एमाले विवाद : राष्ट्रपतिदेखि दोस्रो तहका नेतासम्म सक्रिय, एकताको आधार भेटिएन
काठमाडौँ — नेकपा (एमाले)को एकता जोगाउनका निम्ती आफूले गरेका निर्णय मानेर पार्टी गतिविधिमा संलग्न हुन प्रधानमन्त्रीसमेत रहेका एमाले अध्यक्ष केपी शर्मा ओलीले समानान्तर गतिविधि गरिरहेको वरिष्ठ नेता झलनाथ खनाल-माधवकुमार नेपाल पक्षलाई आग्रह गरेका छन् ।
राष्ट्रपति विद्यादेवी भण्डारी, महासचिव ईश्वर पोखरेल, अर्थमन्त्रीसमेत रहेका संगठन विभाग प्रमुख विष्णु पौडैललगायतलाई पछिल्ला दिनमा पार्टीको विवाद मिलाउन परिचालन गरेका ओली आफैंले पनि नेपाल पक्षका नेताहरूसँग पटक-पटक छलफल गरेका छन् ।
छलफलमा सहभागी खनाल-नेपाल पक्षका नेताहरूले अध्यक्ष ओलीले पार्टी एकताका लागि ठोस प्रस्ताव अगाडि नसारेको र आफूहरूले राखेको प्रस्तावमा पनि स्वीकृति नजनाएको बताएका छन् ।
एमालेको विवाद उत्कर्षमा पुगेको बेला राष्ट्रपति भण्डारीले बिहीबार साँझ नेता नेपालसँग झन्डै पौने ३ घण्टा छलफल गरेकी थिइन् । राष्ट्रपति कार्यालय सितल निवासमा भएको छलफल एमालेको एकता जोगाउने विषयमा केन्द्रित भएको बताइएको छ ।
राष्ट्रपति र नेता नेपालबीच छलफल भइरहेका बेला प्रधानमन्त्री निवासमा अध्यक्ष ओलीले नेपाल पक्षका नेताहरू घनश्याम भुसाल र योगेश भट्टराईसँग छलफल गरेका थिए । झन्डै ३ घण्टा भएको छलफलमा पनि एकताको शुत्र नभेटिएको छलफलमा सहभागीले बताएका छन् ।
आफूले राष्ट्रपति, भुसाल र भट्टराईले अध्यक्ष ओलीलाई भेटेको भोलिपल्ट नेता नेपालले कुनै सहमति नभएको र आफूहरूको एकताको बटमलाइन यथावत रहेको बताएका छन् । शुक्रबार उनले भनेका छन्, '२०७५ जेठ २ गतेको कमिटी, विधान र नेतृत्व नै हाम्रो बटमलाइन हो ।' उनले पार्टी एकताक लागि आफूहरू वार्ता र लचकता अपनाउने बताउँदै भनेका छन्, 'तर अहिलेसम्म कुनै सहमति भएको छैन ।' पछिल्लो समय भइरहेका छलफललाई लिएर आफू पक्षलाई 'भ्रममा नपर्न, नअलमलिन र सुदृढ र सशक्त पार्टी बनाउने महान् अभियानमा लागिरहन' पनि उनले आह्वान गरेका छन् ।
अध्यक्ष ओलीसँग बिहीबार साँझ लामो छलफल गरेका एमाले नेता योगेश भट्टराईले 'पार्टी मिलाउने कुरा भएको' बताए । उनले कुराकानी हुनु राम्रो भए पनि एकताको ठोस प्रस्ताव नआएको बताए । 'उहाँले मिल्ने एजेन्डा प्रस्तुत गर्नुभएको छैन । आफूले गरेका निर्णय मानेर जाउँ मात्रै भन्नुहुन्छ,' ओलीको भनाइ उल्लेख गर्दै भट्टराईले भेटबारे थपे, 'अझै ठोस मिलनबिन्दु भेटिएको छैन । अध्यक्षले मैले निर्णय गरेको छु त्यो मानेर आउनुस् भन्नुभयो । हामीले त्यो हुँदैन भन्यौं । हामीले २०७५ जेठ २ लाई आधार बनाएर एकताको विकल्प खोज्नुपर्छ भन्यौं ।'
आफ्नो र भुसालको कुरा सुनेपछि प्रधानमन्त्रीले फेरि 'छलफल गरौंला' भनेको र आफूहरू बालुवाटारबाट बाहिरिएको भट्टराईले जानकारी दिए ।
प्रधानमन्त्री ओलीले महाधिवेशन घोषणा, माओवादी छोडेर आएका नेताहरूलाई दिएको जिम्मेवारी, स्थायी कमिटी गठन, नेपाल पक्षका नेताहरूको जिम्मेवारी खोस्नेलगायतका निर्णय मानेर जानुपर्ने भुसाल र भट्टराईलाई भनेका थिए ।
ओलीले बालुवाटार बोलाउनुअघि भुसाल र भट्टराई अर्थमन्त्री विष्णु पौडेलसँग छलफलमा बसेका थिए । त्यहाँ पनि एकताको ठोस आधार नभेटिएको उनीहरूले बताएका छन् । पौडेलसँग छलफल गरेका नेपाल पक्षका नेता सुरेन्द्र पाण्डेले एकताको ठोस प्रस्ताव नआएको र आधार पनि नभेटिएको बताए ।
ओली र नेपालको बीचमा मध्यस्तताको काम गरिरहेका सांसद सोमप्रसाद पाण्डेले राष्ट्रपतिदेखि प्रधानमन्त्रीसँगसम्मका कुराकानीमा एकताको स्पष्ट मार्गचित्र भेटिइनसकेको तर प्रयास जारी रहेको बताए ।
