संक्रमितलाई अक्सिजन दिनुपर्ने अवस्था देखिएको छ ।

होम आइसोलेसनमा अक्सिजन प्रयोग गरिरहेका बिरामीहरुको अवस्था समेत जटिल बन्न थालेकोले चिकित्सकको निगरानीमा उपचार गर्नका लािग महानगरपालिकाले कोभिड अस्पताल सञ्चालनमा ल्याएको मेयर सरावगीले बताए । अस्थायी अस्पतालमा चिकित्सकसहित प्यारामेडिकल स्टाफ समेत रोखर संक्रमितको उपचार गरिने छ । कोभिड अस्पतालमा संक्रमितको उपचारका लागि एकजना विशेषज्ञ चिकित्सक, एमडी गरेका दुई जना चिकित्सक, मेडिकल अधिकृत ५ जना, २१ जना प्यारामेडिकल स्टाफ, ८ जना सरसफाइकर्मी र १० जना प्रशासनिक कर्मचारी खटाइएको छ ।

‘कोभिड अस्थायी अस्पतालमा अक्सिजन सहितको वेडको व्यवस्था गरिएको छ,’ कान्तिपुरसँग मेयर सरावगीले भने, ‘होम आइसोलेसनमा रहेका अक्सिजन प्रयोग गर्नुपर्ने संक्रमितहरुलाई अस्थायी कोभिड अस्पतालमा उपचार गरिने छ । होम आइसोलेसनमा रहेका बिरामीलाई चिकित्सकको निगरानीमा अक्सिजन दिनुपर्ने अवस्था देखिएको छ, त्यस्ता संक्रमितलाई महानगरको कोभिड अस्पतालमा उपचार गर्छौँ ।’

कोभिड अस्पतालमा उपचारार्थ भर्ना भएका संक्रमितलाई अक्सिजन, औषधि र खाजा, खाना समेत महानगरपालिकाले निशुल्क रुपमा उपलब्ध गराउने मेयर सरावगीले जनाए ।

प्रकाशित : वैशाख २४, २०७८ १७:०९
पूरा पढ्नुहोस्
प्रतिक्रिया
पठाउनुहोस्
×