'अध्यक्षले आन्तरिक कुरा मिलाएर जाने कुरा गर्नुभएको छ । बुँदाहरूको वर्कआउटमा छौं,' पाण्डेले भने, 'हिजो राष्ट्रपतिसँग उहाँ (माधव नेपाल)को भेट भएपछि नयाँ परिस्थिति सिर्जना भएको छ । माधव नेपालले २०७५ जेठ २ मा फर्किनुपर्ने बटम लाइन मान्नुपर्छ भन्ने कुरा राखेँ भन्नुभएको छ ।'
अध्यक्ष ओलीसँग मध्यस्तता गरिरहेका नेताहरूले पनि एमाले र माओवादी एकता हुनुपूर्वको अवस्थामा फर्किनुपर्ने कुरा राखेको पाण्डेले बताए । 'यसमा प्रधानमन्त्रीले एस पनि भन्नुभएको छैन, नो पनि भन्नुभएको छैन । टेबुलमा बसेर छलफल भएपछि यी सबै कुरा टुंग्याउन सकिन्छ भन्ने प्रधानमन्त्रीको भनाइ छ,' पाण्डेले भने ।
नेपाल पक्षलाई गरेको कारबाही लगायतका कुरा फिर्ता गर्ने शर्त पत्रमै भएकाले त्यसमा समस्या नभएको अध्यक्ष ओलीले जवाफ दिएको उनले बताए ।
प्रधानमन्त्री तथा अध्यक्ष ओलीको तर्फबाट मध्यस्तताको काम गरिरहेका संसदीय दलका उपनेता सुवासचन्द्र नेम्वाङले भने दुवै नेताबीच एकता गराउने प्रयास भइरहेको बताएका छन् । उनले त्यसको अन्तिम कडीका रूपमा शुक्रबार नै दुवै नेताबीच वार्ताको सम्भावना रहेको जानकारी दिए ।
शुक्रबार प्रधानमन्त्री निवास बालुवाटारमा बसेको एमाले स्थायी कमिटी बैठकमा पनि नेपाल पक्षसँग कसरी सहमति गर्ने र एकता कसरी जोगाउने भन्नेबारे छलफल भएको उनले बताए ।
महासचिव पोखरेलले बुधबार नेपाल पक्षका नेताहरू भट्टराई, गणेश पहाडी लगायतलाई भेटेका थिए । उक्त भेटमा महासचिव पोखरेलले पार्टी मिलाउने प्रस्ताव के हो ? भनेर सोधेको उक्त छलफलमा सहभागी एक नेताले बताए । जवाफमा २०७५ जेठ २ नै आधार भएको जवाफ दिएको ती नेताको भनाइ थियो ।
महासचिव पोखरेललाई नेताहरूले व्यक्ति-व्यक्ति भेटेर समस्या समाधान नहुने । पार्टी एकता जोगाइराख्नका लागि ओली, खनाल र नेपालबीच छलफल गराउनुपर्ने सुझाएका थिए । शीर्ष नेताबीच गहन छलफल भएमा पार्टी एकता एकै भेटमा जोगिने र त्यसका लागि पहल गर्नुपर्ने सुझाव आफूहरूले दिएको ती नेताको भनाइ थियो । 'एकताका ढोका बन्द गर्ने र हामीलाई अल्झाउन मात्रै खोज्ने हो भने अब हामी अल्झिने पक्षमा छैनौं । वार्ता पनि भइरहन्छन् हामी आफ्ना योजना पनि तयार राखिराख्छौं,' ती नेताले भने ।
प्रधानमन्त्री ओलीले प्रतिनिधिसभामा बैशाख २७ गते विश्वासको मत लिने तयारी गरेका छन् । त्यसका लागि प्रतिनिधिसभाको अधिवेशन पनि आह्वान गरिसकिएको छ । विश्वासको मत प्राप्त गर्नका लागि उनले प्रमुख प्रतिपक्ष कांग्रेसदेखि पार्टीभित्रकै विपक्षी खेमासँग छलफल गरिरहेका छन् ।
बैशाख २७ गतेलाई नै ध्यानमा राखेर प्रधानमन्त्री तथा अध्यक्ष ओलीको तर्फबाट पछिल्ला गतिविधि भइरहेको खनाल-नेपाल खेमाको बुझाइ छ । २७ गते पहिल्यै सहमति गर्ने र त्यसको कार्यान्वयनमा ओलीले बाधा हाल्ने हुन् कि भन्ने नेपाल पक्षको शंका छ । 'कुराकानी अत्यन्तै सकारात्मक तवरमा भइरहेको छ । त्यसको कार्यान्वयन कसरी हुन्छ भन्ने कुरा हो,' सोमनाथ पाण्डेले भने, 'नेताहरूबीच विश्वास बढाउन गाह्रो भइरहेको हो । दुवै पक्ष सकारात्मक देखिनुहुन्छ तर विश्वास बढाउने, जगाउने प्वाइन्टमा पुगिसकेको छैन ।'
ओली-नेपाल भेट अन्योलमा
यसैबीच प्रधानमन्त्री तथा अध्यक्ष ओली र नेता नेपालबीच शुक्रबार भेटको तयारी भएको बताइएको छ ।नेता नेम्वाङले ओली र नेपालबीच भेटको सम्भावना रहेको बताएका छन् ।
नेपाल पक्षले भने भेटको टुंगो नलागिसकेको बताएको छ । दुवै पक्षलाई सहमतिमा ल्याउन पहल गरिरहेका सोमनाथ पाण्डेले 'छलफल भइरहेको तर टुंगो भइनसकेको' बताए ।
प्रकाशित : वैशाख २४, २०७८ १४:५२